Регулаторната комисија за енергетика и водни услуги (РКЕ) донесе одлука за намалување на малопродажните цени на нафтените деривати во просек за 2,93 отсто. Од ноќеска на полноќ цената на бензините ЕУРОСУПЕР БС-95 и ЕУРОСУПЕР БС-98 се намалува за еден денар за литар. Па така, ЕУРОСУПЕР БС-95 ќе се продава по цена од 58,50 денари за литар, додека цената на ЕУРОСУПЕР БС-98 ќе изнесува 60,50 денари за литар.
Малопродажните цени на ЕУРОДИЗЕЛ (Д-Е V) и на екстра-лесното масло за домаќинство (ЕЛ-1) се намалуваат за 1,50 денари за литар и од ноќеска на бензинските станици ќе можат да се набават по цена од 49 денари за литар. Малопродажната цена на мазутот М-1 НС се намалува за 1,407 денари за килограм и ќе изнесува 24,549 ден/кг.
Во изминатиот седумдневен период сите референтните цени на светските берзи во просек бележат намалување и тоа: на бензинот за 5,950 отсто, на дизелот за 9,999 отсто, на екстра лесното масло за 9,239 отсто и на мазутот за 9,018 отсто. Во истиот период курсот на денарот во однос на доларот е повисок за 0,496 отсто, соопштуваат од РКЕ.
