Поранешниот американски потпретседател, Џо Бајден и сенаторот од Вермонт, Берни Сандерс се главните претенденти за претседателски кандидат на Демократската партија што ќе му се спротивстави на Доналд Трамп на претстојните претседателски избори во САД. По гласањето на синоќешниот „супер вторник“, Бајден успеа да го победи Сандерс во девет сојузни држави: Тексас, Масачусетс, Арканзас, Минесота, Тенеси, Оклахома, Алабама, Северна Каролина и Вирџинија.
Изненадувачкиот успех на Бајден доаѓа откако двајца други демократски кандидати Ејми Клобучар и Пит Бутиџич се откажаа од трката и својата поддршка пред гласањето на „супер вторникот“ му ја дадоа на Џо Бајден. Тој успеа да го победи сенаторот Сандерс во Тексас и изненадувачки во Северна Каролина. Сепак, Берни Сандерс на синоќешното гласање ја освои победата во Јута, Колорадо и Вермонт, а во моментов има предност пред Бајден и во државата со најмногу делегати – Калифорнија. Конечните резултати во сојузната држава Мејн треба допрва да се објават, иако првичните резултати укажуваат на мртва трка меѓу двата кандидати.
Синоќешните резултати од гласањето на демократите покажаа дека двајцата други претенденти за кандидат на демократите – милијардерот Мајкл Блумберг и левичарската сенаторка Елизабет Ворен имаат минимални шанси доколку се одлучат да ја продолжат трката со Бајден и Сандерс. Според последните резултати што ги објави „Гардијан“, Бајден досега има освоено 453 делегати, додека Сандерс има 382. За да се добие номинацијата на Демократската партија за кандидат за американски претседател на изборите, потребни се гласовите од минимум 1.991 делегат.
