Австралиската антитерористичка полиција соопшти дека во Сиднеј спречила терористички напад, апсејќи две лица поврзани со Исламска држава. Кај уапсените се пронајдени ножеви, видеоснимка и знаме кое се поврзува со милитантната група.
Австралија, која е еден од главните сојузници на САД во борбата против Исламска држава во Сирија и во Ирак, првпат во септември минатата година ја подигна готовноста поради можни напади од исламски радикали во земјата.
Полицијата соопшти дека мажите, на возраст од 24 и од 25 години, се уапсени по рација во западното предградие на Сиднеј, а обвинети се дека планирале терористички чин.
– За време на претресот на просториите се пронајдени голем број предмети, вклучувајќи и мачети, ловечки нож и рачно изработено знаме кое ја претставува терористичката организација Исламска држава. Исто така, е пронајдена и пронајдена и видеоснимка на која се говори за вршење напад – соопшти полицијата.
Австралија смета дека најмалку 7о нејзини државјани се борат за ИД во Сирија и во Ирак, а добиваат поддршка од стотина соработници во Австралија.
