Опозицијата да се врати во Собранието затоа што тоа е местото за надминување на политичката криза во земјата, побараа амбасадорите на Германија, Италија, Франција, САД, Велика Британија и на ЕУ на денешната средба со лидерот на СДСМ, Зоран Заев.
– Го поздравуваме учеството на Заев на состанокот на Националнот совет за безбедност. Јасно му дадовме на знаење дека и од опозицијата очекуваме одговорно однесување. Ја разбираме резервираноста која постои и потребата од опозицијата да биде будна до ниво на кое ќе игра важна улога на супервизор. Но, Собранието е клучна институција во која опозицијата може да земе учество на истражувачки начин. Затоа ја охрабруваме да се врати во Собранието и да помогне за излегување на политичкиот ќор-сокак – изјави германската амбасадорка Кристине Алтхаузер од името на сите амбасадори, по средбата со Заев.
Амбасадорката додаде и дека тие го поддржуваат правото на мирен протест.
Паралелно соопштение за средбата испратија и од СДСМ. Во соопштението на опозицијата пишува дека на средбата била изразена загриженост за капацитетите на институциите на системот за справување со актуелните предизвици, а биле нагласени и потребата од враќање на слободата на говор и на независноста на правосудниот систем.
– Враќање на демократските институции во Македонија е можно само со заминување на Никола Груевски и на групата околу него, со што ќе се создадат услови опозицијата да може институционално да работи и да дејствува. Клучната порака на мирниот натпартиски граѓански протест на 17 мај ќе биде оставка од Груевски за враќање на политичката, безбедносната стабилност на Македонија и на нејзините перспективи – рекол Заев.
Како што пишува во соопштението, дипломатите ги поздравиле заложбите на СДСМ за мирен граѓански протест, како и чекорите на претседателот Заев и на партијата, во насока на меѓуетнички соживот, инклузивност, стабилност и безбедност во Македонија.
