До крајот на годинава ќе има повеќе од еден милион луѓе кои бараат азил во Европската Унија, покажуваат податоците на Агенцијата за азил на ЕУ. Најпосакувана дестинација е Германија, а веднаш потоа следуваат Франција и Италија, соопшти германската новинска агенција ДПА.
„Ќе има повеќе од милион барања,” изјави шефицата на агенцијата Нина Грегори, за медиумската група „Функе“.
Во октомври имало околу 123.000 пријави, што е најмногу за еден месец во последните седум години. Вкупно, 27-те земји членки на ЕУ моментално имаат речиси 450 милиони жители.
Грегори исто така кажа дека не се очекува значителено намалување на бројот на мигранти.
„Светот е сè понестабилен“, додаде таа, а според тоа, потребата за заштита на бегалците нема да се намали во 2024 година.
Во ЕУ до крајот на октомври се регистрирани 937.000 барања, што е зголемување за 22 отсто во однос на истиот период лани.
Во Германија до крајот на ноември се поднесени речиси 326.000 барања за азил, што е зголемување за 52 отсто во споредба со првите 11 месеци од 2022 година, покажуваат податоците на Федералната канцеларија за миграција и бегалци.
