Министерството за надворешни работи (МНР), во врска со катастрофалниот земјотрес во Мароко, информира дека согласно ангажманот на амбасадата на Република Северна Македонија во Каиро, двајца наши државјани кои се наоѓаа во камп во Маракеш, пристигнати се во Мадрид и се во добра здравствена состојба.
„Се очекува да си заминат во своите домови“, информира МНР.
Во изминативе два дена нема нови пријавени наши државјани во Маракеш.
„Нашето Дипломатско конзуларно претставништва во Каиро продолжува да биде во комуникација со надлежните институции во Мароко, за евентуални други наши државјани во погодените региони“, се додава во соопштението.
Министерството за надворешни работи ги повикува сите државјани на Северна Македонија кои во моментот се наоѓаат во Мароко и имаат потреба од конзуларна асистенција, да се јават на дежурниот телефон на Амбасадата во Каиро +20 103 361 5542 и СОС телефонот на Министерството за надворешни работи 075/ 273- 732.
Мароко го погоди катастрофален земјотрес пред два дена, а смртниот биланс е над 2.000 загинати лица.
