Министерката за одбрана Славјанка Петровска на денешниот брифинг за новинари информираше дека во пристаништето во Солун пристигна втората пратка лесни оклопни возила JLTV Oshkosh, односно 26 возила, наменети за Армијата на Република Северна Македонија.
„Вкупно 26 возила се наоѓаат на пристаништето во Солун и во наредните денови треба да започне испораката кон Република Северна Македонија, односно истите ќе бидат пренесени во касарната во Штип“, истакна Петровска на новинарското прашање за набавката на оклопните возила од типот JLTV Oshkosh.
АРМ веќе користи шест лесни оклопни возила „Ошкош“ кои пристигнаа во јули минатата година, а на кои припадниците на Армијата имаа можност да се обучуваат.
Досега испорачаните 32 Ошкоша се дел од повеќегодишна набавка на вкупно 88 оклопни возила од ваков тип, која ќе се реализира и во следните години.
