Битолскиот народен театар веќе е подготвен да ја прикаже новата премиера, „Кокошка“ од авторот Николај Кољада, а во режија на актерот познат по своите стендап-комедии, Маријан Ѓоргиевски. Премиерата е најавена за понеделник, 9 февруари, во 19.30 часот, на новата сцена на БНТ.
Оваа претстава е магистерски труд на Ѓоргиевски.
– Претставата се занимава со површниот банален живот на една група актери, кои живеат и работат во мал паланечки, провинциски театар. Една вечер решаваат да го променат својот живот и да отвораат многу големи теми. И тука се случува сè. Ликовите живеат во постојано исчекување за поубави нешта – вели актерот и режисер Маријан Ѓоргиевски.
Драматургијата е на Оливера Павловиќ, сценографијата на Валентин Светозарев, костомографијата на Благој Мицевски, а светлото на Димче Спасевски.
Во претставата играат Јулијана Мирчевска, Катерина Аневска, Соња Ошавкова, Александар Димитровски и Николче Пројчевски.
А.Б.