Бизнисот беше тој, кој во изминатите години непрекинато ја одржуваше регионалната соработка, дури и кога политичките процеси затајуваа, изјави националниот координатор на Коморскиот инвестициски форум во рамките на Стопанската комора на Македонија, Татјана Штерјова на конференцијата „Иднината на Балканот – кон глобална вклученост“, што се одржа вчера во Тирана.
На конференцијата се разговарало за перспективите на институциите за глобална вклученост на земјите од Западен Балкан, за состојбите на пазарот на капитал во овие земји, но и за можностите за унапредување на прекуграничната соработка.
„Бизнисот може да биде тој кој ќе го обезбеди потребниот економски инпут за забрзување на процесот на европски интеграции и достигнување на посакуваното ниво на економски развој, но за тоа мора да му се обезбедат потребните услови“, изјави Штерјова.
