Вицепремиерот задолжен за европски прашања Бујар Османи, министерот за правда, Билен Салији, и министерот за информатичко општество и администрација, Дамјан Манчевски, утре ќе бидат во еднодневна посета на Брисел.
Вицепремиерот Османи, заедно со директорката за Западен Балкан во рамки на Директоратот за соседство и преговори за проширување (ДГ НЕАР) на Европската комисија, Џеновева Руиз Калавера, ќе копретседава со 14. состанок на Комитетот за стабилизација и асоцијација.
Владината делегација ќе се сретне и со генералниот директор на Генералниот директорат за проширување и за соседска политика, Кристијан Даниелсон, од кого ќе побара поддршка и конкретни чекори од страна на Европската Унија кои ќе бидат поттик за задржување и за засилување на реформскиот и на европскиот курс на државата.
