Од објавените наслови се добива впечаток дека Османи се откажува од претседателската трка, а вистината е дека поради здравствени семејни причини ги откажа предизборните активности на 16 април. Но, иако тој лично не присуствуваше, во Струга вчера се одржа централниот митинг и кампањата за претседателските избори на Европскиот фронт продолжува, пишува Вистиномер.
Текстот го пренесуваме во целост:
Рецензираме објава на социјалната мрежа Фејсбук во која се вели:
Османи ги прекинува предизборните активности, за причините се огласи на Фејсбук.
Во рамките на објавата е споделен текст со идентичен наслов.
Истата објава ја има и тука. како и на многу други места. Но, на насловот во овие написи му недостига контекст. Османи не ги прекинува целосно предизборните активности, како што се добива впечаток од насловот, туку само тој ден (16.04.2024). Што може да се види кога ќе се прочита написот.
А, во него се цитира објавата на Османи:
Почитувани поддржувачи, Од здравствени причини во семејството ќе ги прекинам денешните предизборни активности. Се надевам дека ќе бидам со вас на централниот состанок вечерва ако се биде во ред. Ви благодариме за разбирањето!
Во самата објава на Османи, пренесена во текстот, јасно стои дека ги прекинува денешните предизборни активности (16.04.2024). Тој дури вели и дека доколку успее ќе биде дел од централниот митинг вечерва (митингот во Струга 16.04.2024). А насловот, пак, алудира како да се откажува од предизборната кампања во претседателските избори. Од насловот читателите добиваат впечаток како Османи да се откажал од претседателската трка.
Предизборната кампања на претседателскиот кандидат на Европскиот фронт, Бујар Османи продолжи синоќа во Струга, каде во ЦК „Браќа Миладиновци“ се одржа централниот митинг на кој пред стружани беше претставена програмата на Османи, а на кој.присуствуваше и екипата на Вистиномер.
Програмата ја претставија Талат Џафери, Али Ахмети, Муса Џафери и Јетон Шакири. На стартот на вечерашниот митинг беше кажано дека, за жал, од приватни причини Османи не е во Струга, но неговите сопартијци зборуваа за предизборната програма и ги повикаа стружани да го дадат својот глас за кандидатот на Европскиот фронт.
Од коалицијата Европски фронт велат очекуваат нивниот кандидат што поскоро да ги продолжи предизборните активности.
Поради горенаведените факти оценуваме дека на објавите на социјалните мрежи и на насловите од овие написи им недостига контекст. Станува збор за многупати досега видена манипулативна техника каде што насловот наведува на нешто сериозно или значајно и сензационално, а во самиот напис се вели нешто сосема друго или, пак, од деталите во текстот од написот се гледа дека во веста нема ништо посебно сензационално, туку насловот е составен на таков начин за да се креира забуна и да се добијат кликови.
