„По најавата на уценетиот Зоран Заев за отворање дебата за елементите од тиранската платформа, дебатата почна да се реализира на дело. Човекот што го навредуваше и го потценуваше македонскиот народ во секоја своја изјава, Питер Ванхауте, ја откри крајната цел на ова сценарио, а тоа е федерализација на Република Македонија“, се вели во редовното утринско соопштение на ВМРО-ДПМНЕ.
Во него се додава дека „албанската пратеничка Месила Дода се закани дека доколку Заев отстапи од платформата, тогаш сите Албанци ќе се ангажираат околу остварување на сонот за Илирида“.
– Партнерот на аболираниот криминалец Зоран Заев, Зијадин Села, јавно го негира македонскиот идентитет и вели дека пред 100 години не постоеле Македонци и кажа дека не го почитува знамето, грбот и химната на Република Македонија. Од друга страна, Трифун Костовски дрско и без срам јасно говори дека треба да им се одземе правото на Македонците по потекло од Егејска Македонија да го кажат сопственото мислење и да се борат за заштита на највисоките државни и национални интереси – велат од ВМРО-ДПМНЕ.
Оттаму додаваат дека „јавноста може да претпостави дека оваа дебата, односно пазарење со националните и државни интереси, ќе заврши со редефинирање на државата“.
Од ВМРО-ДПМНЕ велат дека остануваат на својата понуда, „доколку СДСМ се откаже од тиранската платформа и реализацијата на елементите содржани во неа, ќе им даде поддршка на СДСМ и на Зоран Заев да формираат влада“.