Заменик-претседателката на СДСМ, Радмила Шекеринска, денеска во Кисела Вода изјави дека борбата на опозицијата е младите луѓе да останат во Македонија. Од тие причини го создале проектот „Гаранција за млади“.
„Проектот ,,Гаранција за млади“ ќе значи дека државата ќе гарантира на сите млади граѓани во Македонија дека веднаш по завршувањето на образованието во рок од четири месеци секој млад човек ќе може или да го продолжи образованието или да добие понуда за работа или да добие можност за пракса, обука или тренинг со којшто ќе се прилагоди на потребите на некое работно место коешто е на располагање. Овој метод, во многу европски земји даде добри резултати и ние сметаме дека ова треба да биде фокусот на младинските политики за младите да не заминуваат туку да останат во татковината – рече Шекеринска.
Таа додаде дека погрешните политики, економски, социјални, образовни се причината зошто младите сакаат да ја напуштат татковината.
