Еден од четирите реактори на нуклеарната централа Доел во Белгија денеска е изгаснат поради протекување топла вода, соопшти компанијата „Електрабел“, која управува со постројката.
Протекувањето се случило во делот на генераторот за пареа, кој е одвоен од реакторот. Атомската централа Доел 3 се наоѓа северно од Антверп.
Реакторот е исклучен неколку дена откако продолжи да работи по речиси двегодишна пауза поради ремонт.
Официјални претставници соопштија дека во еден часот по полноќ е извршено „топло згаснување“, што значи дека реакторот не е целосно оладен и може повторно, за релативно кратко време, да се покрене.
Компанијата покренала истрага за протекувањето, а засега не се знае кога реакторот повторно ќе проработи.
Доел 3 е постројка со производствен капацитет од 1.006 мегавати, а беше изгаснат откако во рамки на реакторот беа откриени микро-пукнатини.
