Масовната миграција му нанесува штета на британското општество, ќе предупреди британската министерка за внатрешни работи, Тереза Меј, во говорот што ќе го одржи на годишната конференција на владејачката Конзервативна партија, а до кој стигнала агенцијата „Ројтерс“.
Таа во говорот оценува и дека нивото на миграција во последните десет години не било во согласност со националниот интерес на Велика Британија.
За 12 месеци, до март годинава, во Британија мигрирале 330.000 лица, што е далеку повеќе од 100.000, колку што вети премиерот Дејвид Камерон.
Високиот степен на имиграција ја засилува поддршката кај противничките партии и претставува фактор што би можел да ги наведе Британците на гласање за излез од ЕУ на планираниот референдум, закажан за крајот на 2017 година.
– Кога имиграцијата е превисока, кога промените се случуваат премногу брзо, не може да се гради кохезивно друштво – наведува Меј во својот говор, додавајќи дека масовната имиграција ги оптоварува јавните сервиси, како што се школите и болниците, ја намалува заработувачката и ја зголемува невработеноста.
