Во Будимпешта наскоро треба да се одржи самит посветен на движењето на мигрантите преку Западен Балкан, најавија денеска од Брисел министрите за надворешни работи на земјите-членки на ЕУ.
Во соопштението не е прецизирано кога ќе биде одржана конференцијата, но дипломатските извори велат дека најверојатно ќе се одржи во септември.
Статистиките покажуваат дека бегалците од Африка, Азија и од Блискиот Исток сè поретко се обидуваат да дојдат до територијата на ЕУ, минувајќи го Медитеранот.
Приматот, според министрите, го презеде балканската рута, која преку Турција, Грција, Македонија и Србија води до Унгарија и до другите членки на ЕУ.
Унгарија, долж границата со Србија, крева висока ограда за да ги спречи мигрантите илегално да поминат и да побараат азил.
