Во најновиот извештај на релевантната меѓународна организација „Фридом хаус“, Македонија повторно е оценета како земја во која владее хибриден режим, реагираат од СДСМ.
Во соопштението на опозициската партија пишува дека извештајот на „Фридом хаус“ содржи недвосмислени критики за спроведувањето на изборниот процес, состојбата во медиумите, за загрозувањето на основните човекови права и слободи.
„Во извештајот е наведено дека Македонија продолжува да забележува пад, особено во категориите независност на медиуми, борба против корпуција, изборен процес и граѓанско општество. „Фридом хаус“ го констатираше она што е содржано во извештајот на експертската група на Европската комисија, подготвен од Рајнхард Прибе, кој укажува на сите системски злоупотреби на власта на Никола Груевски. Меѓународните извештаи се јасни, нема простор за различно толкување или за нереални перцепции. Работите мора да се променат. На Македонија ѝ е потребно враќање на слободата, демократијата и на европските вредности. Неопходно е Никола Груевски и неговите најблиски соработници, кои ја узурпираа државата и од неа направија земја со хибриден режим, да се повлечат и преку организација на влада, во која нема да бидат вклучени креаторите на проблемите, да се создадат минимални услови за организирање фер и демократски избори во Македонија“, реагираат од СДСМ.
