Германија смета дека Македонија заслужува признание од цела ЕУ


Берлин, 14 јуни, 2018 - 11:51 (META) 

Германскиот министер за надворешни работи, Хајко Mас на прес-конференцијата со министерот за надворешни работи, Никола Димитров во Берлин рече дека Германија го поддржува договорот постигнат меѓу Македонија и Грција за кој смета дека е решение постигнато со заедничко разбирање кое ќе донесе промена кај граѓаните.

Тој рече дека одлуките за ЕУ и НАТО ќе бидат многу важен сигнал и истакна дека она што Македонија го постигнала во однос на исполнување на критериумите и процесот на реформи, навистина импресионира и дека заслужува признание од цела ЕУ.

– Ова решение е добро ние ќе го поддржуваме и натаму тој процес за влез на земјата во ЕУ. Не импресионира процесот на реформи што во последниве години се случува во Македонија. Земјата покажува резултати и треба да добие признание за тоа од целата Европска унија. Ви укажуваме да покажете решителност. Се надевам дека одлуките кои ќе се носат во иднина во однос н НАТО и ЕУ ќе бидат важен сигнал за граѓаните на вашата земја и ќе се оди во правец на европската перпектива, не сакаме некои други сили да ги остваруваат нивните планови во вашиот регион – рече Мас.

На новинарско прашање дали се подготвени да лобираат за помош за придвижување на евроинтеграцискиот процес на Македонија, Мас, рече дека се апсолутно подготвени.

– Уверен сум дека позицијата на Владата ќе биде прифатен од Парламентот, како и од нашите холандски и француски пријатели со кои интензивно ќе разговараме во следните денови за да дојдеме до заедничка позиција – рече Мас.

Шефот на македонската дипломатија, Никола Димитров рече дека мотивите во целиот овој процес на преговори, освен пријателство со Грција биле и членството во ЕУ и НАТО, при што според него, политичката одлука во јуни од Европскиот совет и поканата за членство во НАТО ќе значат дека компромисот што е постигнат ќе биде видлив за двете страни.

-Македонија живее историски денови, недели и месеци, на добар пат сме да затвориме еден спор кој беше како камен и ни го отежнуваше прогресот и не заклучи во чекалната каде многу години поминавме, од 2005 година како кандидат за членство, а годинава ја добивме деветтата препорака. Ова чекање создаде кризи, но научивме лекции. Сакаме да немаме спорови со соседите, да имаме независно судство, слободни медиуми и одговорни политичари – изјави Димитров во Берлин.

Според Димитров, Македонија на овој начин не создава само перспектива, туку го затвора и македонското прашање.


Ристевски за „Шамари“ – кој признава, добива шест месеци условна затворска казна


Скопје, 30 ноември, 2017 - 14:34 (META) 

Поранешниот советник во Општина Центар од редовите на ВМРО-ДПМНЕ, Јордан Ристевски, обвинет за насилствата пред Општината од јуни 2013 година, случај во јавноста познат како „Шамари“, денеска од Кривичниот суд во Скопје беше осуден на шестмесечна условна затворска казна, доколку во наредните две години не стори ново кривично дело.

Пресудата денеска ја соопшти судијката Татјана Михајлова, откако петтообвинетиот во „Шамари“, Ристевски, на вчерашното рочиште доброволно ја призна вината и рече оти се кае за стореното.

На барање на обвинителката на СЈО, Фатиме Фетаи, постапката против него беше раздвоена и судењето продолжи веднаш.

Минатата недела вина за учеството во насилствата пред Општина Центар во јуни 2013 година, призна и четвртообвинетиот Томислав Лазаров, и по раздвојувањето на постапката исто така доби шест месеци условна затворска казна.

Судењето за другите обвинети во случајот, меѓу кои се и поранешниот премиер и актуелен лидер на ВМРО-ДПМНЕ, Никола Груевски, ексминистерот за транспрот и врски, Миле Јанакиески, пратеничката Даниела Рангелова и уште десетина лица, продолжува  на 7 декември.


СЈО: Обвинет во „Таргет“ и во „Тврдина“ ја призна вината и доби условна казна


Скопје, 22 ноември, 2017 - 13:30 (META) 

Специјалното јавно обвинителство денеска соопшти дека едно лице обвинето во случаите „Тврдина“ и „Таргет“, ја признало вината и дека за него постапката била раздвоена, а во петокот минатата недела била донесена и пресуда.

На обвинетиот, чиј идентитет не се соопштува, му била изречена алтернативна мерка – условна осуда за помагање на сторител во извршено кривично дело.

Од СЈО нагласуваат дека станува збор за прва правосилна пресуда за случај на тоа обвинителство.

„Предлогот за раздвојување беше истакнат од ова јавно обвинителство, при што се имаше предвид интересот на обвинетото лице за побрзо завршување на постапката, како и економичноста и целисходноста на постапката“, стои во соопштението на СЈО.

Во случаите „Таргет“ и „Тврдина“, кои се споени во еден обвинителен акт, првообвинети се поранешниот директор на Управата за безбедност и контраразузнвање (УБК), Сашо Мијалков, ексначалникот на петтата управа, Горан Грујовски, поранешниот шеф на кабинетот на Мијалков, Тони Јакимовски, и уште десетина лица. Тие се товарат за незаконското прислушување, што пред две години го разоткри тогаш опозициската, а сега владејачка партија – СДСМ, и за уништување на опремата од прислушувањето.

Инаку, неделава на рочиштето од судскиот процес за насилствата пред Општина Центар од јуни 2013 година, поранешниот претседател на Општинскиот комитет на ВМРО-ДПМНЕ, Томислав Лазаров, ја призна вината за учество во насилствата.

Судот на предлог на СЈО ја раздвои постапката за Лазаров, а пресудата треба да биде изречена на рочиште, закажано за в петок.


Четворицата обвинети го признаа грабежот во НЛБ, но не открија каде се парите


Скопје, 19 октомври, 2017 - 16:08 (META) 

Четворицата обвинети за милионскиот грабеж во НЛБ, на денешното рочиште во Основниот суд Скопје 1 го признале кривичното дело, но не откриле што сториле со украдените пари, соопшти Јавното обвинителство.

„Тие се изјаснија за виновни, односно дека со умисла и во повеќе временски поврзани дејства, искористувајќи ја својата работна позиција и познавање на процесите на работата во банката, противправно присвоиле парични средства во значителен износ од 400.000 швајцарски франци и 375.000 евра. На 10 април 2017 извршиле кражба и на 2 милиони швајцарски франци и 270.000 евра. Иако ги признале во целост наводите од обвинителниот акт, обвинетите не откриле што сториле со украдените парични средства“, стои во соопштението.

По признавањето на вината, судијата закажал рочиште на 27 октомври, на кое ќе бидат изнесени завршните зборови.

За кривичните дела, тешка кражба и затајување, за кое се товарат обвинетите, предвидена е затворска казна од три до 10 години, односно од една до 10 години.

Надлежниот обвинител, кој го води предметот, до судот доставил и обвинителен предлог против други четири лица, кои како одговорни лица во банката „несовесно постапиле во вршењето на своите овластувања и должности“ и со тоа ја овозможиле кражбата на големата сума на пари. Тие се товарат за несовесно работење во службата.

Постапката против овие четири лица продолжува одвоено.


Премиерот Заев доби специјално признание „Европска личност на годината“ во Сараево


Сараево, 6 јули, 2017 - 23:22 (META) 

Премиерот Зоран Заев на бизнис-манифестацијата „Најменаџер и најкомпанија за 2017“ во Сараево доби специјално признание – „Европска личност на годината“ и „Носител на позитивни промени во регионот“, соопшти владината прес-служба.

Признанието на премиерот Заев му се доделува за неговото „ангажирање по прашања од политиката, бизнисот и економијата, развивање и јакнење на пријателски, регионални и меѓународни соработки, како и за создавање услови за унапредување и подобрување на животот кај граѓаните“.

Заев, кој е во еднодневна посета на Босна и Херцеговина, присуствуваше на традиционалниот бизнис-собир во Сараево, кој е во организација на Независната европска агенција, Европско здружение на менаџери и списанието „Еуроменаџер“, во партнерство со надворешно-трговската комора на БИХ. Минатата година тој ја доби наградата за најдобар градоначалник во Југоисточна Европа за 2016 година.

Премиерот Заев денеска имаше средба со претседавачот на Советот на министри на Босна и Херцеговина, Денис Звиздиќ, а вечерва се сретна и со хрватскиот премиер, Андреј Пленковиќ.


Признание „Пријател на Македонија“ за поранешниот хрватски претседател Стипе Месиќ


Шибеник, 1 декември, 2016 - 10:23 (META) 

Граѓанското здружение „Хрватско-македонска тангента“, вечерва, во 19 часот, во Шибеник, на поранешниот хрватски претседател Стипе Месиќ, ќе му го врачи признанието „Пријател на Македонија“.

Во таа пригода Месиќ ќе одржи предавање за македонско-хрватските културни врски, од Штросмаер и Миладиновци до денес.

Поранешните хрватски претседатели Стипе Месиќ и Иво Јосиповиќ, се почесни членови на „Хрватско-македонската тангента“.

Традиционалните годишни признанија ќе им бидат врачени и на новинарите Марина Јурковиќ од весникот „Слободна Далмација“ и на Ксенија Билан од „Шибенски неделник“, како и на Вилијам Лукиќ, директор на шибеничката градска книжарница.


Сите обвинети во случајот „Ќелија“ ја признаа вината


Скопје, 16 мај, 2016 - 11:19 (META) 

На денешното рочиште за случајот „Ќелија“, во Основниот суд Скопје 1, уште петмина обвинети ја признаа вината за кривичните дела за кои се обвинети, односно за регрутирање и за учество во паравоени формации во воените жаришта на Блискиот Исток, пренесува „Телма“. Со ова, практично, сите обвинети во овој случај се изјаснија за виновни.

На претходното рочиште, пред две недели, дел од адвокатите на обвинетите побараа дополнителен увид во доказите за да може да се подготви главната расправа. Тогаш адвокатот Ефто Спировски, кој е бранител на обвинетиот Иса Фуга, рече дека неговиот клиент изразил подготвеност да ја признае вината за едно од делата што му се ставаат на товар, бидејќи не можел да ги истрпи условите во затворот „Скопје“, во Шуто Оризари, каде издржува мерка притвор.

На јавна седница, која се одржа на 11 март, шестмина обвинети во „Ќелија“ ги признаа делата учество во странска војска, полиција, паравоени или параполициски формации, според членот 322-а од Кривичниот законик, кои им се ставаа на товар и се спогодија со Обвинителството за казните. Тие беа осудени на вкупно 32 години затвор.

Како што јавува „Телма“, судот в среда треба да ги изрече казните за петтемина обвинети што денеска се изјаснија за виновни.


Одложен почетокот на судскиот процес за случајот „Ќелија“


Скопје, 27 април, 2016 - 13:51 (META) 

Денешното рочиште од судскиот процес за случајот „Ќелија“, кој се води против пет лица обвинети за регрутирање и за учество во паравоени формации на Блискиот Исток, е одложено откако адвокатот на еден од обвинетите побара дополнителен увид во доказите.

Покрај тоа, како што пренесува „Академик“, адвокатот Ефто Спировски, кој е бранител на обвинетиот Иса Фуга, рекол дека неговиот клиент изразил подготвеност да ја признае вината за едно од делата што му се ставаат на товар, бидејќи не можел да ги истрпи условите во затворот „Скопје“, во Шуто Оризари, каде издржува мерка притвор.

„Јас сум ангажиран да го бранам Иса Фуга преку неговиот татко и иако нашите ставови не се совпаѓаат, јас морам да ја следам желбата на Иса изразена преку неговото семејство. Тие ме информираа дека тој не може да ги истрпи условите во притворот, дека 10 квадратни метри во затворот влијаат тој да стане емотивно лабилна личност, поради што изразил волја да признае едно од делата што му се ставаат на товар“, рекол Спировски.

На ова, судијата Ѓоко Ристов, кој го води процесот, посочил дека не може да се прави преквалификација на делото, ниту да се издвои признанието за вина за само едно дело.

Обвинителот од Обвинителството за организиран криминал и корупција, Владимир Милошевски, при денешното образложение на обвинителниот акт, навел дека доказите обезбедени во истрагата укажуваат дека лицата ги извршиле делата за кои се товарат.

„Кривичните дела се докажани од прибраните материјални докази и од доказите обезбедени преку посебни истражни мерки и преку анализа на средствата за електронска комуникација што ги користеле обвинетите. Од нив се забележува меѓусебна комуникација, но и комуникација со трети лица кои се наоѓаат на воените жаришта и кои се дел од паравоени формации, како и со лица кои дејствувале како поддршка за превоз до воените жаришта и вклучување на лица во воени дејства“, навел Милошевски, додавајќи дека Обвинителството има докази дека обвинетите биле вклучени и во организирање превоз, опремување, обучување или на друг начин помагање на лица кои ќе заминат на воени жаришта.

Во случајот „Ќелија“ обвинети се Иса Фуга, Абдула Абдулахи, Ерол Рустеми, Имери Мухамед и Стефан Стефановски. Тие се товарат за кривичното дело учество во странска војска, полиција, паравоени или параполициски формации, според членот 322-а од Кривичниот законик.

Претходно, шестмина обвинети во случајот склучија спогодба со Обвинителство и беа осудени на вкупно 32 години затвор, откако ги признаа делата за кои се товарат.

Рочиштето за случајот „Ќелија“ е презакажано за 16 мај.


Обвинетите во „Ќелија“ што ја признаа вината, осудени на вкупно 32 години затвор


Скопје, 25 март, 2016 - 13:11 (META) 

Шестмина обвинети во случајот „Ќелија“ се осудени на вкупно 32 години и 6 месеци затвор, откако ја признаа вината за кривичното дело учество во странска војска, полиција, паравоена или параполициска формација, соопшти денеска Основниот суд Скопје 1.

„Обвинителството за гонење организиран криминал и корупција до Советот за оценка на обвинителен акт при Основниот суд Скопје 1, достави предлог-спогодби за шест лица опфатени со обвинителниот акт за случајот познат како „Ќелија“, осомничени за кривичното дело учество во странска војска, полиција, паравоена или параполициска формација од член 322-а од Кривичниот закон. Откако на седницата одржана на 11 март 2016 година осомничените со наведениот обвинителен акт изразија подготвеност да ја признаат вината и да се спогодат со Обвинителството и побараа дополнително време за да ги разгледаат доказите во предметот, што им беше овозможено од Советот за оценка на обвинителен акт, до судот, денеска, беа доставени предлог-спогодбите меѓу обвинителот и осомничените, за кои на јавна седница на советот осомничените се произнесоа дека доброволно, свесни за правните последици и неприсилени од никого, ги признаваат делата што им се ставаат на товар, за што судот донесе пресуда врз основа на предлог-спогодбата“, стои во соопштението на судот.

Највисока казна од седум години затвор судот му одреди на оџата Реџеп Мемиши. Еден од обвинетите што ја признаа вината, доби пет и пол години затвор, додека другите четворица добија затворски казни од пет години секој.

Советот за оцена на обвинителниот акт на судот денеска расправа за обвинението и за приговорите на адвокатите на другите петмина обвинети што не ја признаваат вината за истото кривично дело, односно дека индоктринирале и регрутирале македонски државјани за учество во борбите во воените жаришта на Блискиот Исток.

Акцијата „Ќелија“ беше спроведена од Министерството за внатрешни работи во август минатата година.


Продолжува јавната седница за оценување на обвинителниот акт за случајот „Ќелија“


Скопје, 25 март, 2016 - 10:48 (META) 

Денеска во Кривичниот суд во Скопје продолжува јавната седница за оценување на обвинителниот акт за случајот „Ќелија“.

На првата јавна седница, шест од вкупно 11 осомничени рекоа дека се чувствуваат виновни и побараа во спогодба со јавниот обвинител да им биде определена казната.

Судот му даде рок од две недели на Обвинителството за гонење на организиран криминал да постигне спогодба за признавање на вината со осомничените.

Лицата се обвинети по три основи: за регрутирање лица во странски војски или паравоени формации, за собирање финансиски средства и материјална помош за поддршка на лицата што ќе се приклучат во странска војска или паравоена формација, обезбедување на нивното патување, обука и учество во странската војска и за учество во странска војска.