Дамовски, Илиевски и Арнаудов излегуваат од „Шутка“, Апелација им одреди куќен притвор


Скопје, 21 февруари, 2018 - 13:03 (META) 

Организаторите на протестите на „За заедничка Македонија, Борис Дамовски и Богдан Илиевски и пратеникот Љубен Арнаудов, излегуваат од истражниот затвор „Скопје“, откако Апелацискиот суд Скопје им ги прифатил жалбите и им ја заменил мерката притвор со куќен притвор и да им бидат одземени пасошите, потврдиле за „Телма“ од судот.

Дамовски, Илиевски и Арнаудов се меѓу 35-те осомничени за насилствата во Собранието од 27 април, минатата година.

Покрај нив тројца, Апелација им одредила куќен притвор и одземање на пасошите и на Јане Ченто, Иван Цветановски, кој работел во кабинетот на поранешниот собраниски спикер, Трајко Вељаноски и на Оливер Радулов од УБК.

Во истовреме, Апелацискиот суд одлучила поранешниот министер за внатрешни работи, Митко Чавков да остане во притвор, пратеникот Јохан Тарчуловски во домашен притвор, а отфрлени се жалбите и на Горан Ангеловски, Илија Славевски, Сашо Марковски и Вилијам Михајловски.


АХВ со засилени контроли на увозот на бразилско месо


Скопје, 6 јануари, 2018 - 11:04 (META) 

Агенцијата за храна и ветеринарство (АХВ) информира дека, на бразилската компанија „Сеара алиментос“ (Seara Alimentos LTDA) која извезува месо и во Македонија, и е одземена лиценцата за извоз и е избришана од регистарот на овластени извозници на месо од Бразил.

АХВ информацијата ја добила преку Министерството за надворешни работи, каде што пристигнало известување од дипломатско-конзуларното претставништво на Федерална Република Бразил во Софија, дека на компанијата и е одземена лиценцата за извоз и оти е избришана од регистарот на овластени извозници на месо.

„По минатогодишните случувања и истрагите во месната индустрија во Бразил, АХВ е во постојана комуникација со амбасадата на Македонија во оваа јужноамериканска земја, со која се разменуваат информации за случувањата во месната индустрија, за што се информираат и стопанските комори во земјава. Увозот на месо во Македонија се врши исклучиво од одобрени земји за увоз и од одобрени објекти“ се вели во соопштението на АХВ.

Од таму додаваат дека секоја пратка на увозно месо, задолжително е проследена со ветеринарно-здравствен сертификат со кој се гарантира безбедноста.

„Контролите на граничните премини од инспекциските служби на Агенцијата се засилени со цел спречување на евентуален влез во земјава на пратки со месо од Бразил, кои потекнуваат од објекти кои се забранети за извоз“, се додава во соопштението.


Собранието напладне ќе одлучува за имунитетот на шестeмина пратеници


Скопје, 1 декември, 2017 - 9:34 (META) 

Претседателот на Собранието, Талат Џафери, за дененска напладне ја закажа пленарната седницата на која ќе се одлучува за одземањето на имунитетот на пратениците Крсто Мукоски, Љубен Арнаудов, Јохан Тарчуловски, Сашо Василевски, Љупчо Димовски и Жаклина Пешевска, во врска со барањето на Кривичниот суд за нивно притворање.

Шестемина пратеници се дел од 36-те осомничени за насилствата во Собранието од 27 април оваа година. Нив, Обвинителството за гонење организиран криминал и корупција ги товари за терористичко загрозување на уставниот предок и на безбедноста на државата.

Џафери ја закажа седницата откако вчера Комисијата за деловнички и мандатно-имунитетни прашања едногласно, со пет гласа „за“ и без воздржани или против, го одобри барањето на судот и донесе заклучок да му предложи на Собранието да им се одземе имунитетот на шестемина пратеници.

За одземање на имунитет на пратеник се гласа со просто мнозинство, односно потребни се 61 глас.

Oд пратеничката група на ВМРО-ДПМНЕ реагираа на одлуката на Комисијата, која ја нарекоа „гола желба за политички реваншизам“.

Од опозициската партија велат дека пратеничката група на ВМРО-ДПМНЕ и на Коалицијата за подобра Македонија не сака да дава легитимитет на противуставните одлуки на партиската комисија на СДСМ.

Инаку, според објавените материјали за седницата, од Кривичниот суд до претседателот на Собранието пристигнале две барање за одобрување притвор. Едното барање се однесува на барањето за одборување притвор на пратениците Крсто Мукоски, Љубен Арнаудов и Јохан Тарчуловски и е потпишано од судијката на претходна постапка Весна Димишкова, а другото е за пратениците Сашо Василевски, Љупчо Димовски и Жаклина Пешевска, потпишано од судијата на претходна постапка, Ненад Савески.


Судот досега нема побарано одземање на имунитетот на приведените пратеници


Скопје, 28 ноември, 2017 - 11:30 (META) 

До овој момент во Собранието нема пристигнато барање од Кривичниот суд за одземање на пратеничкиот имунитет на пратениците што се приведени утрово за насилствата во законодавниот дом од 27 април оваа година, изјави за „Мета“, пратеникот Павле Богоевски, претседател на собраниската Комисија за деловнички и мандатно-имунитетни прашања.

– За да заседава и да одлучува Комисијата, треба да пристигне барање од судот. До овој момент од судот нема стигнато такво барање – вели Богоевски.

Инаку, член на оваа комисија е и пратеникот Крсто Муковски, кој е еден од приведените пратеници, заедно со пратеничката Жаклина Пешевска и со пратеникот Љубен Арнаудов, тројцата од редовите на опозициската ВМРО-ДПМНЕ.

Засега нема информации ниту од обвинителството, ниту од судот, дали и какви мерки за обезбедување на присуство побарало Основното јавно обвинителство за гонење организиран криминал и корупција и дали евентуално ќе се бара мерка притвор.

Според членот 64 од Уставот, пратениците во Собранието уживаат имунитет и пратеник не може да биде притворен без одобрување на Собранието, освен ако е затечен во вршење кривично дело за кое е пропишана затворска казна во траење од најмалку пет години. Собранието може да одлучи да се примени имунитет над пратеник и кога тој самиот не се повикал на него, ако е тоа потребно заради вршење на функцијата пратеник.

Неофицијално, упатени извори за „Мета“ велат дека е можно воопшто да не се бара од Собранието да одлучува за имунитетот на пратениците, односно Обвинителството да се повика на тоа дека пратениците се затечени, бидејќи има снимки, во вршење кривично дело за кое е предвидена затворска казна од најмалку пет години.

Обвинителството денеска соопшти дека отворило истражна постапка против 36 лица за насилствата од 27 април, кои се осомничени за терористичко загрозување на уставниот поредок и на безбедноста, кривично дело за кое според Кривичниот законик е предвидена казна затвор од најмалку 10 години.


Донаторите на споменикот на Ќосето ќе останат без просториите во Скопје


Скопје, 31 октомври, 2017 - 12:17 (META) 

Владата на денешната 34. седница, меѓу другото, ќе одлучува и за одземање на просториите во Скопје на Здружението за духовно обединување на Сетинци, Попадинци и Крушоради од Лерин, кое се јавува како донатор на неколку споменици од проектот „Скопје 2014“.

„На дневниот ред на Владата ќе се најде и предлог-одлуката за престанок на трајно користење на недвижност на Здружението за духовно обединување на Сетинци, Попадинци и Крушоради од Лерин во Македонија – Скопје“, стои во соопштението од владината прес-служба за денешната седница.

Според податоците, објавени во „Службен весник“, ова Здружение од претходната влада на трајно користење доби деловни простории, со вкупна површина од 49 квадратни метри, на улицата Вељко Влаховиќ во центарот на Скопје. Покрај просториите, Здружението на трајно користење од претходната влада доби и половно возило „ауди а4“, со проценета вредност од 300.000 денари, односно околу 5.000 евра.

Здружението за духовно обединување на Сетинци, Попадинци и Крушоради од Лерин ги донираше споменикот на генерал Михајло Апостолски, кој е поставен кај клучката „Континентал“, потоа контроверзниот споменик на Андон Лазов Јанев – Ќосето, кај Судска палата, споменикот на Ѓорѓи Сугарев кај комплекост факултети. Донација на Здружението се и спомениците на Никола Петров Русински и на Пере Тошев поставени во близина на Универзитетската библиотека, споменикот на Света Лидија, кој е поставен кај плоштадот Богородица и споменикот Децата бегалци од Егејска Македонија, кај хотелот „Холидеј ин“.

На денешната седница Владата ќе решава и по предлог-одлуката за престанок и за давање на трајно користење на недвижност на Републичко здружение на децата бегалци и нивните потомци од Егејскиот дел на Македонија „Т’га за југ“ од Скопје.


„Тврдокорни“ го прогласија Иванов за „кукавица од претседател“ бидејќи не ги примил


Скопје, 12 октомври, 2017 - 20:21 (META) 

Дваесеттината членови на здружението „Преродба“, Семакедонскиот национален совет „Македониум“ и Македонското патриотско здружение „Тврдокорни“ кои денеска излегоа на протест пред претседателската резиденција, не успеаја да му го предадат барањето на претседателот Ѓорге Иванов за одземање на мандатот на премиерот Зоран Заев.

Претставници на здруженијата пред резиденцијата соопштија дека биле известени од обезбедувањето дека Иванов си заминал.

Гневни поради ова, тие го прогласија Иванов за „кукавица“.

– Овој момент да биде јавно пренесен за да види македонскиот народ каков кукавица од претседател има избрано. Кукавица од претседател кој што не сака да прими претставници на сопствениот народ, не може да има легитимитет – изјави Страшко Олумчев, претседател на Семакедонскиот национален совет „Македониум“.

Тој рече дека протестите ќе продолжат и дека повторно ќе се обидат да му ги достават барањата на Иванов.

Членовите на здруженијата денеска одржаа мирен протестен марш, кој почна пред канцеларијата на Делегацијата на Европската Унија и преку булеварот Мајка Тереза (поранешна Водњанска) продолжи до претседателската резиденција на Водно.

Од иницијативата велат дека со одземањето на мандатот на премиерот Зоран Заев „ќе биде овозможено да се преземат сите неопходни мерки за заштита на уставниот поредок на државата, од сите дејства со кои државата и македонскиот народ се ставаат под директна мирна окупација“.


Трамп ѝ се закани на „Ен-би-си“ со одземање на лиценцата


Вашингтон, 11 октомври, 2017 - 19:19 (META) 

Претседателот на САД, Доналд Трамп, денеска повторно ги нападна медиумите, кои, според него, шират лажни вести и праша дали треба да им бидат одземени дозволите за работа.

„Со сите лажни вести кои доаѓаат од „Ен-би-си“ и од мрежите, кој момент е соодветен да им бидат оспорени лиценците? Лошо за земјата!“, напиша Трамп на „Твитер“.

„Ен-би-си“ претходно денеска пренесе дека Трамп сака за десет пати да го зголеми американскиот нуклеарен арсенал.

Трамп е во судир со повеќе медиуми во САД, а последен во низата е „Ен-би-си“, кој неодамна објави извештај за несогласувања меѓу претседателот на САД и американскиот државен секретар, Рекс Тилерсон.


ВМРО-ДПМНЕ: Барањата од СЈО за притвори и одземање пасоши се политичка пресметка


Скопје, 15 јули, 2017 - 12:47 (META) 

Преку две прес-конференции денеска ВМРО-ДПМНЕ ги оквалификува барањата за притвор од страна на СЈО за раководството на ВМРО-ДПМНЕ се груб политички обид за притисок врз Апелациониот суд за тој да не ги поништи одлуките за одземање на патните исправи донесени во првостепена постапка.

– Одлуките за одземање на патните исправи на дел од раководството на партијата се донесени под притисок. Тоа јасно се гледа по образложенијата, каде нема ниту еден аргумент за одземањето. Токму и првичното барање за притвор е одбиено бидејќи не постои опасност од бегство, односно судот увидел дека се апсурдни, неосновани и политички сомневањата на СЈО. Барањата за мерките на претпазливост и обезбедување присуство од страна на СЈО во однос на раководството на ВМРО-ДПМНЕ се без никаква правна основа, имаат за цел создавање материјал за медиумите на СДС кои треба да го претстават ВМРО-ДПМНЕ во негативно светло кај граѓаните во пресрет на претстојните локални избори – рече Орце Ѓорѓиевски на прес-конференција пред Апелацискиот суд.

На прес-конференција пред СЈО, Мартин Костовски обвини дека СЈО е алатка за политички прогон во рацете на СДСМ против ВМРО-ДПМНЕ и неговите функционери.

– „Таргет“ и „Тврдина“ се едни од случаите преку кои СЈО имаше за цел, целосно да ја изврти вистината и да ги манипулираа граѓаните. СЈО преку овие политички монтирани случаи, сакаше да претстави пред јавноста дека ВМРО-ДПМНЕ од позиција на власт сама себе се прислушувала, што е крајно апсурдно и неточно тврдење. Преку случајот „Тврдина“ СЈО ја лажеше јавноста за наводна милионска штета која била направена при уништување на стара опрема за прислушкување, што е целосна лага и безобразна манипулација. Имено, уништувањето на старата опрема за прислушкување не нанесе никаква штета врз буџетот на државата, бидејќи истата беше неупотреблива, со нула денари пазарна вредност. Уништувањето на опремата е направено со целосно испочитувани законски процедури – рече Костовски и обвини дека „со своето однесување СЈО се стави на листата политички инквизитори на 21 век, и ќе биде запишано во темните страници на правосудната наука“.


СЈО: Од Централен регистар ќе одземаме документација и во наредните денови


Скопје, 24 март, 2016 - 13:46 (META) 

Специјалното јавно обвинителство во синоќешната акција одзело дел, а во наредните денови треба да ја подигне целокупната документација од Централниот регистар, соопшти попладнево СЈО.

Оттаму не откриваат за какви документи и за потребите на кои предмети се одземаат материјалите, но велат дека станува збор за „обемна документација“.

„Во текот на вчерашниот ден (вечерта) воспоставена е соработка со Централниот регистар и доставен е дел од бараната документација. Имајќи предвид дека се работи за голем обем на документација, во деновите што следуваат ќе биде одземена целокупната документација што е наведена во наредбата за одземање предмети, за што благовремено ќе ве информираме. Воедно изразуваме уверување дека добро воспоставената соработка со Централниот регистар ќе продолжи и во иднина“, стои во соопштението од СЈО.

Од кабинетот на специјалната обвинителка информираат дека наредбата за одземање предмети била побарана од судот откако Централниот регистар по предвидениот рок од 30 дена не одговорил на нивното барање околу документите бидејќи им било нејасно.

„Ова јавно обвинителство (СЈО н.з.) постапувајќи по наредба на судија на претходна постапка, во текот на вчерашниот ден пристапи кон одземање предмети – документација од Централниот регистар на Република Македонија. Наредбата е издадена по барање на ова јавно обвинителство, откако Централниот регистар во рок од 30 дена не постапи по нашето барање и единствено нè извести дека барањето било нејасно, иако неколкупати имаше телефонска комуникација со јавни обвинители и истражители во насока на појаснување што сè е предмет на нашето барање“, се појаснува во соопштението од кабинетот на Јанева.

Истражители од Специјалното јавно обвинителство (СЈО) и припадници на единицата „Алфи“ синоќа го чуваа влезот на објектот на Централниот регистар за да не дозволат во текот на ноќта да се изнесат или уништат документи што се предмет на истрага на СЈО.

Од Основниот суд Скопје 1 денеска соопштија дека нема да ја коментираат акцијата на СЈО во Централниот регистар, но велат дека начинот на кој била изведена наликувал на холивудско сценарио.


Кривичен суд: Акцијата на СЈО во Централен регистар како по холивудско сценарио


Скопје, 24 март, 2016 - 12:52 (META) 

Судија на претходна постапка од Основниот суд Скопје 1 вчера на барање на Специјалното јавно обвинителство издал наредба за одземање документација од Централниот регистар, соопшти денеска Основниот суд. Оттаму додаваат дека од СЈО не била побарана наредба за претрес.

Во соопштението се наведува дека конкретниот случај покажува дека судот „соработува и има позитивен пристап кон работата на СЈО, наспроти јавно пласираните информации дека ова обвинителство се соочува со најголем отпор токму со овој суд, како што самите наведуваат во нивниот извештај“.

Од судот велат дека нема да ја коментираат акцијата на СЈО во Централниот регистар, но начинот на кој била изведена ја споредуваат со холивудско сценарио.

„Основниот суд Скопје 1 нема да ја коментира вчерашната акција на СЈО и нивните оперативно-тактички мерки на стапица и на заседа на институциите, повикувајќи се на судски наредби и на анонимни дојави кои повеќе наликуваат на холивудско сценарио, а не на сериозно и на посветено извршување на функцијата на еден орган како што е СЈО“, стои во соопштението на судот.