Граѓаните од дома ќе можат да ја следат постапката за откуп на дворно место


Скопје, 11 јануари, 2019 - 12:31 (META) 

Од второто тримесечје годинава, граѓаните ќе можат да си го следат својот предмет за приватизација на градежното место од дома. Ова беше истакнато на денешната работна средба на министерот за финансии, Драган Тевдовски со директорката на Управата за имотно правни работи, Шасине Касами.

„До крајот на март, планирано е сите предмети за приватизација на градежно земјиште да бидат внесени во системот по што ќе биде развиена дополнителна можност за пристап во системот на самите поднeсители на барања, кои во секој момент ќе имаат увид во статусот на нивното поднесено барање“, се вели во соопштението на Министерство за финансии.

Годинава, ќе се менува и Законот за приватизација на градежното земјиште со цел упростување и прецизирање на постапките. Воедно се работи и на измени со цел забрзување на постапката за решавање на предметите кои се однесуваат на колективните станбени згради.


Од денеска вишокот пари наместо во банка може да се инвестира и во државни обврзници


Скопје, 8 јануари, 2019 - 14:15 (META) 

Граѓаните и деловните субјекти во иднина ќе треба добро да размислат пред да одлучат дали своите заштеди ќе ги пласираат како депозити во домашните банки или пак ќе се решат да инвестираат во државни обврзници.

Почнувајќи од денеска на официјалниот пазар на Македонската берза на хартии од вредност започна тргувањето со 132 емисии на државни обврзници, со вкупна номинална вредност од 54.184.070.000 денари или 881 милион евра.

Обврзниците се издадени во денари, со годишна исплата на камата, додека главнината се исплаќа на денот на достасувањето. Каматните стапки се движат во распон од  0,9 отсто за рок на достасување од 12 месеци до 5,3 отсто за рок на достасување од 30 години. Во вкупно издадените обврзници има 74 петнаесетгодишни, а само три се со рок на достасување од триесет години.

Со оглед на тоа што обврзниците се државни хартии од вредност кои се безризични финансиски инструменти кои во име на Владата ги издава Министерството за финансии, а за да се обезбедат пари од јавноста за финансирање на буџетските потреби се поставува дилемата дали е можно државата преку обврзниците да им стане конкурент на банките.

Според најновите податоци на Народната банка, каматната стапка на вкупните депозити кај банките примени од домаќинствата, во ноември, минатата година се сведе на 1,38 отсто и забележа минимален месечен пад од 0,01 процентен поен (п.п). Гледано на годишна основа, каматната стапка на вкупните депозити од домаќинствата бележи пад од 0,09 п.п.

Каматната стапка на вкупните депозити на корпоративниот сектор, во ноември, бележи месечно зголемување од 0,05 процетни поени и изнесува 1,74 отсто.

На годишна основа, каматната стапка на вкупните депозити на корпоративниот сектор е намалена за 0,17 процетни поени.

Трендот на намалување на годишната камата на депозитите може само да придонесе во иднина дел од депозитите од банкарскиот сектор да се преселат во „штедење во обврзници“ кај кои каматната стапка во некои случаи и сега е повисока отколку кај банките.


На расправата во Собранието, прифатени осум амандмани на предлог-законот за личен доход


Скопје, 11 декември, 2018 - 14:50 (META) 

Владата го прифати барањето на повеќе од 80 граѓански организации надоместоците на трошоци за настани од здруженија на граѓани да не се даночат, без разлика колку ќе траат. Зголемен е и износот за платената пракса кој е ослободен од оданочување, со намера да се стимулираат повисоки надоместоци за пракса. Се воведува даночно ослободување за патните трошоци за образовни активности во странство.

Ова се дел од усвоените амандмани на Законот за личен доход, на денешната Комисија за финансирање и буџет во Собранието.

„Младинските организации побараа и во законот појасно да се дефинира стипендијата која е ослободена од даночење, односно да се појасни дека не се плаќа данок и на надоместоците за школарина, превоз и исхрана, што исто така беше прифатено.Беа прифатени и четири други амандмани кои се однесуваат на подобрувања и појаснувања на текстот на Законот. Од вкупно 22 поднесени амандмани, беа прифатени осум. Прифатени беа амандмани од граѓанските организации, Стопанската комора на Македонија, Организацијата на работодавачи на Македонија и од Занаетчиската комора“, информираат од Министерство за финансии.

Министерот за финансии, Драган Тевдовски денеска на Комисијата за финансирање и буџет рече дека во насока на обезбедување на поголема праведност во оданочувањето на доходот на граѓаните се предлага воведување на праведен прогресивен данок.

-Со законот, а во насока на воспоставување на поправеден систем на оданочување на доходот на граѓаните, се предлага воведување на прогресивно оданочување на доходот од  работа, доходот од авторски права, доходот од самостојна дејност и доходот од продажба на сопствени земјоделски производи – рече Тевдовски.

Конкретно, покрај даночната стапка од 10 отсто се предлага воведување на стапка од 18 проценти која ќе се однесува на даночната основа која надминува 1.080.000 денари на годишно ниво, односно 90.000  денари месечно. За даночната основа до 90.000 денари месечно, односно 1.080.000 денари годишно, останува примената на даночната стапка останува 10 проценти.


Изградбата и реновирањето на училиштата е во надлежност на МОН, вели Елези


Скопје, 3 декември, 2018 - 10:12 (META) 

Во врска со училиштата во кои недостасува простор, и некои други каде што е потребно вработување нови наставници, од Министерството за финансии прстот го насочуваат кон Министерството за образование и наука и велат дека ова министерство во својот буџет мора да испланира средства за инвестиции во училиштата, известува Порталб.мк.

Заменик-министерката за финансии Ширете Елези вели дека училиштата и општините со комплетирана документација треба да конкурираат со своите проекти во МОН и тој сектор треба да распредели пари од буџетот врз основа на потребата за реновирање и изградба на основни и средни училишта во земјата.

– Се одобрува буџет за реконструкции и инвестиции во училиштата и Министерството за образование и наука треба да ги распредели потребните средства за работи како што е реконструкцијата на основните, средните училишта, изградбата на нови училишта и т.н. Ние го распределуваме буџетот што е определен за МОН, а тие се одговорни за планот и програмата. Потоа, општините конкурираат во МОН со различни проекти, се разбира со комплетирана документација, со детална и проектна дозвола итн. А потоа започнува реализацијата. Ова е целосно децентрализирано на ниво на МОН, кое треба да ги обезбеди средствата – изјави Елези.

Што се однесува до процедурата за вработување, Елези додаде дека одобрението се издава од Министерството за финансии.

– Бидејќи се работи за нови вработувања, тоа има фискална импликација и сите се обраќаат до Министерството за финансии, при што ние вршиме проверка на рамките на дотациите и ги одобруваме истите – објаснува Елези.

Инаку, основните училишта „Петар Здравковски – Пенко“ и „Исмаил Ќемали“ се соочуваат со недостиг на простор, така што во едното училиште речиси сите паралели го надминуваат максималниот број дозволен со закон, додека во другото, учениците од прво одделение учат во просториите на една градина.

Од МОН за училиштето „Исмаил Ќемали“, рекоа дека се информирани, но не прецизираа кога тоа ќе се реши проблемот, а што се однесува до училиштето „Петар Здравковски – Пенко“, рекоа дека барањето за проширување на сегашниот објект сè уште не е поднесено во овој оддел од општината Бутел, под чија надлежност спаѓа ова училиште.

Инаку, согласно законот на Министерството за образование и наука, минималниот број ученици во еден клас е 24, а максималниот 34, но паралелки може да се формираат и со помал број ученици доколку се исполнат условите.


Министерството за финансии даде согласност за нова паралелка во ОУ „Имри Елези“”


Скопје, 26 ноември, 2018 - 9:59 (META) 

По веста објавена за преоптовареноста со ученици во основното училиште „Имри Елези“ во скопската населба Дижонска, каде во три паралелки од прво одделение учат 108 ученици, со што се прекршува законот за образование, Министерството за финансии извести дека е дадена согласност за отворање нова паралелка и решавање на овој проблем.

Заменик-министерката за финансии, Ширете Елези, за „Порталб.мк изјави дека барањето на Министерството за образование и наука е прифатено и е дадена согласност за вработување на еден наставник во ова училиште.

– Според редовната процедура, општината бара од Министерството за образование и наука (МОН) вработување на наставник, а овој сектор прави анализа дали барањето е издржано и дали ги исполнува условите за да се реализира, како што беше случајот со основното училиште „Имри Елези“, бидејќи имам слушнато дека таму има многу ученици, и барањето беше проследено до Министерството за финансии, а ние го одобривме и издадовме согласност да се изврши вработување и отворање нова паралелка – изјави Елези.

Таа додаде дека сега процедурите продолжуваат во МОН, општината и самото училиште.

– Сега процедурите ги продолжува МОН, што значи дека ќе прати одговор до Град Скопје, а од таму во општина Чаир, бидејќи таму се наоѓа на училиштето, а потоа во училиштето, за да се направи избор на наставникот – додаде Елези.

Инаку, во Имри Елези“ оваа година се запишани 108 првооделенци поделени во три паралелки, и во сите три беше надминат максималниот број од 34 ученици во една паралелка, со што беше прекршен законот за образование, и за ситуација беа запознаени и во МОН.


МОН знае за состојбата во „Имри Елези“, барањето е испратено во Финансии


Скопје, 19 ноември, 2018 - 15:50 (META) 

Министерството за образование и наука (МОН) потврдува дека знае за моменталната состојба со прекршувањето на законите во врска со првоодделенците во основното училиште „Имри Елези“ во општина Чаир и вели дека се во очекување на позитивен одговор од страна на Министерството за финансии.

Во ова училиште во населбата Дижонска годинава се запишани 108 првоодделенци, кои се поделени во три паралелки, и сите три го надминуваат максималниот број од 34 ученици во една паралелка. Вработувањето на еден наставник за нова паралелка ќе ја чини државата приближно 250.000 денари или околу 4.000 евра годишно, пишува „Порталб“.

– По анализите што се направени во МОН во врска со барањето за финансирање на ново работно место за одделенски наставник во Општинското основно училиште ,Имри Елези’ во Чаир, МОН барањето го препрати до Министерството за финансии, од каде се надеваме да добиеме согласност за финансирање нова паралелка во ова училиште, во што пократок временски период – вели Лаура Папранику од МОН.

На прашањето на „Порталб“ како ќе се постапи доколку Министерството за финансии не одобри ново вработување на наставник, од МОН без јасен одговор.

Ако не се добие согласноста, која во случајот со училиштето „Имри Елези“, како МОН мислиме дека Министерството за финансии треба да ја даде, училиштето во соработка со општината под која што спаѓа, дејствуваат врз основа на предусловите предвидени со закон. Финансирањето на паралелката значи финансирање на работното место за наставникот  – додава Папранику, без да прецизира  што се подразбира со „врз основа на предусловите предвидени со закон“.

Директорката на училиштето, Мерита Коџаџику,  вели дека во текот на оваа година бројот на запишани ученици бил поголем од претходните години и така се надминал законски дозволениот број.

-Во овој момент запишани се 108 ученици во прво одделение, коишто се поделени во три паралелки, кои го надминуваат бројот утврден со законот за образование. Така, за да се реши овој проблем треба да се отвори уште една паралелка за прво одделение, која е повеќе од потребна – вели Коџаџику.

Родителите бараат повеќе да не се одолговлекува решавањето на проблемот, бидејќи се работи за нивните деца и условите во кои тие ќе ја следат наставата понатаму.

Според Законот за Министерството за образование и наука, минималниот број ученици во една паралелка е 24, а максималниот 34, но паралелка може да се формира и со помал број, ако се исполнат условите.


Јавна консултација за предлог-буџетот за 2019 година, пред да влезе во владина процедура


Скопје, 12 ноември, 2018 - 9:39 (META) 

Денеска во просториите на Министерство за финансии, во 12 часот, ќе се одржи јавна консултација за предлог-буџетот за 2019 година.

„На истата ќе бидат презентирани главните контури на буџетот за 2019 година пред истиот да влезе во владина процедура“, се вели во соопштението на Министерство за финансии.

Собранието вчера го усвои ребаланост на буџетот за 2018 година, со кој, повеќе пари се предвидени за општините.


На 2.000 евра приход – 240 евра вкупен данок


Скопје, 11 ноември, 2018 - 10:30 (META) 

Не стивнуваат реакциите од бизнис-секторот, но и од граѓаните кои имаат поголеми месечни приходи по најавата на Владата дека од 1 јануари 2019 стапува на сила нов закон за данок на личен доход со кој се укинува рамниот данок и се воведува прогресивно оданочување. Даночните промени предизвикаа и повеќе дилеми околу износот и начинот на плаќање на даноците за личен доход.

Според новата регулатива, доколку даночната основа на поединечна исплата по некој од основите кој се даночи со прогресивни стапки го надминува прагот од 1.500 евра, за делот над 1.500 евра ќе се плати данок по повисоката стапка од 18 отсто уште во моментот на исплатата. На пример, доколку се исплаќа надоместок по основ на договор за дело од 2.000 евра , исплатувачот ќе треба да плати вкупен данок од 240 евра (10 отсто односно 150 евра за делот што е до 90.000 денари и 18 отсто односно 90 евра за делот што го надминува прагот од 90.000 денари).

На крајот на годината, со годишната даночна пријава ќе се врши пребивање помеѓу вкупниот доход што го остварило едно лице и вкупниот данок што бил платен, и доколку постои разлика помеѓу платениот данок и данокот што треба да се плати за остварениот доход, на лицето ќе му се врати повеќе платениот данок, или пак лицето ќе треба да доплати.

Од Министерството за финансии тврдат дека директно зголемување на даноците ќе има само за 38.000 лица, а кај 453.000 лица ќе има намалување на ефективната даночна стапка.


 За приход од 100.000 денари ќе се плаќа данок од 10.800 денари


Скопје, 6 ноември, 2018 - 12:03 (META) 

Не стивнуваат реакциите од бизнис-секторот, но и од граѓаните кои имаат поголеми месечни приходи по најавата на Владата дека од 1 јануари 2019 стапува на сила нов закон за данок на личен доход со кој се укинува рамниот данок и се воведува прогресивно оданочување. Даночните промени предизвикаа и повеќе дилеми околу износот и начинот на плаќање на даноците за личен доход.

Според новата регулатива, доколку даночната основа на поединечна исплата по некој од основите кој се даночи со прогресивни стапки го надминува прагот од 90.000 денари, за делот над 90.000 ќе се плати данок по повисоката стапка од 18 отсто уште во моментот на исплатата. На пример, доколку се исплаќа надоместок по основ на договор за дело од 100.000 денари, исплатувачот ќе треба да плати вкупен данок од 10.800 денари (10 отсто односно 9.000 денари за делот што е до 90.000 денари и 18 отсто односно 1.800 денари за делот што го надминува прагот од 90.000 денари).

На крајот на годината, со годишната даночна пријава ќе се врши пребивање помеѓу вкупниот доход што го остварило едно лице и вкупниот данок што бил платен, и доколку постои разлика помеѓу платениот данок и данокот што треба да се плати за остварениот доход, на лицето ќе му се врати повеќе платениот данок, или пак лицето ќе треба да доплати.

На пример, доколку на лицето од горниот пример тие 100.000 денари му се единствениот доход во годината, на него ќе му бидат вратени 800 денари, затоа што 100.000 денари на годишно ниво е под годишниот праг од 1.080.000 денари за повисоката стапка од 18 отсто.

„За да можат граѓаните навремено и прецизно да следат колку доход имаат остварено во текот на годината, колку данок имаат платено, колку данок треба да доплатат или да им се врати, а со тоа и соодветно да си планираат, ќе се изработи онлајн сервис преку кој граѓаните во кое било време ќе можат да ги добијат сите овие информации, и преку кој ќе можат предвреме да доплатат даночен долг“, информираа од Министерството за финансии.

Најавата на Владата ги фати неподготвени работодавачите и работниците со оглед на тоа што промената се најавува само два месеци пред да стапи на сила и на крајот на годината кога компаниите веќе ги имаат подготвено финансиските планови за 2019 година. Речиси сите стопански комори реагираа, а некои од нив побараа одложување на примената на прогресивниот данок за пет години. Реагираа и вработените во компаниите од софтвреската индустрија со образложение дека тие не се најбогатиот слој граѓани за кои власта тврди дека е наменета новата даночна реформа.

Од друга страна, од Министерството за финансии тврдат дека директно зголемување на даноците ќе има само за 38.000 лица, а кај 453.000 лица ќе има намалување на ефектвната даночна стапка.

„За најголем дел од популацијата новата ефективна даночна стапка е пониска од моменталната, додека позначајно зголемување има единствено кај најдоходовните 1 отсто. За најдоходовните 1 отсто од населението, зголемувањето на ефективната даночна стапка изнесува 4 процентни поени, додека за групата под тоа, зголемувањето е 0,6 процентни поени“, соопшти Министерството за финансии.


Прогресивниот данок може да предизвика одлив на мозоци и компании


Скопје, 5 ноември, 2018 - 10:58 (META) 

Владата не ги послуша апелите на компаниите кои се занимаваат со информациско-комуникациски технологии и иновации и најави дека од 1 јануари 2019 година ќе има прогресивно оданочување од 18 отсто за примањата на лицата кои имаат месечен личен доход над 90.000 денари. Според менаџерите на компаниите од овој секторот, воведувањето на прогресивното оданочување ќе ја намали продуктивноста, ќе ја зголеми невработеноста и сивата економија и ќе доведе до одлив на мозоци од земјава.

Истото го кажуваат и вработените.

Александар Галовски, вработен како инженер во „Нетсетера“, една од најстарите компании во Македонија од секторот информациско-комуникациски технологии вели дека прогресивниот данок дополнително ќе придонесе за одлив на младите квалификувани програмери и софтверски дизајнери во земји со поповолни даночни услови.

-Поради лошата економска средина, младите луѓе од овој сектор и досега ја напуштаа земјава, а оние што се тука секојдневно бараат начин како да ја напуштат. Иако земаат повисоки плати од вработените во повеќето останати сектори, овие луѓе не спаѓаат во богатиот слој граѓани, како што се тврди при воведувањето на оваа даночна реформа, туку имаат доволно пари за колку-толку нормален живот – вели Галовски.

Тој додава дека новиот данок ќе поттикне и развој на сивата економија.

-Младите што ќе останат во земјава, а работат за компании, односно на „тезги“ од странство, сега ќе бараат начин да си го наплатат трудот преку сервиси за брз трансфер на пари или другу механизми. Тоа значи дека државата повеќе има да изгуби, отколку да добие од воведувањето на прогресивното оданочување – вели Галовски.

Според него, даночната реформа може да придонесе и странските компании од овој сектор што сега имаат свои претставништва во Македонија да се преселат во земји од соседството, каде што се нудат и посебни поволности за оваа дејност.

Уште при првичната најава за воведување на прогресивно оданочување, до Министерството за финансии реагираа Американската стопанска комора во Македонија, Македонија 2025 и Стопанската комора за информатички и комуникациски технологии – МАСИТ, во кои членуваат над 200 компании.

„Доколку се пенализираат оние делови од населението кои напорно работат кон напредување и повисоки приходи, а се наградуваат оние кои не се трудат, ќе се намали продуктивноста. Во Република Македонија се исплаќа бруто-плата и не постои механизам  што ќе ги обврзе компаниите да ја зголемат бруто-платата за нето-платата да остане иста по зголемување на придонесите. Многу е веројатно зголемениот даночен товар да падне врз грбот на вработените, наместо на работодавачите. Тоа ќе доведе до одлив на квалификуваните кадри во земји со поповолна даночна клима. Овие кадри се исто така и најголемите потрошувачи и со нивното заминување ќе се намали економскиот пораст“, укажуваат од трите асоцијации.

Според нив, мерката ќе доведе до дестимулирање на развојот на висококвалификувани кадри, со оглед на тоа што најмногу ќе ги погоди оние кои вложувале во сопствениот професионален развој и ќе испрати порака дека квалификуваноста е неисплатлива, со што ќе се отстрани стимулот за развој на способности и квалификации.

Од спротивната страна, пресметките што ги претстави Министерството за финансии покажуваат дека од воведувањето на таканаречениот праведен данок околу 453.000 лица ќе имаат намалување на ефективната даночна стапка, додека само 38.000 лица ќе имаат зголемување.

„Евидентно е дека за најголем дел од популацијата новата ефективна даночна стапка е пониска од моменталната, додека позначајно зголемување има единствено кај најдоходовните 1 отсто. За најдоходовните 1 отсто од населението, зголемувањето на ефективната даночна стапка изнесува 4 процентни поени, додека за групата под тоа, зголемувањето е 0,6 процентни поени“, објаснуваат од Министерството.

Сепак, ако се земе предвид дека меѓу овие лица доминираат млади луѓе – програмери, инженери и други квалификувани технички кадри, кои во иднина би требало да бидат мотор на македонската економија останува впечатокот дека со нивно заминување во земји со поповолни даночни услови, што и сега се случува, нашата земја на долг рок може повеќе да загуби отколку да добие од новите даноци, од кои според математиката на Министерството за финансии буџетот ќе се дополни за само 25 милиони евра на годишно ниво.