Стартуваше вториот јавен повик за субвенционирање печки на пелети


Скопје, 26 ноември, 2018 - 14:55 (META) 

Министерот за економија Крешник Бектеши на прес конференција соопшти дека од денеска стартува вториот јавен повик за надомест на дел од трошоците за купување на печки на пелети, со кои домаќинствата  ќе ги заменат старите печки на јаглен, дрва, нафта или мазут.

Парите, седум милиони денари (речиси 114.000 евра), се обезбедени со ребалансот на државниот буџет.

– Со ова ќе придонесеме за подигање на јавната свест, за заштеди на енергијата која е скап ресурс и за заштита на животната средина, чија загаденост во есенско-зимската сезона во последниве години создава големи потешкотии. Оваа мерка е и во согласност со владиниот План за чист воздух – рече Бектеши.

Право на учество на овој оглас имаат купувачите кои имаат купено печки на пелети во своите домови во периодот од 1 септември до 12 декември 2018 година и кои ќе поднесат барање за искористување на правото на надоместок.  Министерството за економија на оние кои ќе ги исполнат условите од огласот ќе им обезбеди поврат на средства во висина од 50 отсто, но не повеќе од 500 евра во денарска противвредност, сѐ до искористување на предвидените средства.

Услов е купувачите досега да не користеле средства од државниот буџет за купување печки на пелети во својот дом.

Според проекциите на Министерството за економија, доколку сите апликанти што ќе ги исполнат условите добијат максимален износ на субвенцијата, со оваа мерка ќе се субвенционираат околу 220-230 домаќинства.
Во првиот јавен повик субвенции добиле 453 домаќинства.

Бектеши посочи дека средства за промоција на обновливи извори на енергија и поттикнување на енергетска ефикасност се предвидени и во новиот буџет за 2019 година, а со новата програма на мерки треба да се стартува во почетокот на идната година.


Уставниот суд најави поништување и на гевгелискиот референдум против рудниците


Скопје, 9 ноември, 2018 - 16:06 (META) 

Уставниот суд на седницата одржана на 31 октомври донесе одлука за поведување на постапка за поништување на одлуката на Советот на општина Гевгелија за распишување на референдум за рудниците на Кожуф, информираат за „Мета“ од Уставниот суд, појаснувајќи дека одлуката допрва треба да биде објавена на официјалната веб-страница на Судот.

Оттаму напоменуваат дека во најскоро време ќе се одлучува по овој предмет и, судејќи според искуството со претходни предмети кои се однесуваат на одлуки на локалната самоуправа за отворање на рудници на нивна територија, и оваа одлука ќе биде поништена.

„Постапката е поведена на барање на подносителот ДПТС „Резервоар минералс Македонија“ ДООЕЛ Скопје кој доставил иницијатива за поведување постапка за оценување на уставноста и законитоста на Одлуката за распишување на референдум на локално ниво, донесена од Советот на општина Гевгелија“, вели портпаролката на Уставниот суд, Оливера Филиповска.

Образложението на иницијативата на „Резервоар минералс“ меѓу другото е дека, „минералните суровини како природно богатство претставуваат добра од општ интерес на републиката, без оглед на сопственоста на земјиштето, за нив одлучуваат органите на државната власт, а не органите на локалната самоуправа“.

На референдумот во Гевгелија, кој беше одржан на 23 април 2017 година мнозинството граѓани на Гевгелија се изјаснија против отворање на рудници на територија на општината, по што Советот на општина Гевгелија даде негативно мислење на барањето на „Резервоар минералс“  за продолжување на коцесионерскиот договор за истражување на металични минерални суровини на Кожуф.

„Резервоар минералс“, имаше концесија за детални геолошки истражувања на локалитетот Конско, но по референдумот тогашната Влада не им го продолжи концесискиот договор.

Уставниот суд, со истото образложение на 2 мај ја поништи и одлуката за распишување на референдум на Општина Валандово против рудникот Казандол.

Тогаш од Уставниот суд образложија дека одлуките за референдум се неуставни и незаконити, бидејќи прашањето на концесии не е од локално значење за да може локалната самоуправа да распишува референдум.

Министерот за економија, Крешник Бектеши во август годинава писмено ги информираше градоначалниците од општините во Југоисточна Македонија, каде се планира отворање на десетина нови рудници на метали дека „во законот за минерални суровини како и во законот за концесии и јавно приватно партнерство нема основ за едностран раскин на договорот за концесија од страна на концедентот односно Владата поради реализиран референдум или пак граѓанска иницијатива против започнувањето со експлоатација на веќе доделени концесии за експлоатација на минерални суровини“.

„Уставниот суд се стави на страна на оние кои планираат од Македонија да направат пустелија, да направат геноцид на над 500.000 граѓани“, обвинува активистот на „Спас за Гевгелија“, Ангел Наков.

За утре од 11.30 до 13 часот е планирана прва од најавените блокади на приодните патишта кон и од Струмица, во организација на еколошките здруженија од струмичкиот крај, кои се борат против отворање на рудникот за бакар и злато Иловица.


УСАИД и Владата потпишаа меморандуми за енергетските реформи


Скопје, 15 октомври, 2018 - 17:11 (META) 

Со новите меморандуми потпишани денеска меѓу Владата, Министерството за економија и Меѓународната агенција на САД за развој (УСАИД), како и помеѓу Регулаторната комисија за енергетика (РКЕ) и УСАИД, за „Проектот за развој на регионални енергетски пазари – поддршка на реформите во секторот енергетика“, ќе се овозможи подобра иднина на енергетскиот сектор во Македонија, порача вицепремиерот за економски прашања, Кочо Анѓушев.

–  Со техничка помош од УСАИД беше создаден текстот на Законот за енергетика изгласан во мај, а оваа поддршка продолжува и преку креирање на преку 80 подзаконски акти кои произлегуваат од Законот и кои се неопходни за целосна имплементација на овој Закон. Сите засегнати страни напорно работат во создавање на подзаконските акти и истите ќе бидат завршени во предвидената динамика, со што ќе се обезбеди заштита на потрошувачите и ќе се овозможи развојот на обновливите извори на енергија – потенцираше Анѓушев.

Амбасадорот на САД, Џес Бејли, истакна дека транспарентните услови и конкурентните енергетски пазари се витални за домаќинствата и развојот на индустријата и економијата.

– Сигурното снабдување со енергенси е возможно преку користење на микс на енергетски извори како што се ветер, соларна енергија, природен гас и фосилни горива. Преку реализација на овој проект, во кој соработуваат Владата, Министерството за економија, Регулаторната комисија за енергетика и УСАИД, ќе се озвозможи разновидно  и конкурентно енергетско портфолио на Македонија, а воедно ќе се овозожи усогласување на националното енергетско законодавство со енергетските регулативи и директиви на Европската Унија – рече Бејли.


Македонија и Албанија потпишаа договор за соработка во гасификацијата


Тирана, 21 септември, 2018 - 12:01 (META) 

Македонски енергетски ресурси АД Скопје и АЛБГАЗ од Тирана потпишаа Меморандумот за разбирање за воспоставување и развивање на деловна соработка за развој на преносните мрежи на природен гас во двете земји.

На потпишувањето на меморандумот присуствуваа министерот за економија Крешник Бектеши и албанскиот министер за енергетика Дамјан Ѓикнури.

– Денешниот Меморандум е чекор напред за развој на билатерално стратешко партнерство во секторот за природен гас, како продолжение на веќе потпишаниот Меморандум за соработка во областа на енергетиката, меѓу Министерството за економија на Македонија и Министерството за енергетика на Албанија – истакна Бектеши.

Тој потсети дека и двете земји, како потписнички и на Договорот за основање на ЕЗ, покрај усогласување на националните законодавства со европското,  се стремат да ги постигнат трите утврдени цели на енергетската политика на Унијата, а тоа се безбедноста, одржливоста и конкурентноста, притоа обезбедувајќи слободно движење на енергијата, без технички или регулаторни бариери.

– Радува фактот што изградбата на проектот ТАП на албанска територија е во завршна фаза. Соработката во областа на природниот гас, верификувана денеска од страна на првите луѓе на МЕР и АЛБГАЗ, Бајрам Реџепи и Арбр Аврами, како стратешко партнерство меѓу двете компании, ќе овозможи обезбедување на сигурност и диверзификација на снабдувањето со природен гас. Со ова ќе биде промовирана гасификацијата, испораката на дополнителни количини на природен гас помеѓу двете земји, но и поттикнување на инфраструктурните инвестиции во енергетскиот сектор, како и исполнување на обврските што произлегуваат од Регионалната иницијатива за централно и југоисточно европско поврзување со гас – рече Бектеши по потпишувањето.

Според Бектеши, Македонија и Албанија како две соседни земји кои сакаат да се интегрираат во европските структури, имајќи го предвид Берлинскиот процес, се повеќе од заинтересирани во најкус можен рок да се конкретизираат започнатите проекти, што ќе придонесе до уште  позајакната енергетска и економска соработка, имајќи предвид дека само со добра регионална интеграција ќе се обезбеди побрза интеграција во европското семејство.


Бектеши: Македонија ќе воспостави заедничка царинска контрола и со Албанија


Скопје, 4 септември, 2018 - 13:38 (META) 

Министерот за економија Крешник Бектеши денеска изјави дека Македонија ќе воспостави „one stop shop“ за заедничка гранична контрола и со Албанија, а целта според него е зголемување на трговската соработка помеѓу двете земји.

– Македонија е целосно посветена на зголемување на соработката со државите од регионот, на основање заедничка економска зона, со што ќе се зголеми конкурентноста на нашите компании –  изјави Бектеши пред почетокот на јавната расправа во Стопанската комора на Македонија за придобивките на македонската економија од членството во НАТО и ЕУ.

Тој додаде дека целта на овој проект е олеснување на слободната трговија за стоки, подобрување на заедничкото управување со ризик, и што е можно поголема трговска размена помеѓу двете земји.

Воведувањето на заеднички царински конктроли, помеѓу Македонија и Албанија како потписнички на Меѓународната конвенција за поедноставување и хармонизација на царинските постапки, е дел и од акцискиот план за создавање на регионална економска област на Западен Балкан, усвоен во текот на Самитот на ЕУ со земјите на Западен Балкан оддржан во Трст 2017 година.


Бектеши: Еден милион туристи ќе ја посетат Македонија, предвреме ќе ја оствариме целта


Скопје, 14 август, 2018 - 14:02 (META) 

Според последните податоци  што вчера ги објави Државниот завод за статистика, зголемувањето на бројот на туристи продолжува во континуитет, па наместо до 2020 година, како што прогнозиравме, ние сме на прагот предвреме да ја оствариме зацртаната цел, годинава да оствариме еден милион туристи со три милиони ноќевања, изјави денеска министерот за економија, Крешник Бектеши.

Според Бектеши, учеството на туризмот во домашниот бруто-производ (БДП) се очекува да биде околу три проценти, имајќи предвид што проекцијата до 2020 година е тоа да биде четири проценти. Овој континуиран пораст на бројот на туристи, ќе значи и поголем девизен прилив.

– Ова е знак дека се движиме во вистинска насока, а политиките се одлично поставени. Влезот на Македонија во НАТО ќе значи и отстранување на последната бариера што често пати е споменувана од странските туристи кои ја заобиколувале нашата земја, а тоа е прашањето околу поголема сигурност и безбедност. Но, тоа ќе значи и засилени инвестиции во туристичката инфраструктура, што секако ќе придонесе за развој на туристичкиот сектор – потенцираше Бектеши.


Бектеши: Косово целосно ја повлече одлуката за зголемени царини


Скопје, 31 јули, 2018 - 16:37 (META) 

Косовската Влада во целост ја укина одлуката за зголемени царини, соопшти денеска министерот за економија Крешник Бектеши.Тој додаде дека одлуката треба да се спроведе од утре, откако претходно косовските власти ќе испратат официјално писмо до нивните царински служби.

– На владината седница на косовската Влада, биле земени предвид аргументите што беа изнесени од македонската страна на петочната средба во Приштина – рече Бектеши.

Тој потсети дека по писмената реакција и по најавата за состанокот во Белград следеше измена во Одлуката од косовска страна, со која што мерката остана да важи за седум производи, и тоа домати, пиперки, јаболка, грозје, круши, сливи и малини.

– Оваа одлука не ни одговараше нам, т.е. на нашите земјоделски производители, бидејќи станува збор за сезонски производи и на нив отпаѓа најголем дел од македонскиот извоз на косовскиот пазар. Токму тоа му го предочив на министерот Хасани, истакнувајќи ги загубите на бизнис заедницата, кои се на двете страни огромни.  Посебно ми е драго што наидов на разбирање од косовската страна и што, нашата средба вроди со плод, па како што ми беше ветено, на првата седница на Влада нашите аргументи беа презентирани и земени предвид – рече Бектеши.

Министерството за земјоделство шумарство и водостопанство треба да направи проценка за штетите, по што Владата треба да помогне на трговците што претрпеа загуби.

Бектеши јавно се заблагодари за одлуката косовската влада и како што истакна целта е да се обезбеди поголем пазар, не само за македонските, туку за сите компании во регионот.


Бектеши: За најскоро време очекуваме взаемно прифатливо решение со Косово


Приштина, 27 јули, 2018 - 16:42 (META) 

По средбата помеѓу министерот за економија Крешник Бектеши и косовскиот министер за трговија и индустрија Бајрам Хасани, забелешките за комплетно отстранување на заштитната мерка за повисока царина на одредени земјоделски производи, треба да се најдат пред косовската Влада.

Иако мерката е делумно повлечена за поголем број производи, односно од 21, остана на сила за само седум сезонски производи за доматите, пиперките, грозјето, сливите, јаболката, крушите и малините, на нив отпаѓа најголем дел од македонскиот извоз на косовскиот пазар.

„Токму тоа му го предочив на министерот Хасани, истакнувајќи ги загубите на бизнис-заедницата, кои на двете страни се огромни. Добив уверување од косовската страна дека овие наши забелешки ќе бидат земени предвид. Имајќи предвид дека станува збор за владина одлука, на првата наредна седница, аргументите кои ги дадовме од наша страна ќе бидат изнесени пред членовите на Владата на Косово за да се изнајде решение кое ќе биде взаемно прифатливо. Лично верувам дека во најсокоро време ќе ја продолжиме досегашната одлична трговска соработка, во корист на земјоделските производители и бизнис заедницата од двете страни“, изјави Бектеши по средбата.

Средбата уследи по официјалното писмо што Бектеши го упати до косовскиот колега пред една недела и по состанокот на ЦЕФТА земјите во Белград, на кој беше поздравена одлуката на косовската Влада за делумно укинување на трговските бариери и Приштина беше повикана во целост да ги укине царините за останатите производи опфатени со одлуката.


Бектеши од Хасани денеска ќе бара целосно укинување на царината од Косово


Приштина, 27 јули, 2018 - 11:43 (META) 

Mинистерот за економија Крешник Бектеши денеска ќе се сретна со косовскиот колега Бајрам Хасани за повлекување на царините за земјоделските производи кои останаа неопфатени со одлуката на косовската Влада.

„Во име на досегашната успешна трговска и, воопшто, економска соработка со Република Косово се надевам дека ќе најдеме заеднички јазик со мојот косовски колега, а дека средбата ќе резултира со решение кое ќе биде од взаемен интерес. Уверен сум дека имаме заедничка цел, а тоа е олеснување на трговијата на Западен Балкан, согласно правилата на договорот ЦЕФТА и принципите на слободна трговија“, вели Бектеши.

Царина од Косово се уште важи за доматите, пиперките, јаболката, крушите, сливите, малините и грозјето.Владата се уште дава можност за преговорите да успеат и не воведува контрамерки за косовските производи.

Министрите од регионот денеска во Белград на заеднички состанок ја повикаа косовската Влада целосно да ги укине зголемените царини за извоз на земјоделски производи во Косово.


МЗШВ очекува целосно повлекување на одлуката на Косово


Скопје, 26 јули, 2018 - 15:09 (META) 

Разговорите кои Владата и надлежните министерства ги водеа со Косово во изминатиот период вродија со плод, Приштина веќе ја повлече зголемената царина за дел од производите, информираат од Министерството за земјоделство, шумарство и водостопанство (МЗШВ).

„Утре, министерот за економија Крешник Бектеши, ќе се сретне со неговите колеги во Косово каде ќе се бара решение и надминување на проблемот. Сите досегашни преговори, ни даваат за право да очекуваме целосно укинување на зголемените царини. Затоа во овој момент, Македонија останува на ставот барем засега да не се воведуваат контрамерки. По утрешниот состанок ќе имаме и многу повеќе детали за наредните чекори. Приоритетна цел на министерството за земјоделство во моментов е утврдување на начин како да ги заштитиме земјоделците“, се вели во соопштението на МЗШВ.