„Гарантираната цена“ на дел од прехранбените производи ќе важи до крајот на годинава, а производителите, дистрибутерите и трговците ќе може и на акциски цени да ги продаваат земјоделските и прехранбените производи.
На предлог на Министерството за економија, на денешната владина седница беше донесена Одлука за престанување на важноста на Одлуката за забрана за вршење на трговија на одредена стока, односно забрана на трговците на мало да нудат акциска продажба (акција) и промотивна продажба (промоција) при ставање во промет на земјоделски и прехранбени производи.
Владата донела и Одлука за изменување и дополнување на Одлуката за посебни услови за трговија на одделни стоки, определување на највисоки сцени за одделни производи на трговија на мало, како и обврска на трговците да прибавуваат определени видови и количества на одделни стоки на потрошувачите, според која рокот за важење на оваа одлука се продолжува од 30 ноември до 31 декември, односно до крајот на годината.
Како што образложи министерот за економија Крешник Бектеши на денешната прес-конференција овие две одлуки се носат по консултација со бизнис секторот и врз анализи на надлежните институции.
„По широката и конструктивна дискусија со трговците и на мало и големо, како и компаниите за производство на прехранбени производи и претставници на Стопанската комора, за да нема заблуда кај претставниците од секторот трговија, денеска беше целосно укината Одлуката за забрана на акции и промоции. Бидејќи одредени трговци на мало ја толкуваа претходната Одлука дека немаат можност да имаат акции и промоции, сега со последното прецизирање, односно измена и дополнување на Одлуката и производителите и дистрибутерите и трговците ќе имаат можност да ги стават сите земјоделски и прехранбени производи на акција и промоција“, кажа министерот Бектеши.
Во однос на втората Одлука, министерот појасни дека податоците на терен покажуваат дека мерката за намалување на цените на основните прехранбени производи означени со „гарантирана цена“ има простор да важи до крајот на годината.
„Имајќи предвид дека е подготвен финалниот текст на Законот за нефер трговски практики, кој треба за кратко време да биде доставен во Собранието, а очекуваме да биде изгласан од пратениците, одлучивме мерката за намалување на цените на дел на основните прехранбени производи, како и знакот „гарантирана цена“, наместо до 30 ноември да важи до крајот на годината. Тоа ќе значи дека потрошувачите ќе бидат заштитени од евентуално повторно зголемување на цените“, изјави министерот Бектеши.
Одлуката за 10% намалени цени коишто се применувале на 1 август 2023 година во трговија на мало, како и безалкохолни и алкохолни пијалаци, ќе важи до 31 декември 2023 година.
Производите што ќе се продаваат по „гарантирана цена“ вклучуваат бел ориз, пченично брашно тип 400 и тип 500, бел и полубел леб, векна, индустриски тип 450 гр (цел и на парчиња), други пекарски производи, бисквити „Petit Beurre” и бисквити обични и посни, наполитанки, тестенини, јунешко месо без коски, свинско месо без коски, мелено месо свинско и јунешко, пиле, пилешки стек, чаен колбас, пилешка посебна салама, паштета од џигер и пилешка, трајно кравјо млеко, јогурт од кравјо млеко, кисело кравјо млеко, павлака од кравјо млеко, традиционално кравјо бело сирење и мешано бело сирење, традиционален кравји и мешан кашкавал, свежи јајца, светло пиво, газирани и негазирани пијалоци и минерална, газирана и негазирана природна изворска вода.
