Бизнис-заедницата со идеи за намалување на загадувањето


Скопје, 7 февруари, 2019 - 12:12 (META) 

Здружена акција на приватниот и јавниот сектор за побрза транзиција и замена на старите возила со електричини чија мисија на јаглерод диоксид е нула проценти, итно справување со нелегалните бизниси за отпад, како и промовирање на стандардот за пасивни куќи кој претставува највисок енергетски стандард и ја намалува потрошувачката на енергија за греење до неверојатни 90 проценти, се трите аспекти кои, согласно анализите ќе влијаат долгорочно на намалување на  загаденоста на воздухот, беше истакнато на денешната прес конференција на Сојуз на стопански комори на Македонија (ССК).

Потпретседателот на Сојузот, Александар Милошевски изјави дека согласно податоците на Меѓународната агенција за енергетика објавени лани, за една година бројот на електрични превозни средства на светско ниво пораснал рекордно на 3,1 милиони возила, а се предвидува до 2030 година да има раст од 125 до 220 милиони електрични возила во светот.

„Во нашата земја, интересот за ваков тип на автомобили е мал. Согласно податоците на Министерството за внатрешни работи до октомври 2018, на подрачјето на Скопје се регистрирани вкупно 48 електрични возила.Причините се повeќе но генерално, се цените на автомобилите кои не секој граѓанин може да си го дозволи, но и не доволно развиена инфраструктура и инсталирани полначи за овој тип автомобили, кои без станици за полнење можат да издржат околу 100 километри. За таа цел, потребна е заедничка акција на приватниот и јавниот сектор за стимулирање на набавка на ваков тип автомобили“, изјави Милошевски.

Тој додаде дека со новите измени во Законот за возила предвидено е воведување на субвенции за електрични и хибридни возила, дополнително се предлага по примерот на западно европските земји каде е зголемена нивната употреба, да се имплементира поддршка во субвенционирани батерии и делови за електричните возила како и да се разгледа можноста за бесплатна регистрација, бесплатни патарини и паркинзи кои би биле дпоплнителен стимул и поволност за секој оној кој ке се одлучи за ваква опција.

Дополнително направена е студија за оваа намена во Македонската академија на науките и уметностите (МАНУ) во која се предвидува до 2035 година, 40 проценти од возилата да бидат електрични и за 35 отсто да се намали емисијата на јаглероден двооксид од транспортот, преку стимулирање на ваквиот тип автомобили.

Според Милошовски, вториот аспект кој во голема мера ќе го намали загадувањето е итно справување со нелеганите бизниси за отпад, каде без дозвола се гори, не се следат никакви стандарди и не се знае каде се испуштаат непознати материи во воздухот и во почвата.

„Со употребата на новите технолигии особено со снимањето на теренот со помош на дронови институционално треба точно да се лоцираат можните диви отпади кои се големи загадувачи и кои на отворено неконтролирано палат отпад за понатаму да се превземат радикални чекори за нивно спречување. На тој начин лесно ќе се снимаат критичните точки и ќе се лоцира од каде доаѓа енормното загадување на воздухот. Дополнително потребно е итно постапување по дојави, бидејќи сето ова е и резултат на горење неразградливи и опасни материи по здравјето на граѓаните. Диви депонии и горење на штетни материи е заедничко за петте најзагадени градови во целиот свет, меѓу кои е и Скопје“, изјави Милошевки.


Дескоска најави целогодишна контрола на АКМИС-от во 16 судови


Скопје, 11 декември, 2018 - 16:28 (META) 

Министерката за правда Рената Дескоска соопшти дека донела решение со кое во текот на целата наредна година ќе се врши надзор на работењето на АКМИС системот во 16 судови.

Проблемите со информатичкиот систем за автоматска прераспределба на предмети (АКМИС), неговото нефункционирање и преголемото влијание на човечкиот фактор беа утврдени со извештајот на Работната група за овој систем формирана од министерството за правда. Наодите за неправилностите беа објавени летоска.

Дополнително Дескоска најави и дека измените на Законот за судови и Законот за Судски совет оваа недела влегуваат во собраниска процедура. Како што кажа министерката на денешната тркалезна маса на која беше презентирана работната верзија на анализата за проценката на влијанието на регулативата на Законот за судови, во организација на Институтот за европска политика (ЕПИ), речиси сите препораки од Венециската комисија се применети во новите предлог-закони.

-Дополнителните препораки кои ги добивме од Венециската комисија овој месец се имплементирани. Со целосно затворен пакет одиме во Собранието. Се надевам дека сите 120 пратениците ќе имаат доблест и сила да ги поддржат овие измени, бидејќи тие се веќе верификувани од Венециската комисија, којашто ја цени усогласеноста на законската регулатива со европските стандарди – потенцираше Дескоска.

Како клучни измени во делот на Законот за судови, министерката Дескоска ги наведе измените коишто се однесуваат на основите за утврдување дисциплинска одговорност кај судиите. Во главните измени на Законот за Судскиот совет, е и основата за утврдување на одговорност на членовите на Судскиот совет за нивното работење. Се поедноставуваат постапките за утврдување на дисциплинска одговорност, но и разрешување на судиите.


Засилени контроли на квалитетот и безбедноста на јајцата пред Велигден


Скопје, 20 март, 2018 - 11:03 (META) 

Агенцијата за храна и ветеринарство (АХВ) ги зајакна инспекциските контроли на квалитетот и безбедноста на јајцата, во пресрет на Велигден кога и потрошувачката е најголема.

– Покрај контролите на магацините, зајакнати контроли се спроведуваат и на граничните премини, при увоз, со цел на граѓаните да им се понуди безбеден и квалитетен производ. Секоја недоследност во поглед на овој прехранбен производ граѓаните и компаниите можат да го пријават на Агенцијата за храна и ветеринарство, врз основа на што ќе биде спроведена и инспекциска контрола – вели директорот на АХВ, Зоран Атанасов.

Претседателот на Групацијата за живинарство при Стопанска комората, Абдулезел Догани од „Везе Шари“, компанија која произведува јајца, побара при инспекциските контроли при увоз да се обрне внимание и да тоа дали јајцата кои се увезуваат во земјава го имаат кодот на државата од каде потекнуваат, за да се спречи можноста од манипулации на домашниот пазар како македонски да се пласираат јајца од увоз.


Раниот Велигден го намали извозот на македонското јагне


Скопје, 20 март, 2018 - 10:57 (META) 

Македонското јагне годинава за Велигден повторно ќе заврши на традиционалните пазари во Италија, Хрватска и дел во Турција, но во помали количества од лани.

Ристо Михајлов од кланицата „Серта“ за „Мета“ вели дека продажбата на јагнињата годинава оди тешко и побарувачката од страна на традиционалните пазари е послаба.

– Грција годинава нема купено ниту едно јагне, за разлика од претходните години кога февруари и март имавме извоз во оваа држава. Имаат сопствено производство и повеќе не сме им атрактивни. За Италија и Хрватска исто така има намалени количества за извоз. Италијаните веќе најавија дека ќе го прекинат откупот, бидејќи немаат купувачи по маркетите. Кризата се чувствува секаде – вели Михајлов.

Тој додава дека цената е подобра од лани и е 140 денари за килограм.

И претседателот на здружението на сточари „Даши“ од Дебар, Скендер Аме, вели дека Италија и другите земји откупиле помалку јагниња. Очекува откупот да достигне 150.000 грла во споредба со лани кога се извезле 200.000 грла.

– Во однос на пласманот, сметаме дека влијаат два фактора, тоа што Велигден годинава е порано и јагненцата не се пораснати за продажба, што влијае и на цената. Второ, бројот  на овци стагнира, не оди нагоре. Се повеќе се напуштаат трлата, зашто тешко се наоѓаат овчари, сите бегаат. Овчарската работна рака е многу скапа, не се наоѓаат луѓе – изјави Даши.


Лукаревска: Засилени контроли на фискалните сметки за намалување на скриената економија


Скопје, 6 февруари, 2018 - 11:47 (META) 

Еден од предусловите за развој на сивата економија е неиздавањето на фискални сметки, изјави директорката на УЈП, Сања Лукаревска, на денешниот Регионален форум за скриена економија кој се одржува во „Холидеј ин“, а на кој учествуваат и претставници од даночните институции на регионот.

Таа додаде дека се поголем број на граѓани се јавуваат во УЈП и поднесуваат претставки за неиздавање на фискални сметки. Најголем број од фискалните сметки не се издаваат во секторот на услуги.

Лукаревска најави засилени контроли од страна на УЈП посебно кога станува збор за настани од забавен карактер. Како пример го посочи Супер купот, кога имало засилени контроли и Струмички карневал кој следува. Таа информираше дека од извршените контроли минатата недела само кај 10 отсто од субјектите биле утврдени неправилности.

Освен неиздавањето на фискални сметки како други форми на скриена економија, Лукаревска ги спомна пријавувањето на понизок обрт од страна на компаниите, пријавувањето на помали приходи, издавање на фиктивни фактури, формирање на фиктивни компании и лажирање на фактурите. Најголем дел од скриената економија е кај микро и малите бизниси.

Ана Мицкоска Ралева, од Центарот за истражување и креирање политики изјави дека во однос на индексот на скриена економија, во Македонија нема подобрување од 2014 година.

На скала од 1 до 10, Македонија има тројка на тој индекс и е подобра во однос на Албанија која има четворка и Косово кој има седмица.

– Оваа позиција е очекувана бидејќи од 2014 до 2017 година политичката и економската криза влијаела на недовербата врз институциите – рече Мицкоска Ралева.

Таа додаде дека не секогаш се потребни казнени мерки, заплашување на правните и физичките лица туку потребна е стимулација за подобрување на даночната дисциплина.


Земјите од ЈИЕ заеднички ќе го контролираат малото и лесно оружје


Подгорица, 2 февруари, 2018 - 10:13 (META) 

Замениците-министри за внатрешни и надворешни работи на земјите од Југоисточна Европа (ЈИЕ) изразија решителност во иднина заеднички да работат на контролата на малото оружје и лесното вооружување во регионот.

Оваа обврска е наведена во заедничката изјава усвоена на регионалната конференција на високо ниво „Јакнење на обврските за контрола на малото оружје и лесното вооружување во ЈИЕ“ што синоќа заврши во Подгорица, Црна Гора.

Со заедничката изјава е засилена обврската за борба против недозволената трговија со овој тип на оружје, како и разработка на „Мапа на патот за контрола на малото оружје и лесното вооружување на Западен Балкан“, која во текот на годината треба да биде усвоена на Самитот на Западен Балкан во Лондон како дел од Берлинскиот процес.

Конференцијата ја организираше Центарот за контрола на малото оружје и лесно вооружување во Југоисточна и Источна Европа, под покровителство на Регионалниот совет за соработка и Сојузна Република Германија.

Регионалниот совет за соработка е оперативното тело на земјите членки на Процесот за соработка во Југоисточна Европа – ПСЈИЕ, чиј основач и полноправен член е и Република Македонија.

Заменик-министерот внатрешни работи на Македонија Агим Нухиу на конференцијата потенцираше дека е “особено важно да се воспостави соодветен систем за евиденција и контрола на оружјето, кој ќе помогне во понатамошните постапки за пронаоѓање на оружјето со кое евентуално е извршено одредено кривично дело, а со тоа и самиот сторител“.

Тој ги презентираше активностите на македонската полиција во однос на проблематиката со малото и лесно оружје, и нагласи дека е неопходно интензивирање на соработката, како на регионално ниво, така и пошироко.


Јавниот превоз од денеска повторно е бесплатен, поради загадениот воздух


Скопје, 30 јануари, 2018 - 11:31 (META) 

Градот Скопје од денеска воведува бесплатен јавен превоз во автобусите на ЈСП и на приватните превозници, а мерката ќе трае се до моментот на намалување на загадувањето.

Мерките се преземаат по добиеното известување од Министерството за животна средина и просторно планирање дека прагот на алармирање за ПМ-10 честичките во воздухот е надминат во текот на два дена последователно, односно над 200 микрограми на кубен метар воздух.

Градот Скопје ги прекинува сите градежни активности на градилиштата под своја надлежност и ги повикува сите градоначалници да го сторат истото. Од таму најавуваат дека ќе ја интензивираат контролата на градилиштата.

Град Скопје бараат од МВР да ги зајакне контролите за почитување на забраната за движење тешки товарни возила чија што крајна дестинација не е градот, а кои се упатуваат да ја користат скопската обиколница. Од МВР исто така се бара да врши зачестени контроли на издувните гасови на возилата што учествуваат во сообраќајот, како и ограничување на обуките на автошколите од 9.30 до 14.30 и по 18 часот.

Градоначалниците на општините во Градот Скопје се повикуваат да ги интензивираат инспекциските надзори над субјектите кои управуваат со отпадни гуми и отпадни масла.

„Градот Скопје, исто така, апелира до граѓаните да не ги користат возилата без потреба, повеќе лица да се возат во едно возило, да се користи јавниот превоз и тоа да премине во навика без разлика на загадувањето. За затоплување на домовите да не се користат отпадни материјали, прегорено машинско масло, лакирани и обоени отпадоци од дрво, стиропор, ПЕТ амбалажа, гуми и каков било синтетички материјал, да се користи суво и чисто дрво без примеси од земја и од отпадоци, а печките на дрво да се користат и одржуваат според упатствата на производителот“ се вели во соопштението на Град Скопје.


Институциите не ги спроведуваат препораките од ревизорите за финансиското работење


Скопје, 24 јануари, 2018 - 13:33 (META) 

Државните институции имплементирале многу малку препораки од Државниот завод за ревизија по контролите на нивното финансиско работење, информираше портпаролот на Владата, Миле Бошњаковски.

Затоа, на владина седница било заклучено дека ќе бидат преземени поригорозни мерки за да се подобри ефикасноста на контролата на трошење на јавните финансии.

– Многу малку препораки се имплементирани по завршувањето на ревизиите. Се носат заклучоци, но институциите покажуваат слабост во имплементацијата на препораките – рече Бошњаковски.

Тој додаде дека Владата го задолжила Министерството за финансии да подготви стратешки документ насловен „Политика за јавна внатрешна финансиска контрола за период 2018 – 2020 година“ преку кој треба да се утврди слабоста во работењето на институциите и да се зголеми отчетноста за трошењето на парите.


Владата го утврди предлог-законот за поголема контрола на паралелниот увоз на лекови


Скопје, 4 јануари, 2018 - 23:25 (META) 

Владата на денешната 47. седница го утврдила и донела одлука да го достави до Собранието новиот предлог-закон за лековите и медицинските средства, со кој се зголемува контролата на паралелниот увоз на лекови во земјава.

Како што се наведува во соопштението на владината прес-служба, со предложените решенија веледрогериите се задолжуваат да обезбедат пообемна документација за квалитетот на лековите од паралелен увоз.

„Дополнително со овој предлог-закон се прецизира начинот на издавање на одобрението за паралелен увоз во смисла на утврдување на критериуми и тоа со обезбедување сертификат за квалитет на лек што e предмет на паралелен увоз, приложен во оригинал. Сертификатот за квалитет треба да биде издаден од страна на производителот на лекот или од лабораторија овластена од надлежен орган на земјата производител или од земјата извозник на лекот. На овој начин се овозможува подобрена контрола на квалитетот на секоја серија од лековите кои се предмет на паралелен увоз и се обезбедуваат безбедни лекови од паралелен увоз и заштита на пациентите од евентуални неквалитетни лекови“, стои во соопштението.

На денешната седница Владата дала согласност за договорот за долготраен закуп на градежно земјиште во Технолошко индустриската развојна зона Скопје 1 со фирмата „Џемдаг Лајтинг Еуропа“.

Станува збор за прв договор за гринфилд инвестиција според критериумите од новиот план за економски раст кој беше промовиран непосредно пред Нова година, вреден 5 милиони евра, и кој предвидува 100 нови вработувања, велат од Владата.

На предлог на Министерство за животна средина и просторно планирање, Владата денеска ја разгледала и усвоила информацијата за ажурираниот Национален имплементационен план за редукција и елиминација на перзистентните органски загадувачи во Република Македонија.

„Ажурираниот план опфаќа и препорачува повеќе чекори за исполнување на обврските од Стокхолмската конвенција како што е спречување на неконтролирано горење отпад на нестандардни депонии, воспоставување контрола при увоз на стара опрема со ризик од хемикалии штетни за здравјето на луѓето и животната средина, формирање и функционирање на собирни центри, центри за третман и преработка на искористени возила и други мерки“, стои во соопштението за 47. седница на Владата.


Затворени 19 објекти и приведени 26 лица при рација на МВР во Тетово, Битола и во Велес


Скопје, 19 ноември, 2017 - 14:46 (META) 

При спроведени контроли на подрачјата на СВР Тетово, СВР Битола и СВР Велес, приведени биле 26 лица, а привремена забрана за работење добиле 19 угостителски објекти, соопшти денеска на прес-конференција директорот на Бирото за јавна безбедност, Лазе Велковски.

Во некои од локалите бил откриен незаконски престој на лица во Република Македонија, користење наркотици, како и управување возила под дејство на алкохол.

– Во Тетово и во Гостивар, од 31 објект, на 19 објекти од Управата за јавни приходи и од Државниот пазарен инспекторат им се изречени мерки забрана за вршење дејност во траење од 15, односно 30 дена, бидејќи не издавале фискална сметка, не поседувале фискален апарат и имале нерегистрирани вработени. Поради поседување дрога и непоседување документи за идентификација, приведени се вкупно 26 лица, од кои 16 македонски државјани и десет странски државјанки, девет државјанки на Република Србија и една на Република Црна Гора. Кај дел од гостите во објектите се пронајдени пакувања со прашкаста материја – вели Велковски.

Контролата во Битола не покажала посериозни прекршоци и не е констатирано нарушување на јавниот ред и мир. Во Велес, Кавадарци и во Неготино алкотестирани биле 232 возачи, а кај 29 возачи е утврдено присуство на алкохол.

Велковски нагласи дека МВР во соработка со другите институции ќе продолжи со вакви контроли и во следниот период.