Почнува расправата за новата стратегија за национална сајбер-безбедност


Скопје, 12 јуни, 2018 - 11:53 (META) 

Министерството за информатичко општество и администрација, Министерството за одбрана и Министерството за внатрешни работи заеднички изготвиле работна верзија на Националната стратегија за сајбер безбедност на Република Македонија. Расправата веќе почна по електронски пат, преку давање предлози, препораки и коментари на електронската адреса cyber_security@mioa.gov.mk, а утре ќе се одржи и првиот јавен настан од овој процес.

Во Клубот на пратениците во Скопје, со почеток во 10 часот, ќе се одржи првата јавна расправа на која ќе биде презентирана стратегијата. На настанот ќе бидат министерот за информатичко општество и  администрација, Дамјан Манчевски, министерката за одбрана, Радмила Шекеринска и министерот за внатрешни работи, Оливер Спасовски.

Во нацртот на 38 страници, се посочува дека е голема потребата од нов пристап кон сајбер-безбедноста, бидејќи постои огромна неподготвеност за справување со сајбер-заканите и кај граѓаните и кај фирмите, а заканите се сè побројни. Наспроти тоа, има недостиг на експерти и огромен проток на информации кои излегуваат од граѓаните или фирмите или доаѓаат до нив, и затоа стратегијата предвидува значително зголемување на капацитетите за заштита на податоците од лица и други субјекти со криминални намери со користење државни пари за развивање соодветна одбрана.

Според стратегијата, во првиот квартал на 2017 година, 73,6 отсто од домаќинствата имале пристап до интернет, а кај фирмите со 10 или повеќе вработени таа бројка била 91,2 отсто. Тоа наметнува потреба од подобро запознавање на корисниците со мерките на заштита, посебно во фирмите, од кои дел извршуваат работи за државата, па ризиците што ги имаат тие фирми значат и ризици од загрозување на податоци на државата. Исто така, се позастапен е и Интернет на нештата, односно поврзување на најразлични уреди на интернет, коишто може да бидат нападнати и така да се загрози не само нивното функционирање, туку и безбедноста на нивните сопственици.

Стратегијата за сајбер-безбедност предвидува засилени меѓусекторски мерки за справување со заканите, преку пет мерки. Тоа се зголемување на сајбер отпорноста и зголемување на сајбер-капацитетите, посодветна борба со сајбер-криминалот, потоа засилување на сајбер-одбраната и поголема соработка на институциите.

Исто така, предвидено е формирање на Национален совет за сајбер-безбедност и, како самостоен орган, Тело со оперативни капацитети за  сајбер-безбедност.


Прифаќањето на дигиталните сертификати во регионот ќе биде во фокусот на Самитот


Софија, 27 март, 2018 - 13:23 (META) 

Министерот за информатичко општество и администрација, Дамјан Манчевски во рамки на меѓународната конференција на тема „ИТ Хаб Конект 2018 – иновации, регулатива, инвестиции“, што се одржува во Софија, се сретна со еврокомесарката за дигитална економија и општество, Мариа Габриел и министерот за иновации и технолошки развој на Србија, Ненад Поповиќ.

Манчевски на Габриел и ги претставил активностите кои МИОА ги превзема во делот на мапирање на територијата за широкопојасен интернет, подготовката на стратегија за сајбер-безбедност, како и заложбите за вклучување на трет мобилен оператор во Македонија.

„Што се однесува до поддршката во делот на драстично намалување на цените за роаминг, ова останува да биде високо на агендата на еврокомесакрата, и ќе биде една од главните теми за кои ќе се разговара на престојниот Дигитален самит, што ќе се одржи на 18 и 19 април во Скопје“, информираат од МИОА.

Состанокот со српскиот министер, Поповиќ бил посветен на соработката и размената на искуства помеѓу двете држави во делот на технолошкиот парк и иновациите.

Двајцата министри се согласиле дека Дигиталниот самит е одлична можност каде ќе можат да се разговара за поврзаност во иновациските системи, како и организирање на заедничка конференција во регионот, посветена на предизвиците во ИТ-сферата.

„Прифаќањето на дигиталните сертификати во регионот ќе биде во фокусот на Дигиталниот самит. На состанокот, министерот Манчевски и министерот Поповиќ се согласија дека Македонија и Србија можат да бидат државите каде ќе се развие пилот-проект, што понатаму ќе биде превземен како успешна приказна и во другите земји во регионот“, се додава во соопштението.


ДИК почна со вкрстување на податоците


Скопје, 29 февруари, 2016 - 15:52 (META) 

Експертите ангажирани од Државната изборна комисија, вчера почнаа со вкрстување на податоците од 10 бази добиени од релевантни државни институции, стои во соопштението од ДИК.

„На овој процес му претходеше стандардизирање, нормализирање и валидација на податоците од базата на Министерството за внатрешни работи со базите на Фондот за здравствено осигурување на РМ, Агенцијата за вработување на РМ, Фондот за пензиско и инвалидско осигурување на РМ, Агенцијата за катастар на недвижности на РМ, Министерството за земјоделство, шумарство и водостопанство, Министерство за труд и социјална политика, Управата за водење на матични книги, Централниот регистар на РМ, Народната банка на РМ и на Управата за јавни приходи“, стои во соопштението.

Според планот на ДИК, дел од сомнителните категори што ќе треба да се проверуваат во избирачкиот список се починати лица, повеќе гласачи на иста адреса, граѓани кои немаат постојано живеалиште во Македонија, фантомски избирачи и гласачи кои ги има на две избирачки места.

Понатаму, треба да се добие поддршка од аналитичарите на податоците и да се предложат можни стратегии за теренската проверка.

Вкрстувањето на податоците ќе го вршат три ИТ-компании, од кои две од Македонија и една од САД.

Во моментот во избирачкиот список се запишани 1.804.000 гласачи, но точната бројка ќе се знае по прочистувањето на списокот.


ДИК од институциите добила непрочистени бази на податоци


Скопје, 25 февруари, 2016 - 16:33 (META) 

„Државната изборна комисија од институциите добила непрочистени и различни податоци од различни бази. Од некои институции добиле помалку податоци, а од други – повеќе од што барале. Сепак, одлучено е да се работи на вкупно 11 бази на податоци од 11 институции“, изјави на денешната седница на ДИК, Мајкл Бург, ИТ-експерт од САД, член од експертската група.

Експертот Атанас Урумов предложи во планот за вкрстени проверки да се додаде уште една точка, според која сите податоци што ќе произлезат од вкрстените проверки за можни сомнителни гласачи, прво да се одобрат од ДИК, па потоа да се прави теренска проверка.

Според планот, дел од сомнителните категори што ќе треба да се проверуваат во избирачкиот список се починати лица, повеќе гласачи на иста адреса, граѓани кои немаат постојано живеалиште во Македонија, фантомски избирачи и гласачи кои ги има на две избирачки места.

Силвана Бонева, член на ДИК од ВМРО-ДПМНЕ, рече дека се сомнева во валидацијата и се плаши да не се одолжи овој процес, а со тоа и да се одложи прочистувањето на избирачкиот список.

Бедредин Ибраими, член на ДИК од ДПА, рече дека можеби воопшто нема фантомски гласачи и изборачкиот список е точен.

На денешната седница членовите го изгласаа извештајот за спроведените активности на експертската ИТ-група за процесите за нормализирање и за чистење на базите на податоци. Останува да се направи валидација на податоците, анализа од тројца независни аналитичари, да се споредат резултатите со тие на експертската ИТ-група, да се поднесат извештаи до ДИК и да се добие поддршка во планирање на теренската проверка и ажурирање на избирачкиот список.

Понатаму, како што е наведено во извештајот, треба да се добие поддршка од аналитичарите на податоците и да се предложат можни стратегии за теренската проверка.

Точката за објавување на избирачкиот список на веб-страницата на ДИК е одложена за наредната седница.


Бугарската компанија „Мусала софт“ почна со работа во Македонија


Скопје, 12 ноември, 2015 - 15:25 (META) 

Бугарската ИТ-компанија „Мусала софт“, која веќе почна да работи во Македонија со десетина лица, до 2019 година планира да отвори 300 работни места и да вложи повеќе од 20 милиони евра, најави денеска вицепремиерот за економски прашања, Владимир Пешевски.

– Како резултат на напорите што ги прават Владата и Агенцијата за привлекување странски инвестиции, компанијата „Мусала софт“ почнува со работа во Македонија. Планира во земјава да отвори повеќе од 300 нови работни места до 2019 година. Главно, ќе биде вработен висококвалификуван кадар, кој ќе работи на развој на најсофистицирани софтверски производи – рече Пешевски на прес-конференција во Владата.

Претседателката на „Мусала софт“, Елена Маринова, посочи дека во компанијата веќе работат повеќе од 10 висококвалификувани стручни лица и најави дека во иднина брзо ќе се шират во Македонија, а фокус ќе им бидат помладите кадри.

– Во Македонија во моментов вработуваме мал број луѓе, но висококвалитетни и со големо искуство и ги позиционираме на битни позиции. Тоа го правиме за да можеме понатаму да се шириме. Сите минуваат низ нашата внатрешна корпоративна обука и ќе продолжиме да го правиме тоа и откако ќе се прошириме во Македонија – појасни Маринова.

Таа нагласи дека имаат програми за обука на млади и на повозрасни луѓе, но фокусирани се на помладите зашто, како што рече, имаат и партнерство со Владата.

– Во Бугарија имаме успешни програми со кои ги обучуваме луѓето што доаѓаат од другите индустрии, каде ставката на невработеност е голема и ги пренаменуваме нивните вештини кон ИТ-секторот. Се надеваме дека тоа ќе го направиме и во Македонија – истакна Маринова.


Сертификати за напредни ИТ-вештини, добија 88 невработени лица


Скопје, 22 мај, 2015 - 13:25 (META) 

Сертификати за завршени обуки за напредни ИТ-вештини, добија 88 невработени лица. Со овие обуки, тие стекнаа интернационално признати сертификати.

Mинистерот за труд и социјална политика, Диме Спасов, истакна дека за оваа намена биле обезбедни околу осум милиони денари.

– Изминатите години овие обуки ги поминаа повеќе од 470 лица, од кои вработени се 246 лица. Со најавените странски инвестиции, потребата за ваков кадар и за вакви вештини е навистина голема. Токму поради тој факт го зголемивме обемот и опфатот на невработени лица што ќе ги завршат ваквите обуки за побрзо и полесно да стигнат до работа – истакна Спасов.

Агенцијата за вработување на почетокот на јуни ќе распише нов јавен повик за обуки за невработени лица за ИТ-вештини, со кој ќе бидат опфатени околу 220 невработени лица, а за кои веќе се обезбедени околу 22 милиони денари.

Обуките ги организираа Министерството за труд и социјална политика и Агенцијата за вработување, а ги спроведе „Семос едукација“.

 


Ивановски во Израел на средби со ИТ-компании


Скопје, 26 декември, 2014 - 13:25 (META) 

Од денеска до 30 декември, министерот за информатичко општество и администрација, Иво Ивановски, ќе престојува во Израел, каде ќе ги претстави можностите што ги нуди Република Македонија за привлекување странски инвестиции.

Според Министерството, Ивановски ќе има средби и разговори со најголемите ИТ-компании во таа земја, како и со претставници на компании од областа на истражувањето и на развојот.


Стокхолм е прогласен за најпаметен град


Стокхолм, 2 декември, 2014 - 19:56 (META) 

Стокхолм, Лондон, Париз, Сингапур и Копенхаген се градови со најголема зрелост во сегментот на информатичките технологии и телекомуникации, покажа истражувањето што го изврши компанијата „Ериксон“.

Истражувањето рангира 40 градови и ја мери нивната зрелост во сегментот на информациските технологии, односно влијанието на ИКТ-инвестициите на економските и на општествените услови и на развојот на животната средина.

Во годинешниот извештај, додадени се девет нови градови – Берлин, Минхен, Барселона, Атина, Рим, Варшава, Мускат, Абу Даби и Дубаи.

Еден од заклучоците на извештаите е и дека градовите со низок степен на зрелост во ИКТ, покажуваат тенденции на многу побрзо подобрување отколку високо развиените градови.