Ако дваесетина години одвај од пет до 10 отсто од вработените во ИТ-секторот биле жени, сега состојбите значајно се промените. Според Елизабета Најковска од „Мајкрософт“, во 2019 година овој процент изнесува од 40 до 45 проценти и постојано е во нагорен раст. Во истовреме, расте и интересот на девојките за работа во секторот, кој до пред некоја година беше „машки“.
-Токму поради тоа ја почнавме СТЕМ програмата, преку која сакаме да ги мотивираме девојчињата да влезат во оваа програма, да знаат дека не е само за машки и не е нешто далечно. Тие се веќе „диџи“ девојчиња, користат мобилни телефони и лаптопи, но сакаме да ги насочиме што повеќе да работат во овој сектор“ изјави Најковска.
Денеска млади девојки во Штип беа поканети да ги слушаат советите и животните приказни на жени од овој сектор, кои докажале дека „таа“ го заслужува битното место во ИТ-светот.
На настанот во Штип се обратија неколку жени од ИТ-заедницата од Македонија.
Нина Николиќ од Швајцарската програма за претприемништво рече дека преку успешните приказни сакаат да ги инспираат девојчињата да размислуваат за свој бизнис во овој сектор. Николиќ вели дека полека се менува и перцепцијата за овој сектор.
„Многу врати сега се повеќе отворени, се’ е до начинот на кој размислуваме. Доколку мислиме дека нешто ни е пасија и треба да одиме натаму, вратите сами ќе ни се отворат“, рече Николиќ.
Караванот на „DigiGirlz“ денеска беше во Штип. Целта е да ги внесе овие млади девојчиња во кодирање, програмирање, иновација во креирањето и стимулирањето на нови ИТ-идеи со цел да се зголеми нивното учество во овие професии.
