Бугарската ИТ-компанија „Мусала софт“, која веќе почна да работи во Македонија со десетина лица, до 2019 година планира да отвори 300 работни места и да вложи повеќе од 20 милиони евра, најави денеска вицепремиерот за економски прашања, Владимир Пешевски.
– Како резултат на напорите што ги прават Владата и Агенцијата за привлекување странски инвестиции, компанијата „Мусала софт“ почнува со работа во Македонија. Планира во земјава да отвори повеќе од 300 нови работни места до 2019 година. Главно, ќе биде вработен висококвалификуван кадар, кој ќе работи на развој на најсофистицирани софтверски производи – рече Пешевски на прес-конференција во Владата.
Претседателката на „Мусала софт“, Елена Маринова, посочи дека во компанијата веќе работат повеќе од 10 висококвалификувани стручни лица и најави дека во иднина брзо ќе се шират во Македонија, а фокус ќе им бидат помладите кадри.
– Во Македонија во моментов вработуваме мал број луѓе, но висококвалитетни и со големо искуство и ги позиционираме на битни позиции. Тоа го правиме за да можеме понатаму да се шириме. Сите минуваат низ нашата внатрешна корпоративна обука и ќе продолжиме да го правиме тоа и откако ќе се прошириме во Македонија – појасни Маринова.
Таа нагласи дека имаат програми за обука на млади и на повозрасни луѓе, но фокусирани се на помладите зашто, како што рече, имаат и партнерство со Владата.
– Во Бугарија имаме успешни програми со кои ги обучуваме луѓето што доаѓаат од другите индустрии, каде ставката на невработеност е голема и ги пренаменуваме нивните вештини кон ИТ-секторот. Се надеваме дека тоа ќе го направиме и во Македонија – истакна Маринова.
