ЕФБ: Декларација за европско партнерство со Балканот, се бара искреност и брзина


Белград, 17 април, 2018 - 10:23 (META) 

Европското партнерство со Балканот мора да се темели на поискрени и потранспарентни односи кои и даваат предност на демократската трансформација, се наведува во Декларацијата за европско партнерство со Балканот, која беше промовирана синоќа на регионална конференција по повод 10-годишнината од Европскиот фонд за Балкан (ЕФБ) во Белград.

На одбележувањето и на промоцијата присуствуваше и шефот на македонската дипломатија Никола Димитров, кој беше и еден од главните говорници синоќа и рече дека „сите сме во ист чамец“.

„Крајно време е подрачјето на Западен Балкан во процесот на пристапување кон Европската унија храбро да се соочи со проблемите што го оптоваруваат и заеднички да гради иднина“, рече Димитров.

Во Декларацијата, меѓудругото се наведува дека „членството во ЕУ не е прашање на политички опортунизам, туку генерациска политичка и социјално-економска определба“.

„Сто години по завршувањето на Првата светска војна, 2018 година треба да значи историска пресвртница. Новата стратегија на Европската комисија и самитот за Западен Балкан закажан во мај 2018 година, ја потврдуваат цврстата определеност на ЕУ за исполнување на оваа цел“, се вели во Декларацијата.

Но, истовремено се предупредува од можна дестабилизација доколку не се искористи моментот.

„Ако регионот ја искористи оваа шанса, тој може да стане дел од ЕУ. Но, ако Западен Балкан ја испушти оваа шанса, ризикува да заостане зад ЕУ, без јасна визија, изложен на дополнителна дестабилизација“, се додава во неа.

На перспективите, но и можните негативни сценарија за Балканот, се осврна и поранешниот потпретседател на Европскиот парламент Ханес Свобода, кој се заложи за брзо „условено членство“.

„Помалку права и обврски, а доколку државата кандидат ги исполни сите услови успешно, станува полноправен член. Во спротивно ќе се случи катастрофа“, рече Свобода.

Конференцијата продолжува и денеска со учество на повеќе познати сегашни и поранешни политичари, меѓу кои се Димитров, Свобода, Ерхард Бусек, Горан Свилановиќ, како и околу 200 други угледни јавни личности, претставници на тинк-тенк организации или вработени во министерствата од земјите од регионот.


Анѓушев и Љајиќ ќе ја олеснуваат трговијата помеѓу Македонија и Србија


Белград, 12 април, 2018 - 16:19 (META) 

Вицепремиерот за економски прашања, Кочо Анѓушев кој денеска е во официјална посета на Србија, одржа состанок со потпретседателот и министер за трговија, туризам и телекомуникации, Расим Љајиќ.

Вицепремиерите, како што соопштуваат од кабинетот на Анѓушев, се договориле Владите до 30 јуни да ги потпишат и ратификуваат Меморандумот за соработка во областа на безбедност на храна и ветеринарнство и Меморандум за фитосанитарна соработка, со кои, меѓусебно ќе бидат признаени сертификатите на двете земји.

„На тој начин ќе престане потребата за двојно земање на примероци и анализа на прехранбените производи, што во голема мера ќе ги намали дополнителните и непотребните трошоци со кои се соочуваат стопанствениците од двете земји. Анѓушев и Љајиќ се согласија, дека до тогаш, двете влади ќе ги превземат сите неопходни мерки се со цел олеснување на трговијата и отстранување на вонцаринските бариери при трговијата на двете земји“, се вели во соопштението од кабинетот на вицепремиерот.

Во соопштението се додава дека српските гранични служби, се обврзуваат да ги отстранат бариерите во трговијата на ориз, сувомеснати и млечни производи од Македонија во Србија, што беше и главното барање на македонските компании кои извезуваат во Србија.

„Во исто време, од македонска страна е договорено, како привремено решение да се работи на враќање на стариот Правилник за контролните маркици за брашно, кој важеше до 7 февруари оваа година. Но, во тој случај, при увозот на брашно треба да се овозможат услови за непречен инспекциски увид на увозното брашно од страна на инспекторите на македонската Агенција за храна и ветеринарство на граничниот премин, со што ќе се контролира дали маркиците се соодветно залепени на брашното и дали брашното има соодветна декларација“, се додава во соопштението.


Триесет општини ја потпишаа Декларацијата за отвореност, отчетност и транспарентност


Скопје, 12 декември, 2017 - 19:07 (META) 

Уште седум градоначалници денеска ја потпишаа Декларацијата за отвореност, отчетност и транспарентност на локалната самоуправа, која беше составена на иницијатива на Фондацијата за интернет и општество „Метаморфозис“.

Со потписите на градоначалниците на Аеродром, Боговиње, Врапчиште, Гази Баба, Желино, Ѓорче Петров и Карпош, бројот на потписниците на Декларацијата се зголеми на 30.

Фондацијата за интернет и општество „Метаморфозис“ пред три недели достави писмо за интерес до сите градоначалници за потпишување Декларацијата, која се темели на истражување во 2016 година, дека локалната самоуправа исполнува само 27% од индикаторите за отвореност, поради што Република Македонија е на најниско ниво од земјите во регионот.

– Овој податок е загрижувачки со оглед дека мерењето е направено на обезбедувањето на пристап до информации кои треба да се објавени на општинските веб страници без да бидат побарани, како на пример, одлуките кои ги носат Советите на општините, одлуките кои ги носат градоначалниците, записниците од седниците на советите на општините, Статутот на општините и деловниците за работа на Советите. Во тие рамки, сметавме дека е соодветно да ги поканиме градоначалниците во изминатите три недели да потпишат документ, со кој, не само што ќе покажат дека ги препознале основните принципи на нивното работење, ами и се согласни да работат по нив. На тој начин го одбележавме и 9. декември – Денот на борба против корупција, како и 10. декември – Меѓународниот ден на човековите права – истакна директорот на „Метаморфозис“, Бардил Јашари.

Според истражувањето, на ниското исполнување на индексот на достапност од страна на општините влијаела и нивната недоволна интеракција со граѓаните преку социјалните мрежи, необјавувањето на месечни информатори за граѓаните за работата на општините, како и недостатокот на јавни дебати за граѓаните за прашања од локално значење, необјавување на планови за јавни консултации со граѓаните за општинските политики и записниците од одржани средби со граѓаните.

– За подобрена транспарентност на македонските општини, секоја активност која е финансирана со јавни пари мора да биде јавна, а информациите за овие активности мора да бидат еднакво и лесно достапни за сите граѓани за што се залагаме и во нашето работење – рече градоначалникот на општина Гази Баба, Борче Георгиевски, кој заедно со градоначалникот на општина Карпош, Стефан Богоев, беше ко-организатор на денешниот настан.

Претходно, Декларацијата за отвореност, отчетност и транспарентност на локалната самоуправа ја потпишаа градоначалниците на Битола, Брвеница, Бутел, Велес, Вевчани, Демир Хисар, Жупа, Илинден, Кавадарци, Кратово, Крушево, Куманово, Крива Паланка, Лозово, Македонски Брод, Маврово и Ростуше, Радовиш, Охрид, Теарце, Тетово, Зелениково, Зрновци и Штип.

Другите градоначалници можат да се приклучат кон потпишување на Декларацијата до 25 декември годинава.


Рахој бара од каталонската влада да разјасни дали прогласила независност или не


Мадрид, 11 октомври, 2017 - 12:52 (META) 

Шпанскиот премиер Маријано Рахој денеска на прес-конференција соопшти дека ќе бара од каталонската влада да разјасни дали Каталонија прогласила независност или не.

Рахој рече дека се бара појаснување пред да биде преземена каква било акција, во согласност со членот 155 од уставот на Шпанија.

Портпаролот на каталонската влада, Жорди Турул, за „Радио Каталонија“ утрово изјавил дека доколку шпанската влада одлучи да интервенира во врска со регионалните автономни овластувања, тој потег ќе биде протолкуван како знак дека Мадрид не е подготвен за преговори и Каталонија ќе биде обврзана да тргне кон својата независност.

Претседателот на каталонската регионална влада, Карлес Пучдемон, доцна синоќа ја потпиша декларацијата за прогласување независност на Каталонија, но го суспендираше нејзиното стапување на сила за да остави простор за дијалог со Мадрид.


Владата ги повика институциите да гарантираат слободни и фер избори


Скопје, 16 септември, 2017 - 14:14 (META) 

Во пресрет на локалните избори, Владата на својата 26. седница донела декларација за заложби за слободни и фер избори и усвоила упатства за постапување на министерствата и на инситуциите за време на изборен процес.

„Со упатствата се утврдуваат и насоките за начинот на постапување на министерствата, другите органи на државна управа и управни организации во врска со користењето на движните и недвижните предмети во државна сопственост за време на изборниот процес“, стои во соопштението од Владата.

Владата ги повикува сите органи на државната управа да ги преземат сите неопходни законски мерки, како и политички и институционални чекори за да го гарантираат неприкосновеното избирачко право на секој граѓанин.

„Со донесената декларација, Владата ги повика и вработените во органите на државната управа да пријавуваат евентуални случаи на притисок до надлежните органи, а доколку се утврдат злоупотреби ќе се преземат соодветни мерки“, се додава во соопштението.


ССК потпиша договор за соработка со стопанската комора на Пекинг


Подгорица, 15 септември, 2017 - 13:41 (META) 

Сојузот на стопански комори на Македонија (ССК) потпиша договор за зајакнување на трговската и на економска соработка со Стопанската комора на Пекинг.

ССК исто така потпиша декларација за воспоставување механизми на лидерите на носечките комори на земјите од Централна и Источна Европа (ЦИЕ) во процесот 16 + 1 кој има цел да ја зголеми соработка на Кина со земјите од ЦИЕ.

„Потпишаните договори со прецизно воспоставени цели и активности на дејствување, значат нови можности за македонските компании, преку ССК активно да се вклучат во иницијативите за зголемување на соработката и трговските партнерства со Кина и 16 земји вклучени во овој мегапроект за економска, политичка и за културна соработка. Сите организации потписници на декларацијата се обврзани да ги имплементираат резолуциите донесени на тркалезната маса, што ќе значи зајакнување на комуникацијата и на меѓусебната соработката, поврзување, како и градење на трговски релации и промоција на инвестиции“, изјави претседателот на ИКТ Комората при ССК, Саша Огненовски.

ССК неколку години наназад активно учествува на форумите на 16+1 за подобрување на конкурентоста на македонските компании, за што активно работи и на промовирање на кинескиот мегапроект „Еден појас, еден пат“ за инфраструктурно и економско поврзување на Азија, Европа, Африка и на Блискиот Исток.


Реформаторите во Брисел ја презентираа декларацијата за eвропскa ВМРО-ДПМНЕ


Брисел, 31 август, 2017 - 11:50 (META) 

Членовите на иницијативата за внатрепартиски реформи во ВМРО-ДПМНЕ во Брисел се сретнале со членови на Европскиот парламент од Европската народна партија (ЕПП), на кои им ја презентирале декларација „Европска ВМРО-ДПМНЕ за европска Република Македонија“ и декларацијата за демократизација и за модернизација на ВМРО ДПМНЕ.

– Средбите што ги имавме во Брисел ја покажаа поддршката која ја имаме, не само меѓу членството во ВМРО-ДПМНЕ, туку и кај политичарите од сестринските партии во Европа. Оваа поддршка недвосмислено кажува дека партијата треба да се реформира како услов за деизолција и за враќање на угледот на ВМРО ДПМНЕ, кој во изминатите години беше нарушен со погрешни политики – вели Александар Михајлоски од иницијативата.

Тој соопшти дека имале голема поддршка за унапредување и за модернизирање на ВМРО-ДПМНЕ низ реформските процеси што ќе придонесат Европската народна партија повторно да има силен партнер во  Македонија.

– Во наредниот период таа поддршка и јавно, преку пораки и настапи, ќе биде дадена на внатрепартиската инцијатива за реформи, за Македонија забрзано да се придвижи кон членство во ЕУ и во НАТО, бидејќи на Македонија ѝ треба силна, проевропска и конструктивна ВМРО-ДПМНЕ – додава Михајловски.


Мемеди: Имплементацијата на точките од декларацијата оди добро


Скопје, 19 јули, 2017 - 16:49 (META) 

Донесување на законот за албански јазик, имплементација на точките од декларацијата на Албанците, разговорите што Македонија ги има со Грција, најавениот договор за добрососедство со Бугарија, биле темите на кои денеска било разговарано на средбата на албанските политички партии во Собранието.

Иницијаторот на средбата за разгледување на точките од декларацијата помеѓу албанските партии, Весел Мемеди од НДП, денеска порача дека нема да дозволат во ниту еден момент некој да ги сатанизира средбите и договорот што го направија албанските партии.

– Потребата за донесување на законот за албанскиот јазик е усогласена. Паралелно сите овие работи ќе одат на Венецијанската комисија и ќе бидат на дневен ред во Собранието. Очекуваме Венецијанската комисија многу бргу да донесе правен совет за законот за албанскиот јазик – изјави Мемеди.

Тој оцени дека динамиката на имплементацијата на точките од Декларацијата на Албанците од страна на Владата оди добро и дека сите точки ќе бидат прифатени од Собранието.

Според него, решавањето на спорот за името со Грција треба да почне што поскоро за Македонија да стане членка на ЕУ и на НАТО и преговорите да течат паралелно. Тој информираше дека сите партии од албанскиот блок, го поддржале потпишувањето на договорот за добрососедство со Бугарија.

Средбата помеѓу албанските партии повторно ја бојкотираше Движењето Беса.


Едногласно усвоена предлог-декларацијата за забрзување на процесот за зачленување на Македонија во ЕУ и во НАТО


Скопје, 14 јули, 2017 - 17:35 (META) 

Собраниската Комисија за европски прашања денеска ја усвои предлог-декларацијата за забрзување на реформските и интегративните процеси за зачленување на Република Македонија во ЕУ и во НАТО.

Комисијата бара предлог-декларацијата да биде ставена на дневен ред на посебна наредна седница.

Во документот се наведува дека се потврдува натпартиската сплотеност околу заедничките напори за обезбедување позитивна клима за реализирање на стратешката определба за членство во ЕУ и во НАТО. Исто така, се поттикнува Владата на доследно, неодложно и итно спроведување на итните реформи. Комисијата со документот, исто така, бара заложба за независно судство, транспарентност и ефикасност на судовите, професионализација на администрацијата, зајакнување на регулаторните тела, како и на социјалната кохезија и меѓуетничките односи и унапредување на односите со соседството.

Со предлог-декларацијата се повикуваат членките и институциите на ЕУ да дадат засилена поддршка за членство во ЕУ и во НАТО. Со документот, кој пратениците би требало да го усвојат на следната седница, се повикува Владата редовно да го информира Собранието за сите аспекти на интегрциите во ЕУ и во НАТО. Докуметот ќе биде испратен до Европскиот парламент (ЕП), претседавачот со Советот на министри на ЕУ, претседателот на Европски совет, генералниот секртетар на НАТО, како и до претседателот на Европската комисија и до земјите членки на ЕУ.


Димовски: Ќе гласаме за декларацијата, но не и за заклучоците за планот „3-6-9“


Скопје, 14 јули, 2017 - 16:30 (META) 

Координаторот на една од десетте пратенички групи на ВМРО-ДПМНЕ, Илија Димовски, на седницата на Комисијата за европски прашања соопшти дека партијата ќе ја поддржи декларацијата за забрзување на реформските и на интегративните процеси, но не и заклучоците. Тој, исто така, побара во декларацијата да се вметне точка со која ќе се бара почитување на пресудата на Меѓународниот суд на оправдата во Хаг во евроатлантските интеграции на земјата.

Димовски рече дека владиниот план „3-6-9“ не е ништо поинаков од плановите што претходната влада ги правела по секој извештај на Европската комисија, но за разлика од сега, тогашната влада во изработката на плановите ги вклучувала и опозицијата и другите партии.

– Бидејќи во составот на оваа влада имате министри од претходниот состав, можат да ве поучат – рече Димовски, додавајќи дека ќе поддржат дел од владиниот план, односно сето тоа што е за доброто на граѓаните.

Премиерот Зоран Заев истакна дека планот „3-6-9“ претставува реална перспектива на Република Македонија за евроатлантските интеграции, но и за подобрување на животот на граѓаните.

– Не бараме од опозицијата да прифати сè, само да дава идеи и да биде конструктивна, а владејачката партија да ги прифаќа позитивните предлози на опозицијата. Тоа е во интерес на сите – рече Заев.

Претседателот на Собранието, Талат Џафери, истакна дека со планот кој произлегува од Договорот од Пржино се зајакнува надзорот на Собранието врз Владата, но и врз Управата за безбедност и контраразузнавање (УБК) и врз Бирото за јавна безбедност (БЈБ), кои според планот ќе се реформираат.

– Потребно е одговорно однесување и на опозицијата, која деновиве со однесувањето во Собранието не ѝ помага на земјата во напорите за ЕУ и за НАТО и создава лоша слика надвор од земјата – рече Џафери.

Зекирија Ибрахими од Беса побара мнозинството и Владата да не ги отфрлаат предлозите од опозицијата по автоматизам, исто како што тие не треба да очекуваат дека сите нивни предлози ќе бидат прифатени.

Ибрахими, исто така, му порача на спикерот Џафери дека ако продолжи да ги прекинува седниците поради имендени за верски празници, како Петровден, тогаш би требало да нема седници во петок, кога се вршат верски обреди во муслиманските храмови.

Тој рече дека Беса ќе гласа за декларацијата и за заклучоците, но бараат од Владата да ги консултира за Законот за јазиците, реформите во администрацијата, образованието и судството, притоа посочувајќи дека начинот на кој функционира јавното обвинителство, но и СЈО, не е во функција и во интерес на сите граѓани. Како пример за тоа ги наведе случаите „Сопот“ и „Монструм“ за кои, како што рече, се вршел политички притисок.

На седницата присуствуваа голем дел од странските дипломати акредитирани во Македонија, како и преставници на невладиниот сектор и на другите собраниски комисии.

Во Комисијата продолжува расправата и се очекуваа да се гласа за декларацијата и за заклучоците.