!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ЕУ бара од САД да не се откажуваат од нуклеарниот договор со Иран


Брисел, 11 јануари, 2018 - 20:59 (META) 

Министерот за надворешни работи на Велика Британија, Борис Џонсон ги повика Соединетите Американски Држави да докажат доколку постои подобра алтернатива од договорот со Иран, кој ја ограничува нуклеарната програма на оваа земја, јавуваат белгиските медиуми.

Џонсон по разговорите со колегите од Иран и од Европската Унија денеска во Брисел изјавил дека Заедничкиот сеопфатен план за работа со Иран е значајно постигнување, кое го спречува Иран да добие нуклеарно оружје.

Шефот на британската дипломатија нагласил дека Иран во целост ги исполнува своите обврски од нуклеарниот договор, потпишна во 2015 година, пренесува „Би-би-си“.

Претседателот на САД, Доналд Трамп кој сака го измени или да излезе од договорот, во октомври, минатата година одби да го потпише документот со кој пред Конгресот на САД се потврдува дека Иран ги исполнува обврските од договорот.


Џонсон во декември ќе ја посети Русија


Лондон, 21 ноември, 2017 - 17:31 (META) 

Британскиот министер за надворешни работи, Борис Џонсон, се очекува кон крајот на декември да ја посети Русија, но засега нема барање за средба со рускиот претседател, соопшти заменик-шефот на руската дипломатија, Владимир Титов.

– Се очекува посетата да се случи во последните 10 дена на декември – рече Титов.

Џонсон требаше да ја посети Русија во април годинава, но посетата беше одложена подари нападите со хемиско оружје во Сирија.


Џонсон: Не сакаме во Зимбабве еден тиранин да наследи друг


Лондон, 15 ноември, 2017 - 17:55 (META) 

Британија не би сакала да види еден тиранин како менува друг во Зимбабве, откако војската ја презема власта во Харарех , вели шефот на британската дипломатија, Борис Џонсон.

-Никој не би сакал да види транзиција од еден неизбран тиранин на друг. Сакаме да видиме слободни и чесни избори – рече Џонсон во британскиот парламент.

Претходно денеска тој рече дека е тешко да се предвиди како ситуацијата во Зимбабве ќе се развива.

-Најважната работа е дека сите сакаат да видат стабилна и успешна Зимбабве и мислам дека ние навистина апелираме до сите да се воздржат од насилство – додаде Џонсон.


Нема докази дека Русија се вмешала во изборите во Велика Британија, смета Џонсон


Лонодон, 1 ноември, 2017 - 20:11 (META) 

Британскиот министер за надворешни работи, Борис Џонсон, денеска изјави дека нема докази дека Русија се мешала во изборите во Велика Британија.

„Не видов никакви докази. Колку што знам, Русија немаше никаква улога“, одговорил Џонсон на новинарско прашање во врска со улогата на Русија во британските избори.

Американската амбасадорка во Обединетите нации, Ники Хејли, неодамна ја обвини Русија дека се меша во изборите на другите земји за да ја поткопа нивната демократија.


Тереза Меј планира да го смени Борис Џонсон


Лондон, 8 октомври, 2017 - 16:40 (META) 

Британската премиерка Тереза Меј навести дека би можела да го смени министерот за надворешни работи, Борис Џонсон.
Најавата доаѓа во момент кога таа се обидува да го потврди својот авторитет по низата „политички катастрофи“, коментира „Ројтерс“, повикувајќи се на британскиот весник „Сандеј тајмс“.

Весникот наведува дека Меј сè уште не знае какви се нејзините планови за Џонсон, кој ѝ вети лојалност, но одредени сојузници на премиерката го обвинуваат дека ја поткопува со изнесување сопствени визии за излезот на Британија од ЕУ.
– Никогаш не бил мој стил да се кријам од предизвиците, а нема ни сега – рече Меј.

Оваа нејзина изјава британските медиуми ја толкуваат како знак дека е подготвена да воведе нови министри во својот кабинет и да ги отстрани тие што претставуваат проблем.

Меј нагласи дека дел од нејзината работа како премиерка е да обезбеди секогаш да ги има најдобрите луѓе во својот кабинет.

Авторитетот на Меј во нејзината Конзервативна партија опадна откако ги распиша предвремените парламентарни избори, на кои го изгуби мнозинството во парламентот.


Борис Џонсон: Британија ќе направи сè што може за Македонија да влезе во НАТО и во ЕУ


Трст, 13 јули, 2017 - 17:24 (META) 

Велика Британија ќе направи сè што може за да ѝ помогне на Македонија на нејзиниот пат за влез во Европската Унија и во НАТО, истакнал шефот на британската дипломатија, Борис Џонсон, на средбата со македонскиот премиер Зоран Заев, во рамките на самитот за Западен Балкан во Трст, Италија.

Џонсон, кој ја претставувал британската премиерка Тереза Меј на самитот, нагласил дека Британија останува партнер на Балканот и активен поддржувач на демократските процеси, како и дека пријателството со Македонија е клучно за реализација на оваа важна цел, стои во соопштението на Владата.

Џонсон, се наведува во соопштението, изразил јасна и голема поддршка на новата влада на Македонија.

Заев на средбата се заблагодарил за „огромната поддршка од Велика Британија за Македонија“ и рекол дека „новата влада ќе ја оправда добиената доверба преку посветена работа на демократски развој на Македонија и на регионот“.


Џонсон: Г7 разгледуваат воведување санкции за одредени Руси


Лука, 10 април, 2017 - 20:47 (META) 

Министерот за надворешни работи на Велика Британија, Борис Џонсон, изјави дека министрите на државите членки на Г7 разгледуваат воведување санкции за одредени Руси.

Како што рече Џонсон, санкциите би се вовеле поради поддршката што тие ја даваат на сирискиот претседател Башар ал Асад.

Џонсон наведе дека темата на разговорите кои се одржуваат во италијанскиот град Лука е „разгледување на можноста за санкции, на некои сириски воени лица и секако на руски воени лица“.

Министрите на државите членки на Г7 разговараат за одговорот на минатонеделниот напад со хемиско оружје, кој се случи во Сирија, а за кој САД ја обвинуваат владата на Башар ал Асад и неговите руски поддржувачи.


Борис Џонсон ја одложи посетата на Русија


Лондон, 27 март, 2017 - 18:36 (META) 

Шефот на британската дипломатија, Борис Џонсон ја одложи посетата на Русија поради промена на датумот за одржување на состанокот на министрите за надворешни работи на земјите членки на НАТО.

Џонсон требаше за време на посетата на Москва, прва во последните пет години, да разговара со руските власти за разликите помеѓу двете земји во врска со Сирија и Украина.

Според зборовите на портпаролот на Џонсон, шефот на британската дипломатија телефонски се слушнал со неговиот колега Сергеј Лавров и изразил надеж дека посетата повторно ќе биде договорена и тоа во најкраток можен рок.

Состанокот на министрите за надворешни работи на земјите членки на НАТО е закажан за 31 март.


Џонсон: Неприфатливо е мешањето на Русија на Балканот


Брисел, 6 март, 2017 - 15:44 (META) 

Британскиот министер за надворешни работи, Борис Џонсон, изјави дека Русија мора да престане со „неприфатливото“ мешање во прашањата на други држави, особено на Балканот и во Украина, за да има некаква шанса за нов почеток во односите со западните земји.

Џонсон при доаѓањето на состанокот на министрите за надворешни работи и за одбрана на земјите членки на ЕУ во Брисел рече дека „Русија прави многу лоши работи“.

– Тие вршат кибернетички напади, ги поткопуваат земјите од Западен Балкан. Видовте што се случи во Црна Гора, а да не споменувам што се случува во Источна Украина – рече Џонсон.

Шефот на британската дипломатија рече дека однесувањето на Москва е „целосно неприфатливо“ и дека тоа мора да се смени, за Русија да покаже дека може повторно да ѝ се верува.

Џонсон, кој наскоро треба да ја посети Москва, укажа дека никој во Европа и во САД не сака враќање на Студената војна и дека целта мора да биде „разговор со Русите“ за да се „вратат на подобриот пат“.


Шефот на британската дипломатија наскоро во посета на Москва


Лондон, 4 март, 2017 - 14:32 (META) 

Шефот на британската дипломатија, Борис Џонсон, наскоро ќе ја посети Москва, каде ќе разговара за разликите меѓу двете земји во врска со Сирија и со Украина, соопшти денеска британската канцеларија за надворешни работи, јавуваат светските агенции. Посетата на Џонсон на Москва треба да се случи наредните недели.

Џонсон, како што пренесуваат агенциите, ја прифатил поканата на својот колега, министерот за надворешни работи на Русија, Сергеј Лавров. Британската влада претходно соопшти дека „ќе соработува со Русија онаму каде што тоа е од национален интерес за Велика Британија“.

„Тема на разговорите ќе бидат британско-руските односи и актуелните меѓународни прашања, како што се Сирија и Украина, за кои имаме сериозни разлики во ставовите“, соопштиле од британската канцеларија за надворешни работи.

Покрај несогласувањата околу Украина и Сирија, Британија ја обвини Русија и за хакерски напади. Москва ваквите обвинувања ги отфрли како неосновани.

Последен британски министер за надворешни работи кој ја посети Русија беше Вилијам Хаг, во 2012 година.