fbpx

Харков опкружен и бомбардиран, Борис Џонсон вели дека потсетува на трагедијата на Сараево

-

Најмалку 21 цивил е убиен, а 112 се ранети во изминативе 24 часа поради руските гранатирања на украинскиот град Харков, јавуваат светските медиуми. Погодени се владини, но и бројни цивилни објекти во градот. Вториот по големина град во Украина брои 1,5 милиони жители и веќе со денови е опкружен од руските воени сили, јавува Гардијан.

Русите се обидоа во неколку наврати да го заземат Харков изминативе денови, а во најновиот обид од ноќеска руски војници слетале во градот и сега водат жестоки борби со украинските сили на неколку локации во градот. Украинските безбедносни сили информираа дека борби се водат околу воено-медицинскиот клинички центар во Харков, а нападнато е и регионалното седиште на полицијата, јавува Би-би-си.

Британскиот премиер Борис Џонсон изјави дека интензивното бомбардирање на Харков го потсеќа на нападите на српските сили на Сараево во 1990-тите години за време на босанскиот конфликт, пренесува Ројтерс.

„Ме потсетува, ако ништо друго, ако се сеќавате на гранатирањето на сараевскиот пазар од Србите, гранатирањето на невини луѓе во Босна, го имам тоа чувство за злосторство извршено намерно врз цивилен центар“, изјави Џонсон на прес-конференцијата одржана во Естонија.

Џонсон додаде дека гранатирањето на Харков е „апсолутно одвратно“, посочувајќи дека ваквите руски напади го обединуваат светот против Русија.

Во меѓувреме, руското Министерство за одбрана утрово соопшти дека нивната војска ја презела контролата врз украинскиот град Херсон на југот на земјата. Украинските власти ги демантираат ваквите тврдења на Русија и велат дека засега градот е опколен од сите страни од руските сили. Би-би-си тврди дека ако Русите го зазеле Херсон, тогаш тој град би им бил базата од каде што би го продолжиле нападот кон клучниот град на Црното море – Одеса.

На југот на земјата, руските сили го опколија и пристанишниот град Мариупол. Доколку го заземат, тогаш војската што ја нападна Украина од Крим ќе може да се спои со про-руските трупи коишто вршат напади од непризнаените држави Донецк и Луганск.

Во руското гранатирање што продолжи ноќеска на украинско тло погоден е градот Житомир. Најмалку две лица загинаа при бомбардирањето на воздухопловната база во градот, откако ракетите погодиле цивилни објекти во близина на базата.

Вчера доцна попладне во воздушен напад на телевизиската кула во Киев загинаа најмалку пет лица, а дополнителни пет лица беа повредени.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

Посебен сообраќаен режим в недела заради атлетска трка на Средно Водно

Во недела, со почеток во 9 часот, поради атлетска трка на 10 километри, со траса на движење од долниот паркинг на Средно Водно по регионалниот пат (Р2138) до паркингот...