Апелација ги замени условните казни со затворски за тепачите од Собранието


Скопје, 2 јули, 2018 - 15:12 (META) 

Скопскиот Апелациски суд ги преиначил во затворски првите девет условни казни за насилство во Собранието на 27 април 2017 година, јави Алсат М.

Девет обвинети лани во мај признаа дека учествувале во толпа која сторила насилство, а Кривичниот суд на сите истиот месец им пресуди условни казни.

По жалбите на Обвинителството, Апелација условните ги преиначи во ефективни затворски казни и сите девет лица, ќе треба да одат во затвор. Меѓу осудените највисока казна доби Димче Христовски викан Жабата кој беше осуден на една година и шест месеци условен затвор.

Решенијата за преиначување на казните треба да бидат препратени во Основен суд Скопје 1 денеска.


Една година затвор за поседување оружје за дедото на малата Тамара


Скопје, 27 јуни, 2018 - 10:44 (META) 

Апелациониот суд ја преиначи пресудата за дедото на малата Тамара од Велес, кој беше осуден на условна казна затвор за поседување оружје по признанието на вина. Одлуката следува по жалбата на Обвинителството. Љупчо Стојановски со одлуката на второстепениот суд е осуден на ефективна казна затвор од 1 година.

На 11 јули се закажани завршните зборови за второто кривично дело „обид за убиство“. Адвокатката Павлина Зефиќ рече дека ќе ги вложат сите правни лекови за да ја оспорат пресудата.

Стојановски на 1 јуни минатата година пукаше во поранешниот министер за здравство, Никола Тодоров. Тој се товареше за две кривични дела – обид за убиство и недозволено изработување, држење и тргување со оружје или распрскувачки материи.

Според она што го кажал пред полицијата, тој дошол утрината сам во Скопје. Кај себе имал повратен билет за Велес. Кажал дека тој најпрвин го чекал Тодоров дома, но ексминистерот не се појавил. Потоа дошол пред Министерството за здравство и веднаш кога му се појавил пред очи, почнал да пука кон него. Тодоров не беше повреден.


Апелација му ја укина затворската казна на бегалецот Грујевски за „Тврдина 2“


Скопје, 30 мај, 2018 - 16:43 (META) 

Апелацискиот суд во Скопје ја укина пресудата за поранешниот  началник на Петтата управа во УБК, Горан Грујевски, во предметот на СЈО „Тврдина 2“. Со пресудата, Грујевски кој сега е бегалец во Солун, беше осуден на година и пол затвор за уништување списи и документи за незаконското прислушување.

Тоа значи дека за овој предмет, судењето за Грујевски треба да почне од почеток. Oва е одлуката на тричлениот кривичен совет со кој претседаваше судијката Цветанка Периќ по жалбата на адвокатите на Грујевски. Јавната седница се одржа годинава кон крајот на март.

Причината за укинувањето на пресудата за случајот „Тврдина 2“, која ја донесе судијката Лидија Петровска, позната од „бомбите“, е тоа што не биле исполнети законските услови за на обвинетиот Грујевски да му се суди во отсуство.

Грујевски, инаку е обвинет и во случајот за масовното прислушување „Тврдина – Таргет“ и во предметот „Трезор“, а против него СЈО ја води истрагата „Странски служби“, за набавка на опремата за прислушување.


„Диво Насеље“: Пресудата се преведува, жалбите се процесуирани, предметот оди во Апелација


Скопје, 8 мај, 2018 - 14:58 (META) 

На 2 ноември минатата година, две години и пет месеци по настаните 9 и 10 мај 2015 година во кумановската населба, и година и осум месеци по почетокот на судењето на 8 февруари 2016 година, Основен суд Скопје 1 ги изрече првостепените пресуди против обвинетите.

Осуммина обвинети за тероризам и терористичка организација за настаните во кумановско Диво Насеље од 9 и 10 мај 2015 година добија доживотни казни затвор, 13 обвинети добија по 40 години затвор, шестмина по 20 години, еден обвинет 18 години, двајца по 14 години, двајца по 13 години затвор и двајца по 12 години затвор.

Адвокатите веднаш најавија жалби, а случајот се уште не е стасан во Апелациски суд Скопје, за второстепено одлучување.

Како што објаснија од Основен суд Скопје 1, жалбите се процесуирани, а во моментот пресудата се преведува на албански јазик, и набргу предметот ќе биде доставен до Апелација.

– Од страна на одбраната во предметот, до судот доставени се повеќе жалби изјавени против првостепената пресуда. Во моментов се врши превод на пресудата на албански јазик, кој е во финална фаза, по што пресудата ќе биде доставена до обвинетите и откако ќе се комплетира доставата, предметот веднаш ќе биде доставен до Апелациониот суд на надлежно постапување – одговорија од Кривичниот суд на прашање од „Мета“ до каде е постапката со испраќање на предметот во повисокиот суд.

По пресудата и владејачката ДУИ, но и нејзиниот лидер Али Ахмети, го повторија ставот дека ќе бараат меѓународна истрага, а и премиерот Зоран Заев нагласи дека мора да има меѓународен експерт за случајот за кој СДСМ тврдеше дека е фингиран од тогашната власт на ВМРО-ДПМНЕ.

За расчистување на случајот формирана е собраниска Анкетна комисија, која освен конститутивната седница, не напреднала многу.

Поради пресудата се протестираше во Македонија, Косово, а имаше и мал протест во Албанија.

Косовската влада на 29 семејства на загинатите и осудените за настаните во Диво Насеље им исплати по 10.000 евра.


ЗНМ: Неодговорното однесување на некои судии е заобиколен обид за лиценцирање на медиуми и новинари


Скопје, 8 мај, 2018 - 12:57 (META) 

Здружението на новинари на Македонија е незадоволно од начинот како Граѓанскиот суд во Скопје и Апелацискиот суд во Скопје го применуваат Законот за граѓанска одговорност за навреда и клевета, рече денеска на прес-конференција претседателот на ЗНМ, Насер Селмани.

Тој додаде дека „и покрај јасната одредба во законот, кој ја регулира одговорноста на електронските публикации, овие судови продолжуваат да ги одбиваат тужбите за клевета и навреда против онлајн медиумите со крајно несериозно и тенденциозно објаснување дека тие не биле медиуми, а луѓето што работат таму не биле новинари.“

– Ваквото паушално, неодговорно и непрофесионално однесување на одредени судии претставува заобиколен обид за лиценцирање на медиуми и новинари, која е крајно недемократска практика присутна во авторитарни земји. Потенцираме дека работа на судовите не е да ги толкуваат законите, туку доследно и неселективно да ги применуваат. Се сомневаме дека зад ваквата судска пракса на Граѓанскиот суд во Скопје и на Апелацискиот суд, има политичка позадина, која треба да ги дискредитира онлајн медиумите и да обезбеди лажно алиби на владата за да воведе нивна построга регулација, спротивно на европските стандарди за слобода на интернет – изјави Селмани.

Тој предупреди дека „обидите на одредени партиски кругови, кои бараат наводна законска регистрација на овие медиуми, е опасна политичка игра, која има за цел државата да ја контролира нивната медиумска содржина.“

– Освен тоа, намерата на судот е да ги спречи онлајн медиумите и новинарите кои работат таму да ги користат поволностите што ги нуди законот за граѓанска одговорност за клевета и навреда, како што е ограничувањето на надоместоците за нематеријална штета и основите за нивно исклучување од одговорност. Убедени сме дека ваквата чудна судска пракса, која за среќа ја нема и во другите апелациски судови во земјата, ја загрозува слободата на говорот и ја дискредитира новинарската професија и улогата на медиумите во едно демократско општество – додаде Селмани.

ЗНМ, од Врховниот суд бара во најкраток рок да постапи по барањето за усогласување на судската пракса, и во иднина, Граѓанскиот суд и Скопска Апелација да ги процесуираат предметите.

– Неделава ќе доставиме претставка и до Судскиот совет за сите судии што несоодветно и селективно го применуваат Законот, со цел, да утврди одговорност за таквото незаконско однесување. Ја повикуваме и меѓународната заедница, Европската Унија,  САД, ОБСЕ и Советот на Европа да ја споделат со овие судови нашата загриженост со цел да се спречи ваквиот атак против слободата на говорот, професионалните онлajн медиуми и обидот за нивно лиценцирање – рече Селмани.

На прашањето на „Мета“ од кога е забележана ваквата пракса од страна на судовите врз новинарите, Селмани појасни дека оваа појава ја имало и порано, но сметале дека во комуникација со нив преку состаноци, ќе ги убедат да ја променат или да ја усогласат судската пракса со останатите апелациски подрачја.

– Меѓутоа деновиве добивме една нова одлука на Апелацискиот суд, каде што не само што до сега правеа обид да ги дискредитираат онлајн медиумите, во оваа нова пресуда има полоша тенденција, луѓето кои работат во тие медиуми, ги третираат како не-новинари. Законот за граѓанска одговорност е многу јасен и тие треба тој закон да го применуваат. Затоа што, очигледно нивната намера е да создадат перцепција во јавноста дека овие медиуми работат надвор од законот, што не е точно – појасни Селмани.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


Апелација го потврди притворот на Митко Чавков


Скопје, 11 април, 2018 - 16:16 (META) 

Скопска Апелација го потврди решението на Кривичниот суд со кое поранешниот министер за внатрешни работи и екс директор на Бирото за јавна безбедност, Митко Чавков останува во притвор.

Од Апелација велат дека е отфрлено и барањето за обезбедување гаранција за пуштање да се брани од слобода, бидејќи тоа било некомплетно.

Чавков заедно со уште четири лица беа вратени во притвор на 28 март со одлука на Кривичниот суд, еден ден откако Врховниот суд ги пушти од истражниот затвор во куќен притвор.


Пешевска останува во куќен притвор, пресече Апелација


Скопје, 22 јануари, 2018 - 18:41 (META) 

Апелацискиот суд ја потврдил одлуката на Кривичен суд, за продолжување на куќниот притвор на пратеничката од ВМРО-ДПМНЕ, Жаклина Пешевска за учество во насилството во Собранието на 27 април минатата година.

На денешната јавна седница таа кажа дека не сторила тероризам и не ја загрозила безбедноста на македонскиот народ. Пешевска се произнесе дека не е виновна и бараше да и се укине куќниот притвор.

– Не можам да повторам дело кое не сум го ни извршила. Не мислам да бегам и да влијаам врз сведоци. Ги понудив и двата пасоша, ако има потреба. Немам ниеден ден отсуство во Собранието. Мајка сум на три малолетни деца. Живеам со стари свекор и свекрва за кои се грижам. Загрозена ми е здравствената состојба, како и на моите деца кои се под третман на психолози – рече Пешевска.

До сега Апелација ги потврди одлуките на Кривичниот суд за сите осомничени за настаните од крвавиот четврток во Собранието.


Не сум сторила тероризам, со моето апсење е прекршен Уставот, рече Пешевска во Апелација


Скопје, 22 јануари, 2018 - 15:01 (META) 

Не сум сторила тероризам, не сум ја загрозила безбедноста на македонскиот народ. Повреден е законот и Уставот со моето апсење. За полицијата не важеше мојот пратенички имунитет. Бев држена 16 часа со лисици на рацете, рече пратеничката на ВМРО-ДПМНЕ Жаклина Пешевска на денешната јавна седница на Апелацискиот суд во Скопје за продолжувањето на куќниот притвор кој и беше изречен, пренесе „Макфакс“.

-Не можам да повторам дело кое не сум го ни извршила. Не мислам да бегам и да влијаам врз сведоци. Ги понудив и двата пасоша, ако има потреба. Немам ниеден ден отсуство во Собранието. Мајка сум на три малолетни деца. Живеам со стари свекор и свекрва за кои се грижам. Загрозена ми е здравствената состојба, како и на моите деца кои се под третман на психолози – рече Пешевска.

Таа се произнесе дека не е виновна и бараше да и се укине куќниот притвор.

Според адвокатот Боро Тасевски, решението на кривичниот суд за куќниот притвор не содржи факти и докази. Тасевски пред тричлениот судски совет рече дека во постапката за продолжување на притворот биле прекршени нејзините права.

-Се прашуваме кое кривично дело би го повторила или би сторила ново дело? Настаните за кои е обвинета се случувале пред повеќе од 6 месеци. Таа дури пред два дена беше повикана да даде исказ во Обвинителството – рече Тасевски.

Вишото јавното обвинителство бара да остане мерката куќен притвор. Сметаат дека со оваа мерка не се повредени законите и меѓународните конвенции.

-Неоснована е жалбата дека на семејството не може да им укаже лекарска помош – рече вишата јавна обвинителка.


Пепиќ вели дека во Собранието бил службено, а по негова идеја ја евакуирале Шекеринска


Скопје, 11 јануари, 2018 - 14:12 (META) 

Мунир Пепиќ, полицискиот службеник осомничен поради насилствата во Собранието на 27 април минатата година, до Советот кој во Апелациски суд – Скопје денеска ја разгледува неговата жалба за новиот притвор, рече дека во Собранието бил на задача оти следел едно лице, а потоа помогнал во евакуацијата на Радмила Шекеринска.

Неговиот адвокат Еленко Миланов од Советот на скопска Апелација, кој решава за жалбите за притворите, побара притворот на неговиот клиент да биде заменет со домашен притвор или со друга, поблага мерка. Спомена дека Пепиќ е обвинет и во случај на СЈО каде му се одредени мерки за претпазливост, кои како што рече, ги почитувал се до притворањето.

Еленов исто така рече дека Пепиќ на 27 април не бил присутен како дел од масата, туку службено по наредба на неговите претпоставени и дека доказот за тоа е обезбеден од обвинителството.

Мунир Пепиќ во своето обраќање рече дека во Собранието бил бидејќи по наредба следел едно лице, а во еден момент се нашол во просторијата каде биле повредените пратеници. Тврдеше дека учествувал во евакуацијата на Радмила Шекеринска и дека негова била идејата да ја маскираат како медицинско лице за да можат да ја изнесат.

Претставникот на Вишото јавно обвинителство пак побара да се отфрли жалбата на Пепиќ и да се потврди 30-дневниот притвор што му го изрече Основен суд Скопје 1.

Пепиќ беше донесен во Апелација со лисици на рацете и со полициска придружба, а на истиот начин од истражниот затвор Шуто Оризари беше донесен и Митко Чавков, директор на Бирото за јавна безбедност во времето кога се случуваа бруталните насилства во Собранието. Сепак, пред Чавков на ред дојде жалбата на Душко Лазаров.

Се очекува Советот на Апелациски суд Скопје денеска да заседава и за жалбата на Игор Дурловски, поранешен директор на Македонска опера и балет.


Обвинителството бара да се укине притворот на актерот Владо Јовановски


Скопје, 10 јануари, 2018 - 15:38 (META) 

Претставникот на Вишото јавно обвинителство, Јован Цветановски до Советот кој во Апелациски суд – Скопје денеска ја разгледуваше жалбата за притворот за актерот Владо Јовановски поради насилствата во Собранието на 27 април минатата година, побара актерот да биде пуштен од притвор и да му се изрече поблага мерка за обезбедување присуство. Според Цветановски, Советот на Основен суд Скопје 1 при продолжувањето на притворот погрешно ја утврдил фактичката состојба.

Обраќајќи се до тричлениот совет на Апелацискиот суд, на чело со претседавачот Јани Нича, адвокатите на Јовановски, Ставре Џиков и Дончо Наков, исто така побараа да му се укине притворот на Јовановски. Наков порача и дека е крајно време да се утврдат критериумите за одредување на мерка притвор од првостепените судови и да не се се изготвуваат идентични решенија во секој случај.

За разлика од случајот на Јовановски, на другите две седници на кои скопска Апелација денеска ги разгледуваше жалбите за притворите на Оливер Поповски од Шестата управа и на  Горан Ѓошевски, шеф на обезбедувањето на поранешниот претседател на Собранието, Трајко Вељаноски, претставниците на Вишото јавно обвинителство побараа трочлениот совет да ги потврди мерките за продолжување на притворот.

Според обвинителот, наводите во жалбата на Поповски, кој не присуствуваше на седницата, а беше застапуван од Ставре Џиков, се неосновани. Според Џиков, пак, тричлениот совет на Апелацискиот суд на Поповски наместо притвор треба да му одреди куќен притвор или друга поблаги алтернативни мерки.

И за Горан Ѓошевски Вишото јавно обвинителство побара да му биде продолжен притворот и оцени дека Советот на Кривичниот суд правилно ги согледал доказите кога ја одредил мерката притвор.

Одлуките на тричлениот совет за жалбите на тројцата притворени може да се очекуваат најрано утре.