Апелациониот суд Скопје ја укина пресудата за предметот „Меѓународен сојуз“, во кој првообвинетиот Бојан Јовановски беше осуден на деветгодишна затворска казна. Со решение, судот ги уважил жалбите на обвинетите Б.Ј., Ј.Е., Х.Б. и обвинетото правно лице М.С.
„Апелациониот суд донесе пресуда со која делумно ги уважи жалбите на Основното јавно обвинителство за гонење организиран криминал и корупција Скопје и на обвинетиот М.J. на начин што пресудата на Основниот кривичен суд Скопје КОК.бр.49/20 од 07.04.2022 година ја потврди во ослободителниот дел по однос на обвинетите Ф.Т.Р. и Х.Б. за кривично дело Измама од член 247 став 4 в.в со став 1 и в.в. со член 24 од Кривичниот законик и ја преиначи во осудителниот дел – делот на одлуката за кривичната санкција по однос на обвинетиот М.Ј. од С., за кривично дело Неовластено изработување, држење, посредување и тргување со оружје или распрскувачки материи од член 396 став 1 од Кривичниот законик со што обвинетиот М.Ј. од С. се осудува на казна затвор во траење од 1-една година“, наведено е во соопштението од Судот.
Судењето за случајот со невладината организација „Меѓународен сојуз“ на Бојан Јовановски (Боки 13) во која беа обвинети Јовановски, неговиот татко Миле Јовановски, Јасна Мандиќ и Фросина Ременски и Христина Блажеска, за делата „перење на пари“ и „измама“, започна на 21 јули 2020 година.
Јовановски, како прв човек на организацијата, во предметот е првообвинет за кривичните дела перење пари и за измама, а Ременски беше третообвинета за помагање во делото измама. Таткото на Боки, Миле Јовановски, се товареше за помагање во перењето пари, како и за незаконско изработување, држење, посредување и тргување со оружје бидејќи при претрес во неговиот дом биле пронајдени три полуавтоматски пиштоли и муниција за кои немал дозвола.
