ВМРО-ДПМНЕ: Неточно е дека преговараме за амнестија


Скопје, 20 јули, 2018 - 14:21 (META) 

Апсолутно е неточно дека ВМРО-ДПМНЕ бара и преговара некаква амнестија. Ваквите неточни брифирања од СДСМ се само обид да се дефокусира вниманието на јавноста од актуелните случувања поврзани со штетниот договор со Грција кој ВМРО-ДПМНЕ не го прифаќа, порача најголемата опозициска партија.

„СДСМ треба да престане да ја дезинформира јавноста и да дефокусира од заложништвото во кое ја втурна прифаќајќи го штетниот договор со Грција. И во однос на некои надежи и пишувања дека се договарало некаква возратна амнестија во стилот СДСМ сега, па потоа ВМРО-ДПМНЕ кога ќе дојде на власт ќе овозможи друга амнестија, би порачале дека најдобар демант за ова ќе биде времето кое ќе покаже дека одговорност ќе има за сите оние пречекорувања на Уставот и законите кои сега се случуваат“, се вели во соопштението.


Контраспин: Петте струмички студенти, петте пратеници на ВМРО-ДПМНЕ и Мицкоски


Скопје, 9 јули, 2018 - 17:14 (META) 

Барањето за амнестија може да биде поставено, но само откако сите ќе дознаеме што навистина се случи на 27 април 2017 година. А, да се споредуваат тие настани, петте обвинети пратеници на ВМРО-ДПМНЕ и петте стрелани струмички студенти во 1951 г. е неумесно, невкусно и калкулантски, пишува „Вистиномер.мк“.

Лидерот на ВМРО-ДПМНЕ, Христијан Мицкоски, од говорот на протестниот марш на неговата партија во Струмица даде изјави што ги оценуваме како спин:

Спин: И на ова лудило на политички реваншизам мора еднаш, еднаш засекогаш да му дојде крајот, затоа што премногу долго се делиме на ваши и наши, на Македонци, и помалку Македонци и затоа апелирам е потребна амнестија за луѓето од 27 април, затоа што мора да продолжиме напред, а нема напред ако живееме во минатото. Тоа е она што го бараме. И тоа е она за што ќе се бориме и ќе се залагаме.

Контраспин: Христијан Мицкоски недвосмислено, не по прв пат, побара амнестија за сите инволвирани во настаните од 27 април 2017 година во Собранието на РМ, но упорно одбива да даде своја или партиска квалификација на тие настани.

Нешто што е најблиску до квалификација на настаните е реченицата на Мицкоски дека луѓето „се воделе од чесна идеја и мисла“, а дека мотив им бил „Република Македонија“. Притоа, тој негира дека има какво било кривично дело, туку обвиненијата и досегашните пресуди ги сведува на политичка хајка:

„Ако кренете главата може да ви случи ова“, тоа е пораката. ВМРО-ДПМНЕ има денес 5 пратеници кои се теретат за нешто што не го направиле, односно за тероризам, а немојте никогаш да помислите дека ги заборавам и оние наши браќа и сестри кои сега се по затворите, и кои се дел од оваа конструирана политичка хајка, насочена против секој слободномислечки Македонец. Јас ги живеам нивните судбини. И не заборавајте дека, сепак, има невини луѓе по затвортите, затоа што се воделе од чесна идеја и мисла и единствен мотив им била нивната татковина Република Македонија.

Претседателот на ВМРО-ДПМНЕ, барајќи амнестија за настаните од 27 април 2017 година, практично спинува дека станува збор за „чесна идеја и мисла и единствен мотив им била нивната таковина Република Македонија“.

Спинот е очигледен, бидејќи никој кој се води од чесна идеја и мисла, нема да ја доведе Република Македонија пред работ на граѓанска војна, пред работ на воведување на вонредна состојба, пред работ на неизвесност и грч на своето население, а особено нема да дозволи загрозување на невини животи на пратеници, граѓани, новинари, службени лица вработени во Собранието…

Целата статија прочитајте ја на „Вистиномер.мк“.


Мијалков и во „Тортура“ се повика на амнестијата од Иванов


Скопје, 9 јули, 2018 - 11:56 (META) 

Поранешниот директор на УБК Сашо Мијалков, првообвинет во предметот на СЈО „Тортура“ за апсењето на Љубе Бошкоски, како и останатите пет обвинети полициски „алфи“, се повикаа денеска на амнестијата што им ја даде претседателот Ѓорге Иванов.

Со амнестијата не е опфатен само обвинетиот Јован Боцевски, кого Иванов не го ставил списокот за спасување на осомничени за криминал од тогашната владејачка ВМРО-ДПМНЕ. На 19 јуни, Мијалков се повика на амнестијата на Иванов на судењето за предметот на СЈО „Тврдина-Таргет“.

По година дена од поднесувањето на обвинение, почна судењето на ексдиректорот на УБК Сашо Мијалков, на бившиот командант на полициските „Алфи“ Ивица Антевски – Пуки и на уште петмина припадници за оваа единица за мачење и изживување врз Љубе Бошкоски.

На 6 јуни 2011 година, ден по парламентарните избори, Бошкоски беше апсен во Скопје од обвинетите Антевски, Новица Станковски, Филип Атанасов, Петар Милошевски, Јован Боцевски и Метуш Шабани, под сомнение дека злоупотребил финансиски средства за изборна кампања. СЈО вели во обвинението дека апсењето со кое му е нанесена душевна и физичка болка, страдање, срам и понижување било по нарачка на Мијалков поради дискриминација по основ на поинаква политичка определба.

Во „Тортура“ сите се обвинети за „мачење и друго сурово, нечовечко или понижувачко постапување и казнување“.


Совети на Кривичен суд ќе утврдуваат кој исполнува услови за амнестија


Скопје, 26 јануари, 2018 - 13:19 (META) 

Основен суд Скопје 1 формирал совети кои треба да утврдат дали одредени осудени лица за кои е надлежен овој Суд ги исполнуваат условите од Законот за амнестија, потврди претседателот на Судот, Иван Џолев на брифинг со новинарите.

Тој рече дека бил информиран оти до Судот денеска од затворите стигнале помеѓу 50 и 100 вакви барања, а дека со актот за амнестија треба да бидат опфатени 1.500 осуденици за кои Кривичниот суд во Скопје треба да одговори. Од овие петстотини треба да добијат целосна, а останатите 1.000 делумна амнестија.

-Формиравме совети за да можеме да го запазиме рокот од пет дена во кој треба Судот да се произнесе за барањата од затворите. Со актот за амнестија, Кривичниот суд треба да утврди дека некое осудено лице ги исполнува условите за амнестија – рече Џолев додавајќи дека се надева дека Судот ќе одговори во предвидениот рок.

Инаку одлуките на Судот потоа треба да бидат доставени до Министерството за правда, а оттаму до Управата за извршување на санкции.


Владата ги усвои стратегијата за реформи во правосудството и нацрт-законот за амнестија


Скопје, 28 ноември, 2017 - 22:30 (META) 

Владата на денешната седница ја усвои информацијата за подготовка на Стратегијата за реформа на правосудниот сектор (2017-2022) со акциски план.

„Со оваа предлог-стратегија се даваат насоки, правци за подобрување на целокупниот правосуден сектор преку надминување на постојните недостатоци, како од нормативен така и од институционален карактер. Стратегијата е проследена со акциски план кој содржи активности, мерки и рокови со чие спроведување се очекува да се достигне крајната цел на стратегијата – враќање на довербата во институциите преку обезбедување правна сигурност и пристап до непристрасна и квалитетна правда за граѓаните“, стои во соопштението.

Нацрт-стратегијата пред да биде доставена во владина процедура за нејзино усвојување, беше трипати доставена на мислење до Европската комисија.

Премиерот и министрите, исто така, го усвоија предлог-законот за амнестија и го задолжија Министерството за правда да го преработи текстот на предлог-законот за амнестија, кој ќе се носи во редовна постапка и ќе се однесува за кривични дела предвидени со одредбите од овој предлог-закон сторени до 20 септември 2017 година.

„Владата ја истакна потребата од организирање јавна расправа и отворена дебата на оваа тема и го задолжи Министерството за правда да ги организира по текстот на одредбите од предлог – законот, а пред владата да достави нов пречистен и усогласен текст на предлог-законот за амнестија, откако ќе измине периодот на консултации и откако ќе завршат јавните расправи и отворени дебати“, велат од владината прес-служба.


СДСМ: Амнестија не смее да има, ВМРО-ДПМНЕ докажа дека стои зад насилствата од 27 април


Скопје, 18 октомври, 2017 - 15:11 (META) 

Со барањето амнестија за лицата кои на 27 април извршија или беа помагачи на терористичкото загрозување на уставниот поредок и на безбедноста, од ВМРО-ДПМНЕ докажаа дека токму тие ги нарачале и стојат зад насилствата на крвавиот четврток, кога се случи организиран обид за убиство на пратеници, а загрозена беше и безбедноста на новинари и на вработени во Собранието, се вели во реакцијата на СДСМ на соопштението од извршниот комитет на ВМРО-ДПМНЕ.

„Колку и да се обидува ВМРО-ДПМНЕ да ги спаси своите извршители од одговорност за крвавиот четврток, не смее да има амнестија за тие што учествуваа или помогнаа во обидот да се убијат пратеници. Во Македонија, како и во секоја демократска земја, не може да има амнестија за тешки кривични дела како обид за убиство, терористичко загрозување и дела против државата и уставниот поредок. Предлог-законот за амнестија не предвидува ослободување на лица што сториле кривични дела против државата и кривични дела злосторничко здружување“, велат од партијата.

Од СДСМ нагласуваат дека завршило времето на селективна правда и дека Македонија станува правна држава во која секој што ги прекршил законите, ќе мора да се соочи со правна одговорност за своите постапки.


ВМРО-ДПМНЕ бара амнестија за насилниците од 27 април


Скопје, 18 октомври, 2017 - 14:56 (META) 

Опозициската ВМРО-ДПМНЕ бара „итно и неодложно“ ослободување и амнестија на сите лица што „извршиле одредени законски прекршувања во инцидентите во Собранието на Република Македонија од 27 април“.

Според ВМРО-ДПМНЕ, овој чин ќе придонесе за помирување во Македонија и за релаксирање на политичките тензии.

Ваков заклучок, како што информираат од партијата, бил донесен на последната седница на извршниот комитет на ВМРО-ДПМНЕ, на кој бил констатирано дека „во изминатите пет месеци очигледна е политиката на власта за масовно ослободување на криминалци од затворите и притворските одделенија по разни фабрикувани правни основи, чиј заеднички именител е политичка интервенција од власта“.

„Извршниот комитет на ВМРО-ДПМНЕ информира дека поведува иницијатива за итно и неодложно ослободување и амнестирање на сите лица што извршиле одредени законски прекршувања во инцидентите пред и во Собранието на Република Македонија на 27 април 2017 година. ВМРО-ДПМНЕ иако беше со блиски, а во некои делови и со идентични ставови со ставовите на граѓаните кои мирно протестираа цели 80 дена, беше првата партија што јавно ги осуди законските прекршувања од дел од граѓаните што протестираа и со тоа се наруши мирниот карактер на овие граѓански протести. Сепак, гледајќи од денешна гледна точка, кога пред очите на целата јавност со политичка одлука и интервенција се ослободуваат огромен број сторители на тешки кривични дела, меѓу кои и свирепи убиства на етничка база, што говори дека е ова масовен тренд, добро испланиран, а не случајност, ВМРО-ДПМНЕ смета дека е неправедно какво било понатамошно гонење на лицата учесници во немирите на 27 април. Ние сочувствуваме и жестоко ги осудивме повредувањата на пратениците на 27 април, но не сметаме дека нивните рани повеќе болат од раните на оние лица чии сторители наскоро ќе бидат ослободени со законот за амнестија веднаш по изборите. Уште помалку цениме дека делата за кои се товарат овие лица се поважни од животите на убиените млади лица кај Смиљковско Езеро“, стои во соопштението од ВМРО-ДПМНЕ.

Од партијата соопштуваат дека поради ова, пратеничката група на ВМРО-ДПМНЕ ќе поднесе амандман на Законот за амнестија или ќе предложи посебен закон за прекин на постапката и за ослободување на лицата учесници во настаните од 27 април.


Владата подготви закон за амнестија


Скопје, 19 септември, 2017 - 20:45 (META) 

Владата на својата денешна, 28. седница, го разгледала и го усвои предлог-законот за амнестија и им препорача на Министерството за правда и на службите во Владата да ги обезбедат условите за увид во предлог-текстот на законот до засегнатите министерства, како и до пошироката јавност, соопшти владината служба за информирање.

Предлог-законот ќе биде поставен на увид на јавноста во Единствениот национален електронски регистар на прописи на Република Македонијa (ЕНЕР).

Овој закон е привремен и ќе се однесува на точно определени временски одредници. Министерот за правда, Билен Саљији, објаснил дека со предложениот текст на законот не се предвидува амнестија за лица правосилно осудени на казна доживотен затвор, како и за сторители на кривично дело убиство од член 123 од Кривичниот законик, на сторители на кривични дела против избори и гласање, за кривични дела против половата слобода и половиот морал и за кривични дела против државата (член 305-327), како и за злосторничко здружување и кривичните дела против човечноста и меѓународното право.

На денешната седница е презентирана информација со предлози за справување со високото ниво на загадување на воздухот во текот на летниот период и во текот на целата година.

Донесена е и одлука за зголемување на коефициентите на сложеност на работите во детските градинки, односно зголемување за 2 отсто на платата на вработените во нив, почнувајќи од октомври. Истовремено биле усвоени и предлог-уредбите за критериумите за распределба на блок-дотации за детски градинки по општини за 2018 година и за распределба на блок-дотации за јавните установи за домови за стари лица за 2018 година.

Донесена е и одлука со која се укинува надоместокот за испорака на информации од јавен интерес, во вид на електронски запис на информацијата на УСБ, или на е-маил адреса на барателите.


Заев се засрамил од условите во затворот „Идризово“ и најави закон за амнестија


Скопје, 11 септември, 2017 - 11:01 (META) 

Срам ми е што сум премиер на држава со вакви затвори, изјави премиерот Зоран Заев по денешната посета на затворот „Идризово“. Заев ја посети казнено-поправната установа заедно со народниот правобранител, Иџет Мемети, и со извршната директорка на на Хелсиншкиот комитет за човекови права, Уранија Пировска.

Заев не го криеше разочарувањето од условите во затворот.

– Овде нема минимум услови за издржување казна… Срам ми е што сум премиер на држава со вакви затвори, со нехумани и супстандардни услови, под секое човечко достоинство. Јас сум за закон за амнестија, се надеваме дека што побргу ќе може да влезе во владина и во собраниска процедура – изјави Заев по обиколката на затворот.

Во „Идризово“, казна издржуваат 1.800 затвореници, а капацитетот на затворот е за 800 луѓе, додаде премиерот.

Заев изјави дека Владата преку медиумите ќе се обиде да поттикне дебата во општеството за итно подобрување на условите во затворите.

Како една од опциите, за растоварување на пренатрупаноста во „Идризово“, тој ја наведе амнестијата на дел од осудениците, преку укинување на 30 отсто од вкупната казна или преку други методи за кривичните дела за кои постои таква можност, но, не и за тешките облици на криминал, како педофилија или злостроства против човештвото.

Заев рече дека за амнестијата веќе била почната дебата во институциите.

Премиерот, по посетата на затворот, наведе дека некои делови од „Идризово“ треба да се урнат бидејќи е невозможно да се реновираат.


ВМРО-ДПМНЕ: Заев лаже за амнестијата, за празниот буџет и за јавниот долг


Скопје, 7 јуни, 2017 - 9:37 (META) 

„Лагите на Заев нема да го подобрат стандардот на граѓаните. Тие очекуваат од него да ги исполни ветувањата што ги даде пред избори, а не со манипулации и со дезинформации да ги дефокусира од обврските што ги презеде“, велат од ВМРО-ДПМНЕ во утринското соопштение.

Заев лажеше дека кој било од ВМРО-ДПМНЕ во разговорите со СДС побарал каква било амнестија, реагираат од опозициската партија на изјавата на премиерот Зоран Заев во интервјуто за националниот јавен сервис МРТВ, дека било побарано амнестирање на врхушката на поранешната владејачка партија, но дека тоа било одбиено.

„Човек што е двапати аболиран за криминал, веројатно со ваквите дезинформации сака да си подготви терен и за трета амнестија за случајот „Поткуп“. ВМРО-ДПМНЕ и досега повеќепати демантираше дека воопшто се разговарало со Заев на оваа тема“, реагираат од партијата.

Од партијата велат дека неточни се тврдењата на Заев дека во буџетот се останати само шест милиони евра и дека јавниот долг ја наминал ликвидност на буџетот.

„Неговиот министер за финансии се пофали дека на 5 јуни се исплатени околу 77 милиони евра од буџетот на име на субвенции, стипендии и пензии. Вистината е дека новата Влада на СДС во буџетот доби 130 милиони евра, освен ако Заев не сакаше несвесно да признае дека 124 милиони евра мистериозно исчезнале. Заев лажеше дека јавниот долг надминувал 50 отсто од БДП, а дека скриениот долг изнесувал повеќе од милијарда евра. Фактичката состојба гласи дека јавниот долг на 30 април 2017 година изнесувал 45,9 отсто. Со овие паушални бројки и лаги, Заев и практично го загрозува кредитниот рејтинг на Република Македонија и ризикува кредиторите во иднина да бараат повисоки каматни стапки“, стои во демантот, во кој се додава дека граѓаните од Заев не очекуваат лаги и манипулации, туку очекуваат да ги исполни изборните ветувања.