ВМРО-ДПМНЕ го поднесе законот за амнестија за учесниците и организаторите на 27 април


Скопје, 29 октомври, 2018 - 16:50 (META) 

ВМРО-ДПМНЕ го поднесе во Собранието предлог законот за амнестија на учесниците и организаторите на нападот во Собранието на 27 април лани.

Координаторот на пратеничката група на ВМРО-ДПМНЕ, Драган Данев, на прес-конференција рече дека предложено е Собранието да го донесе законот по скратена постапка.

– Со овој закон се предвидува и се уредува начинот на ослободување од кривично гонење, запирање на поведените постапки и целосно ослободување од издржување на казната затвор, а за кои постои основано сомнение дека сториле кривични дела: учество во толпа што ќе спречи службено лице во вршење на службено дејствие, насилство, учество во толпа што ќе изврши кривично дело и дело за терористичко загрозување на уставниот поредок и безбедност. Со овој предлог закон се предвидува и бришење на осудата на лицата осудени заклучно со денот на влегување на сила на овој закон – рече Данев.

Според него, со законот ќе се обезбеди правда за сите, вистинско национално помирување наместо селективност и поделби кои, кои како што рече, ги нуди СДСМ.

Во судскиот случај за упадот во Собранието на 27 април минатата година, обвинети се 33 лица од кои 31 за терористичко загрозување на уставниот поредок и безбедноста, а двајца за помагање


Маноиловски: Државата да застане зад пратениците на ВМРО-ДПМНЕ кои ќе гласаат „за“


Скопје, 17 октомври, 2018 - 13:23 (META) 

Амнестија за сите и поддршка од државата за пратениците од ВМРО-ДПМНЕ кои ќе гласаат за Договорот со Грција, предложи пратеникот на ДУИ, Бранко Маноиловски на денешниот трет ден на расправата за уставните измени согласно Договорот со Грција.

-Неколку дена слушам разговори филозофии, но се се сведува на едно. Да одиме во ЕУ и НАТО. А за тоа, знам јас, дека сите сметаат дека треба да одиме. Проблемот е што вмровците, прекрасни луѓе, зависат од партијата. Јас би сакал да предложам нешто практично. На секој еден вмровец кој ќе гласа за овој предлог, државата да стои позади него и да гарантира за неговата иднина. И втор предлог, да се амнестираат сите грешници до сега, амнестија за сите. Поевтино е, се друго е скапо. Затворот е скап, дајте да ги амнестираме, тие и досега премногу патеа и поминаа низ маки. Размислите малку и ќе видите дека последниот збор секогаш е пари, економија. Се другото е компликации, затоа да размислиме, што е исплатливо повеќе. Доста со филозофии за минатото, тоа веќе помина. Сега ни треба леб на астал, децата да одат во школо. Бидете практични драги деца, имам право да го речам тоа бидејќи сум најстар – рече Маноиловски.

Пратеникот Панчо Минов од ГРОМ даде предлог промената на уставното име да дојде откако ќе влеземе во ЕУ и НАТО.

-Ако е условено нашето интегрирање со промена на уставното име од грчка страна, ние да условиме, прифаќање на уставното име да се применува по нашето зачленување во НАТО и ЕУ. Со тоа условеноста и ние ќе ја условиме. Предлагам, ако ова се прифати да тоа биде предлог на опозицијата. За таквиот предлог да се произнесат од власта и тоа да биде основа за преговарања на опозицијата и позицијата на лидерско ниво, а потоа и на сите партии. Барам да има и гаранции на македонскиот идентитет кои што ќе гарантираат државотворност на македонскиот народ – рече Минов.

Министерот за надворешни работи, Никола Димитров ги поздрави предлозите на Минов, но смета дека, голем е ризикот од нов процес на преговори.

-Во извесен дел вашата дебата е апсолутно вредна за размислување. Во процесот на разговори во сите овие изминати години, особено последната што доведе до излез од ќор-сокакот, одвај ги врзавме двата краја и мислам ако отвориме нов процес на преговори, ризикот да ја испуштиме оваа шанса ние и а нашите соседи е огромен. Комисијата за историските прашања за прв пат е предложена од македонска страна во 2007 година како една од мерките на градење доверба. Нејзината мисија е во тешките моменти каде што се допираат двата наратива, преку факти да се обидеме да не создаваме непријателство туку да поинклузивен процес – рече Димитров.

Пратеникот од ДУИ, Артан Груби рече дека ставот на партијата е дека единствено помирување кое може да се случи е помирувањето во Брисел.

– Помирете се сами со себе дека треба да бидете пријатели со западниот свет, со Трамп, со Меркел, со Меј, со Макрон. Тогаш сте се помириле и со самите себеси и со нас. Померете се со себе си и гласајте „за“ – рече Груби.


Двете крила за БЕСА не го поддржуваат Заев за амнестирањето


Скопје, 15 октомври, 2018 - 15:36 (META) 

Двете крила на БЕСА, тоа на Биљал Касами и тоа на Африм Гаши сметаат дека е неприфатлива понудата на премиерот Зоран Заев да се „амнестираат“ обвинетите за насилствата на 27 април 2017 во Собранието.

Според групата предводена од Африм Гаши, политичарите не смее да се мешаат во работата на правосудството, а помирување е можно само по преземање одговорност, извести „Порталб“.

– Во суштина, во оваа ситуација политиката не е во право и не смее на никаков начин да им се меша на судовите. Ослободувањето на правосудството од политиката е услов за владеење на правото и за европска перспектива. Помирувањето е можно само ако се побара прошка и ако некој преземе одговорност. Се надеваме дека ќе се постигне правдата – вели портпаролот Орхан Муртезани.

Инаку, премиерот Зоран Заев на почетокот на денешната собраниска седница за уставните измени повика на помирување, но воопшто не спомена амнестија.

Групата предводена од Биљал Касами, пак, отворено е против повикот за простување. Велат дека амнестирањето на насилниците е нарушување на евроатлантските вредности, пренесува „Порталб“.

-Предлогот за амнестирање на учесниците во насилствата од 27 април во Собранието ги нарушува вредностите за кои се залагаме со интеграцијата на земјата во НАТО и ЕУ – вели портпаролот Елмедин Мемиши.

Прашан дали пратениците на БЕСА ќе гласаат за таква амнестија, тој категорично одговара со „не“.


Груевски по одлуката на Апелација: Нема да гласам за уставни промени


Скопје, 5 октомври, 2018 - 13:28 (META) 

Казната затвор е политички прогон, изјави експремиерот Никола Груевски по соопштувањето на одлуката на Апелациониот суд со која му се потврдува двегодишната затворска казна за случајот ,,Тенк” на СЈО за набавка на мерцедесот од 600.000 евра.

– Ова е класичен политички прогон. Ќе ги искористам сите правни лекови кои ми стојат на располагање. Овде нема потреба од нови докази затоа што веќе има многу докази за овој случај. Според обвинението, ме гонат дека сум влијаел да се купи возило во кое покрај другите требало да се возам и јас -изјави Груевски.

На новинарско прашање во врска актуелната ситуација во која се потребни пратенички гласови од опозицијата за изгласување на уставните измини, Груевски рече дека нема да се трампа за амнестија.

– Нема да гласам за уставни промени и нема да ги поддржам истите. Јас немам намера да го изневерам народот – изјави Груевски.

Груевски соопштението на Апелација го дочека во судница додека ги слушаше бомбите во ,,Титаник”.


Сите бегства на Ѓорге Иванов (инфографик)


Скопје, 25 септември, 2018 - 14:59 (META) 

Претседателот Ѓорге Иванов во клучните моменти за Македонија аболицирал или поништувал или непотпишувал или не бил тука, па се враќал или требало да оди, па не одел ама немало да гласа.

Иванов на 9 мај 2015 година кога изби вооружената престрелка во Куманово беше во Москва на прославата за 9 Мај – Денот на победата над фашизмот. Следниот ден, кога работите станаа поизвесни, се врати во земјата.

Таа година на парадата во Москва не дојдоа претставници на земјите членки на НАТО, како и на други земји кандидати, во знак на протест поради агресијата врз Украина.

Во полициската акција за разбивање на вооружена терористичка група во кумановската населба „Диво насеље“ загинаа 8 полицајци. Настаните во Куманово се случија во период на сериозна политичка криза во Македонија и во период кога, од 5 мај, започнаа антивладини протести.

На 12 април 2016 година Иванов објави дека донел одлука да потпише аболиција за сите политичари против кои се води истрага во рамките на СЈО. Во екот на отворањето на најголемите скандали и криминали во македонската историја со случаите на СЈО, Иванов прогласи амнестија за 57 лица и со тоа го закочи, закомплицира и го доведе во прашање целиот обид за нивно расветлување и за кривично и судско гонење на актерите.

На 6 јуни 2016 година Иванов, по серија убедувања натегања и средби ја укина амнестијата.
Според него „за разлика од 12 април, денеска имаме нова реалност во Македонија и во услови на надворешни закани и безбедносни ризици, имаме функционални институции, кои можат да се справат со предизвиците“

На 1 март 2017 Иванов не му го даде мандатот за формирање влада на лидерот на СДСМ Зоран Заев. И покрај освоените гласови и подготвената коалиција Иванов соопшти дека одбива да му го даде мандатот за формирање влада на лидерот на СДСМ, Зоран Заев. За Иванов беа спорни роковите и преговорите за „туѓи платформи“. Овој негов потег беше вовед во настаните од 27 април 2017 кога во насилен упад во Собранието беа повредени пратеници и новинари и целата земја беше на работ на меѓунационален и меѓуетнички судир.

На 17 мај 2017 Иванов, сепак, му го даде мандатот на Заев. Иванов прво на 1 мај, по средбата со заменик-помошникот на државниот секретар за европски и евроазиски прашања на САД, Хојт Брајан Ји, побара гаранции „за зајакнување на унитарноста на државата и дека сè ќе биде во согласност со Уставот на Република Македонија”, па му го додели мандатот на Заев за формирање влада.

На 17 јануари 2018 Иванов не го потпиша законот за употреба на јазиците. Иванов вели дека законот е „неправеден и репресивен и го фаворизира само албанскиот јазик.“ Според Иванов, „со овој закон се воведува многу скап паралелизам во сите органи на државната власт што води кон нивна целосна блокада и нефункционалност“.

На 26 јуни, 2018 година Иванов не го потпиша законот за ратификација на спогодбата со Грција. Иванов смета дека „ нема мандат да го потпише Указот за прогласување на законот за ратификација бидејќи еден од столбовите на неговата политика во изборната програма од 2014 година е дека не прифаќа промена на Уставот со цел промена на уставното име.“

На 22 септември 2018 година пред пред дијаспората во САД изјави дека на 30 септември нема да излезе да гласа, и нема да пополни референдумско ливче. „На 30 септември нема да излезам да гласам. Кога ја преземав функцијата претседател на Република Македонија, положив свечена изјава дека ќе ги почитувам Уставот и законите. Не отстапувам од таа моја заклетва. Затоа, на 30 септември нема да излезам да гласам“, рече Иванов.


Мицкоски до 10 септември ќе се изјасни за референдумот, од СДСМ велат дека е несериозен


Скопје, 8 август, 2018 - 9:53 (META) 

Претседателот на ВМРО-ДПМНЕ, Христијан Мицкоски во интервју за телевизијата „Канал 5“ вчера рече дека до 10 септември ќе соопшти дали ќе го повика членството да го бојкотира референдумот за името на 30 септември, или пак да гласа против или за. Тој исто така негираше дека неговата партија барала амнестија. На неговите тврдења реагираше СДСМ, порачувајќи дека сепак Мицкоски потврдил дека неговата партија барала амнестија на криминалот. Порача и дека

– Не е точно дека ВМРО-ДПМНЕ нема став по ова прашање. Во минатото во многу наврати го има кажано и повторено својот став што се однесува на принципот за промена на Уставот а со цел промена на уставното име. Впрочем кампањата за референдумот почнува на 10 септември. Дотогаш се надевам дека оваа акција ќе трае така што јавноста благовремено ќе биде информирана за сите чекори на ВМРО-ДПМНЕ – рече Мицкоски за референдумот.

Во интервјуто тој порача дека тврдењата на власта за наводно барање на амнестија од страна на опозицијата се лага. Тој рече дека со ваквите тврдења  кореспондираат со криминалите и скандалозните тендери кои ја тресат владата на СДСМ, а со тврдењето за барање на амнестија Заев и СДСМ се обидуваат да го оттргнат вниманието на јавноста од актуелните скандали.

-Овој дел кој што вие мене ме прашувате коинцидира со периодот исполнет со многу афери во јавноста, коруптивни како што се на пример доделувањата на оние грантови преку оној криминален Фонд за иновации. Потоа тука се оние криминални тендери кои што ги добиваат фирми формирани пред 6-7 дена пред да аплицира на тендер, еве гледаме, сведоци сме како се злоупотребува државен имот за приватни цели. Од прилика тоа беше еден груб обид да се сврти вниманието на јавноста од реалните теми кон некои други теми – рече Мицкоски.

Од СДСМ велат дека Мицкоски директно одбил да одговори на новинарско прашање и со тоа потврдил дека единствено за што се залага партијата е амнестија на криминалот.

„Македонија му кажа збогум на криминалот и црното минато, сега чекори кон ЕУ и НАТО, а таму важат поинакви вредности и правила од оние за кои се залага ВМРО-ДПМНЕ. Сите политички чинители кои се за македонската иднина се одлучни и обединети, освен Мицкоски и тесното партиско раководство на ВМРО-ДПМНЕ кои сакаат назад во темното минато на криминал, насилство и неказнивост. На Мицкоски веќе треба да му е јасно дека амнестија за криминалците нема да има, секој ќе одговара согласно законите“, порача СДСМ.

Партијата вели дека „без разлика на неодговорност однесување на ВМРО-ДПМНЕ, граѓаните на Македонија, на 30 септември, ќе ја искористат историската шанса за напредок“.

„Прашањето на референдумот е јасно и едноставно – иднина или изолација. Доколку Христијан Мицкоски има малку одговорност и сериозност, јавно ќе излезе и ќе каже за која опција навистина е. Обединети се сите политички партии кои навистина се за ЕУ и НАТО, а само Мицкоски и раководството на ВМРО-ДПМНЕ се изолирани и се против интергација, во обид да одбранат криминал“, велат од СДСМ.

На интервјуто реагираше и Граѓанско демократска унија (ГДУ), која порача дека со одлагањето да изнесе цврст став за референдумот, Мицкоски се однесува непринципиено и крајно несериозно.


Заев: Нема да попуштиме пред притисокот, амнестијата е невозможна


Скопје, 24 јули, 2018 - 15:52 (META) 

Многу сме блиску до реализацијата на стратешките цели на Република Македонија – членството во ЕУ и НАТО, и нема да дозволиме процесот да го нарушат или да го доведат во ризик неодговорни ултиматуми. Остануваме посветени до крај да стигнеме до решенија кои ќе овозможат услови за фер референдум во интерес на граѓаните на нашата земја, истакна премиерот Зоран Заев на денешната средба со државниот министер надлежен за Европа Михаел Рот.

– Законот е еднаков за сите, амнестијата за политичкиот криминал е невозможна и особено нема да попуштиме пред притисокот да отстапиме од владеењето на правото – рече Заев.

Toj истакнал дека Република Македонија со датумот за преговори со ЕУ и со поканата за НАТО отворила ново поглавје во својата историја и, истовремено, отвори ново значајно поглавје и во историјата на Европа во период кога за ЕУ е од огромна важност единството на сите европски земји, соопшти владината прес-служба.

Државниот министер надлежен за Европа Рот, нагласил дека Република Македонија и понатаму може да смета на целосна и силна поддршка од СР Германија. Тој потенцирал дека претстојниот референдум е момент за одлука за европската иднина за Македонија и дека одговорноста сега треба да ја преземат сите релевантни политички субјекти во земјата, вклучувајќи ја и опозицијата.


ВМРО-ДПМНЕ: Неточно е дека преговараме за амнестија


Скопје, 20 јули, 2018 - 14:21 (META) 

Апсолутно е неточно дека ВМРО-ДПМНЕ бара и преговара некаква амнестија. Ваквите неточни брифирања од СДСМ се само обид да се дефокусира вниманието на јавноста од актуелните случувања поврзани со штетниот договор со Грција кој ВМРО-ДПМНЕ не го прифаќа, порача најголемата опозициска партија.

„СДСМ треба да престане да ја дезинформира јавноста и да дефокусира од заложништвото во кое ја втурна прифаќајќи го штетниот договор со Грција. И во однос на некои надежи и пишувања дека се договарало некаква возратна амнестија во стилот СДСМ сега, па потоа ВМРО-ДПМНЕ кога ќе дојде на власт ќе овозможи друга амнестија, би порачале дека најдобар демант за ова ќе биде времето кое ќе покаже дека одговорност ќе има за сите оние пречекорувања на Уставот и законите кои сега се случуваат“, се вели во соопштението.


Контраспин: Петте струмички студенти, петте пратеници на ВМРО-ДПМНЕ и Мицкоски


Скопје, 9 јули, 2018 - 17:14 (META) 

Барањето за амнестија може да биде поставено, но само откако сите ќе дознаеме што навистина се случи на 27 април 2017 година. А, да се споредуваат тие настани, петте обвинети пратеници на ВМРО-ДПМНЕ и петте стрелани струмички студенти во 1951 г. е неумесно, невкусно и калкулантски, пишува „Вистиномер.мк“.

Лидерот на ВМРО-ДПМНЕ, Христијан Мицкоски, од говорот на протестниот марш на неговата партија во Струмица даде изјави што ги оценуваме како спин:

Спин: И на ова лудило на политички реваншизам мора еднаш, еднаш засекогаш да му дојде крајот, затоа што премногу долго се делиме на ваши и наши, на Македонци, и помалку Македонци и затоа апелирам е потребна амнестија за луѓето од 27 април, затоа што мора да продолжиме напред, а нема напред ако живееме во минатото. Тоа е она што го бараме. И тоа е она за што ќе се бориме и ќе се залагаме.

Контраспин: Христијан Мицкоски недвосмислено, не по прв пат, побара амнестија за сите инволвирани во настаните од 27 април 2017 година во Собранието на РМ, но упорно одбива да даде своја или партиска квалификација на тие настани.

Нешто што е најблиску до квалификација на настаните е реченицата на Мицкоски дека луѓето „се воделе од чесна идеја и мисла“, а дека мотив им бил „Република Македонија“. Притоа, тој негира дека има какво било кривично дело, туку обвиненијата и досегашните пресуди ги сведува на политичка хајка:

„Ако кренете главата може да ви случи ова“, тоа е пораката. ВМРО-ДПМНЕ има денес 5 пратеници кои се теретат за нешто што не го направиле, односно за тероризам, а немојте никогаш да помислите дека ги заборавам и оние наши браќа и сестри кои сега се по затворите, и кои се дел од оваа конструирана политичка хајка, насочена против секој слободномислечки Македонец. Јас ги живеам нивните судбини. И не заборавајте дека, сепак, има невини луѓе по затвортите, затоа што се воделе од чесна идеја и мисла и единствен мотив им била нивната татковина Република Македонија.

Претседателот на ВМРО-ДПМНЕ, барајќи амнестија за настаните од 27 април 2017 година, практично спинува дека станува збор за „чесна идеја и мисла и единствен мотив им била нивната таковина Република Македонија“.

Спинот е очигледен, бидејќи никој кој се води од чесна идеја и мисла, нема да ја доведе Република Македонија пред работ на граѓанска војна, пред работ на воведување на вонредна состојба, пред работ на неизвесност и грч на своето население, а особено нема да дозволи загрозување на невини животи на пратеници, граѓани, новинари, службени лица вработени во Собранието…

Целата статија прочитајте ја на „Вистиномер.мк“.


Мијалков и во „Тортура“ се повика на амнестијата од Иванов


Скопје, 9 јули, 2018 - 11:56 (META) 

Поранешниот директор на УБК Сашо Мијалков, првообвинет во предметот на СЈО „Тортура“ за апсењето на Љубе Бошкоски, како и останатите пет обвинети полициски „алфи“, се повикаа денеска на амнестијата што им ја даде претседателот Ѓорге Иванов.

Со амнестијата не е опфатен само обвинетиот Јован Боцевски, кого Иванов не го ставил списокот за спасување на осомничени за криминал од тогашната владејачка ВМРО-ДПМНЕ. На 19 јуни, Мијалков се повика на амнестијата на Иванов на судењето за предметот на СЈО „Тврдина-Таргет“.

По година дена од поднесувањето на обвинение, почна судењето на ексдиректорот на УБК Сашо Мијалков, на бившиот командант на полициските „Алфи“ Ивица Антевски – Пуки и на уште петмина припадници за оваа единица за мачење и изживување врз Љубе Бошкоски.

На 6 јуни 2011 година, ден по парламентарните избори, Бошкоски беше апсен во Скопје од обвинетите Антевски, Новица Станковски, Филип Атанасов, Петар Милошевски, Јован Боцевски и Метуш Шабани, под сомнение дека злоупотребил финансиски средства за изборна кампања. СЈО вели во обвинението дека апсењето со кое му е нанесена душевна и физичка болка, страдање, срам и понижување било по нарачка на Мијалков поради дискриминација по основ на поинаква политичка определба.

Во „Тортура“ сите се обвинети за „мачење и друго сурово, нечовечко или понижувачко постапување и казнување“.