Преговорите за прием на Македонија може да завршат во јануари и на почетокот на 2019 година државата може да стане членка на НАТО, изјави на прес-конференција генералниот секретар на НАТО Јенс Столтенберг.
– Сите внимателно го следевме изјаснувањето на референдумот во Поранешната југословенска република Македонија. Го поздравувам постигнатото одобрување за Договорот од Преспа. Скопје треба да ги определи следните чекори – нагласи генералниот секретар.
Тој посочи дека НАТО е подготвен да ја поздрави Македонија како 30. член на НАТО.
– Тоа може да се случи само со одобрување на Договорот од Преспа. Преговорите за членство почнаа и очекуваме да ги завршиме во јануари идната година. Кога ќе заврши прифаќањето на Договорот, може да потпишеме протокол со ПЈРМ. Во почетокот на годината државата може да се присоедини кон Алијансата. Ги повикувам сите да пројават одговорност и да ја искористат таа можност – нагласи Столтенберг.
