Ахмети: Имаме разлики, но сите треба да се ангажираме Договорот со Грција да успее


       
Скопје, 19 јули, 2018 - 16:24 (META) 

Има разлики кај партиите меѓутоа треба сите да се ангажираме за да имаме успешна имплементација на Договорот со Грција, изјави лидерот на ДУИ, Али Ахмети по денешната лидерска средба во Клубот на пратеници.

– Бидејќи ни се исцрпени сите опции, останува во наредните денови да се продолжи со разговорите. Очекувам сите да делуваат храбро, за да не ја испуштиме оваа историска шанса -изјави Ахмети.

Лидерот на едниот огранок на Беса, Билал Касами, смета дека државата е во криза и поради тоа интензивните преговори на политичките партии се многу важни.

– Ние ќе придонесеме овој процес на преговори да заврши со решение за формирање на ДИК и за референдумот да биде успешен, со цел Македонија, еднаш за секогаш, да стане членка на ЕУ и НАТО – изјави Касами.

Средбата помеѓу премиерот Зоран Заев и лидерот на опозицијата Христијан Мицкоски, сè уште трае.