Законот за висока раководна служба треба да се донесе пред парламентарните избори. Тоа ќе донесе стандарди за професионализација на високата раководна служба и ќе биде чекор напред кон решавање на долгогодишен проблем со назначувањето на директори и раководители во Македонија, ова денеска во соопштение до јавноста го порааа од Институтот за демократија Социетас цивилис.
„Подготовката и донесувањето на Законот се провлекува веќе неколку години наназад, а одговорноста за ова се префрла низ различни институции. Одложувањето на спроведувањето на законот доведува до продолжување на практиката на нетранспарентни и неквалитетни именувања на директори и раководители. Со цел да се сопре оваа пракса, неопходно е итно донесување на Законот за висока раководна служба и негова примена“, наведено е во соопштението.
Недоречената правна рамка, додаваат оттаму, во моментов дозволува злоупотреба и распределба на позиции во нетранспарентни постапки, базирани на партиска припадност и коалициски договори.
„Ова резултира со неефикасност на институциите и го нарушува навременото и квалитетно испорачување на услуги до граѓаните. Меѓународната заедница низ годините ја посочува потребата од департизација и вложување во капацитетите на јавната администрација. Законот треба да обезбеди најсоодветни кадри кои ќе раководат со институциите и да превенира партиски пазарења. Затоа сега е вистинско време да се вложат напори и да се донесе Законот за висока раководна служба, пред распуштање на Собранието за претстојните парламентарни избори“, се наведува во соопштението.