Претседателот на СДСМ, Зоран Заев, во интервју за „Ал Џезира Балканс“ вели дека нема никакви шанси опозицијата да излезе на избори на 24 април.
– Две се клучни причини за ваквата најава. Прво е избрачкиот список, кој не е прочистен и на него се наоѓаат мртви и избирачи пријавени по двапати, а такви, според информациите што ги има опозицијата, се повеќе од 100.000 или 12 проценти. Изборите може да ги пресудат неколку проценти од гласачите и затоа опозицијата нема да се согласи да излезе на 24 април. За прочистување на избирачкиот список, потребни се повеќе од сто дена, што значи дека изборите би биле на почетокот од летото. Се надеваме дека нема да има потреба за бојкот на изборите. Знаат и малите деца дека не може да се исполнат условите до 24 април — прочиситување на избирачкиот список и регулација на медиумите. Но, ако има избори на 24 април, опозицијата сигурно нема намера да ги гледа на телевизија – рече Заев.
Водителката Мирјана Хрга рече дека од ВМРО-ДПМНЕ повторно одбиле да учествуваат во емисијата иако неколку дена упорно ги барала и чекала одговор од партијата.
– Денеска ми се случи нешто што не паметам дека ми се случило во 20-годишната кариера. Портпаролот на партијата задолжен за таа работа, да ми одговори на повикот, кога слушна кој го бара, повеќе не ми се јави. Тешко во такви услови да се вкрстат аргументите – рече Хрга.
