Лидерот на СДСМ, Зоран Заев, кој е во посета на Израел, денеска ќе има средба со заменик-директорот на израелската разузнавачка агенција Мосад, јавува телевизијата „24 Вести“.
Според информациите на телевизијата, средбата на Заев со функцонерот на таjната служба ќе се одржи зад затворени врати, а тема на разговор, како што пренесува „24 Вести“ повикувајќи се на свои извори, ќе бидат наводите за корупција што произлегоа од 15. „бомба“ на опозицијата, но и други прашања што би ѝ биле од корист на специјалната јавна обвиителка, Катица Јанева.
Еден час по средбата со вториот човек на Мосад, Заев ќе се сретне со вицепремиерот и министер за внатрешни работи на Израел, Силван Схалом. Според најавите, на средбата меѓу Заев и Схалом, меѓу другото, ќе стане збор и за наводите од 15. „бомба“.
Лидерот на СДСМ вчера имаше средба со претседателот на Израел, Реувен Ривлин, на која разговарале за унапредување на соработката на двете земји. На средбата присуствувале и амбасадорот на Македонија во Израел и амбасадорот на Израел за Република Македонија.