Вооружени напаѓачи упаднале во седиштето на телевизиската станица „Ал Наба“ во центарот на Триполи, го прекинале емитувањето на програмата и ги натерале вработените да ја напуштат зградата, јавува „Гардијан“, повикувајќи се на изјави на двајца новинари на локалната телевизија.
Никој не е повреден во вчерашниот инцидент, рекле новинарите и додадоа дека напаѓачите веројатно се приврзаници на Владата на национално единство, која има поддршка од ОН.
Премиерот на Либија од Владата на национално единство, Фајез ал Сараџ вчера стигна во Триполи.
Сараџ морал да патува преку море од Тунис, затоа што либискиот воздушен простор наводно е блокиран од владата сместена во Триполи.
Либија се наоѓа во долгогодишна состојба на превривање после Арапската пролет во 2011 година, која доведе до граѓанска војна и симнување од власт на лидерот Муамер Гадафи.