И Шилегов и СДСМ, ниту ги прочитале, ниту ги разбираат препораките од Прибе, ниту, пак, во своето дејствување воопшто водат сметка за европската перспектива на Македонија, реагираат од ВМРО-ДПМНЕ на прес-конференцијата на Петре Шилегов, портпарол на СДСМ.
„И Шилегов и СДСМ сè што сакаат да постигнат е да направат хаос во државата, зошто само така се надеваат дека можат да се приграбат до функции и до власт, без поддршка од граѓаните, со една единствена цел – да ги злоупотребуваат онака како што тоа го правеле додека биле на власт. Ако ништо не зависи од Груевски, што се заморуваат тогаш и зошто вака панично реагираат? Очигледно се нервираат што Република Македонија спроведува препораки од ЕУ и што процесите одат напред, а тие се на страна и се занимаваат само со деструкција“, пишува во реакцијата на ВМРО-ДПМНЕ.
Во соопштението се вели дека во препораките од Прибе јасно и недвосмислено стои препорака до Собранието на Република Македонија да ги направи функционални комисиите и да го пополни нивниот состав, без разлика на тоа дека една пратеничка група се одлучила да бојкотира. Одлуката на СДСМ да не учевствува во Собранието не може и не смее да значи дека Собранието не смее да функционира.
„Шилегов треба да престане да се замислува дека Македонија постои заради неговата волја и волјата на неговиот претседател Зоран Заев. Институциите на Република Македонија фунционираат и ќе функционираат во насока на исполнување на европските стандарди. Ако тоа им пречи на СДСМ, тогаш очигледно си имаат проблем сами со себе“, се вели во соопштението на владејачката партија.