Владата на на вчерашната седница донесе одлука со којашто се намалуваат коефициентите за пресметување на платата на функционерите кои ги именува Владата.
Со Одлуката, се намалуваат коефициентите на платите на именувани функционери во Владата, национални координатори и други функционери, на директори и други именувани лица на органи во состав на министерствата, на директори и други именувани лица на самостојни органи на државната управа, на раководни лица во управни организации, агенции, фондови и други правни лица основани со посебни закони, на казнено-поправни установи.
„Станува збор за усогласување на коефициентите на именуваните лица од страна на Владата согласно Законот за изменување на законот за плата и други надоместоци на избрани и именувани лица во Република Македонија („Службен весник на Република Северна Македонија“ бр.51/24), којшто предвидува промена на коефициентите по коишто се пресметува платата на избраните и именуваните лица“, се вели во владиното соопштение.
Таму не е точно наведено за колку се намалени коефициентите на платите на функционерите, за што се очекува подетално образложение од Владата.
Лани функционерите започнаа да добиваат плати повисоки по околу 1000 евра, по одлуката на Уставниот суд, според која платите на функционерите се зголемија за 78 проценти.
Платите на функционерите се пресметуваат така што основицата се множи по одреден коефициент во зависност од функцијата. Законот за плати на функционери предвидува основицата да биде просечната плата од претходната година, но со години таа беше замрзната. Судот лани во март одлучи да го укине замрзнувањето, по што платите значително се зголемија, што предизвика жестоки реакции во јавноста.
Имено, Уставниот суд укина два члена од Законот за плата и надоместоци на функционерите, и со тоа отвори пат кон зголемување на платите на околу 700 функционери за дури 78 отсто.
