Бразилскиот здравствен институт „Фиокруз“ денеска соопшти дека првпат е откриен вирусот зика во плунка и во урина и оти ќе биде истражена можноста за пренeсување на вирусот преку телесни течности.
Институтот ги анализирал примероците земени од два пациента и изработил делумна низа на генот на вирусот, соопшти претседателот на Фондацијата „Освалдо Круз“, Паоло Гадела.
Вирусот зика е дијагностициран во 30 земји во светот.
Првпат се појавил минатата година во Бразил и се поврзува со илјадници бебиња родени со микроцефалија, болест која се карактеризира со абнормално мала глава и со неразвиен мозок кај новороденчиња.