Министерството за здравство соопшти дека вчера попладнето биле тестиран уште еден пациент за кој имало сомнение дека е заразен со новиот корона вирус Covid-19, но резултатите од испитувањето се негативни, односно пациентот не бил заразен со овој вирус.

Тестирањето е направено на Клиниката за инфективни болести и фебрилни состојби во Скопје.

Со ова, случајот на заразени со овој вирус во земјава се задржува на 1.

Министерот за здравство Венко Филипче, повикувајќи се на растечкиот број на ново заразени во европскиот регион, информираше дека контролата на системот за заштита и превенција во земјава се подигнува на уште повисоко ниво со воведување на „здравствена локатор карта“ за сите патници во авионите на „Wizz Air“ од Милано и Венеција на скопскиот и охридскиот аеродром.

-Ова ќе овозможи добра контрола и следливост на патниците. Тие ќе остават податоци за тоа на која адреса престојуваат и доколку во некое сценарио се јави некој патник по одреден број денови со симптоми, многу лесно е да ги лоцираме патниците, особено сопатниците кои седеле неколку реда зад и пред заболениот патник во авионот, како што налагаат препораките – објасни Филипче.