Од денеска сите патници што доаѓаат во Шведска од Данска преку мост или низ тунел со воз, автобус и со траект, пред да ја минат границата, ќе мора да покажат документи со слика.
Патниците се предупредени дека се очекуваат долги редови и доцнења затоа што регулативата за проверка стапила на сила на полноќ од данска страна на мостот и на тунелот Оресунд, од каде во Шведска стигнаа голем број бегалци.
Целта на мерките е да се спречи влезот на мигрантите без документи во Шведска, која соопшти дека веќе не може да се избори со преголемиот прилив.
Привремена ограда е поставена на аеродромот „Каструп“ во Копенхаген, каде возовите ќе бидат запирани поради задолжителните контроли.
Ова е првпат повторно да се воспостави контрола на границите меѓу нордиските земји, по половина век.