Странските иматели на платежни картички за купување производи и услуги од македонски е-трговци во 2022 година потрошиле 21,76 милиони евра, што во однос на претходната година претставува пораст од скоро 33 отсто, објавува Асоцијацијата за е-трговија на Македонија (АЕТМ).
Странските онлајн купувачи ја направиле во 618.932 трансакции или просечно потрошиле 35,2 евра по трансакција. Направената анализа за движењето на бројот и вредноста на направените оналјн трансакции од странци кон домашни од 2016 година до 2022 година покажува дека има значаен пораст, покажуваат бројките на АЕТМ.
Ако во 2016 година странците потрошиле онлајн кон македонските е-трговци само 2 милиони евра во 32,9 илјади трансакции, во 2022 вредноста е зголемена за над 10 пати, додека бројот на трансакциите за скоро 19 пати.
Што се однесува до учеството на странците во вкупно остварената вредност на онлајн трансакциите и кон дома и кон странство од домашни и странски платежни картички тоа се зголемува од 2,2 отсто во 2016 на скоро 4 отсто во 2022 година.
Околу 3,6 милиони евра или 17 отсто од вредноста на трансакциите се направени од иматели на платежни картички издадени во САД, потоа 2,2 милиони евра или 10 отсто од Обединетото кралство и 1,7 милиони евра или 8 отсто од Швајцарија. Потоа следат германските иматели на картички кои направиле 4 отсто, Бугарија и Турција 3 отсто, и Шведска и Косово 2 отсто од вредноста на онлајн трансакциите.
Најголем пораст на бројот како и на вредноста на направените онлајн трансакции од странски иматели на платежни картички во 2022 година во однос на претходната година е остварен од Швајцарија, додека највисока просечна трансакција е направена од Косово.
„Од анализата се гледа дека најмногу онлајн трансакции направени од странски иматели на платежни картички како по број така и по вредност се направени од земји каде што има македонски иселеници или од соседните земји. Тоа нѐ упатува на претпоставка која е основа за понатамошно истражување дека нашите иселеници се повеќе го користат овој канал за купување на производи и услуги на своите блиски од македонските е-продавници. Очекувањата се и понатаму да продолжи растот на вредноста и бројот на реализирани онлајн трансакции од странство односно најмногу од Македонци иматели на странски платежни картички кон македонски е-трговци“, вели преседателката на Асоцијацијата за е-трговија на Македонија, Нина Ангеловска.