„Средношколски пленум“ денеска соопшти дека продолжуваат со протестот поради лошите реформи во образованието, а од утре почнуваат да кампуваат пред Министерството за образование и наука.
„На денешниот генерален пленум, едногласно се одлучи најавениот фронт на бојкотот пред МОН (во паркот на новинари) да се постави в понеделник, каде ние 24 часа дневно ќе го чекаме министерот да нè прими на средба“, напишаа од „Средношколски пленум“ на својата фејсбук-страница.
Средношколците по завршувањето на бојкотот на наставата во училиштата, ќе се селат во кампот, каде ќе собираат потписи за поддршка на нивните барања и ќе одржуваат и алтернативни предавања преку кои имаат цел да им помогнат на учениците да го надоместат пропушениот материјал поради бојкотот.
Повеќе од 18.000 средношколци три недели ја бојкотираат наставата, барајќи враќање на стариот концепт на полагање државна матура, укинување на математиката како задолжителен предмет и повлекување на законот за екстерно тестирање. Средношколците, кои досега одржаа три масовни марша, бараат прием кај министерот за образование, Абдилаќим Адеми, но засега од МОН нема одговор на нивното барање.
