Вкупно 26,15 отсто од жителите на општина Центар со право на глас излегле да се изјаснат на референдумот за изгледот на Градскиот трговски центар, соопшти Граѓанската асоцијација „Мост“.
Набљудувачите на „Мост“ на теренот забележале нови неправилности на неколку на гласачки места. На гласачкото место 2.802 во ДСУ „Панче Караѓозов“, гласач ја затворил вратата од гласачкото место и не ги пуштал останатите гласачи да гласаат откако не успеал да се пронајде во избирачкиот список. Тој барал да биде запишан во избирачкиот список. Инцидентот веднаш бил пријавен, па полицијата интервенирала, го отстранила од гласачкото место, по што гласањето продолжило.
Од „Мост“ соопштуваат дека на гласачкото место 2.837, претседателот на избирачкот одбор му помогнал на еден гласач да гласа, што е прекушување на изборните правилата, кои предвидуваат дека само друг гласач може да им помогне на лицата кои не можат да гласаат сами.
На шест гласачки места лоцирани во ОУ „Јохан Хајнрих Песталоци“, според податоците на „Мост“, одредени граѓани не можеле да се пронајдат во избирачкиот список.