Пред неколку дена малата Ангелина заѕвони на ѕвончето на Детската клиника во Скопје – прогласи крај на борбата со леукемијата, откако ја прими и последната хемотерапија.
Вечерва, соседите од булеварот АСНОМ во населбата Ново Лисиче на малата Ангелина ѝ приредиле вистинско добредојде дома. Со факели и со огномет го дочекале борецот кој со месеци се лечеше на Детската клиника.
Како што пренесуваат нејзините соседи на Фејсбук, на едно од игралиштата во населбата биле запалени факели, имало огномет, а децата од соседството и соучениците на Ангелина ја пречекале со песни и со скандирање на нејзиното име.
На убавиот настан и на овој хуман гест присуствувале голем број деца, другарчиња и соседи со нивните родители, кои ѝ посакале на малата Ангелина најдобро здравје во иднина.
