Царински службеници спречиле обид за нелегално изнесување на девизи и заплениле 90.000 евра по извршена контрола на патникот Х.А. кој патувал на релација Скопје – Цирих, соопштуваат од Царинска управа.
„Патникот, кој бил странски државјанин, на Меѓународниот аеродром Скопје се пријавил со само еден сив куфер, по што се упатил на излез од Република Северна Македонија и не пријавил ништо за царинска контрола. При контрола, во предните и задните џебови се пронајдени 100.000 евра кои не биле пријавени, со што е сторен прекршок по член 56-в став 2 од Законот за девизно работење“, информираат во Царина.
Согласно Законот, вратени му се 10.000 евра, а останатите 90.000 евра за кои не поседувал документ, се привремено задржани.
Против лицето е поднесена пријава за девизен прекршок до надлежниот суд.