Градоначалникот на општина Карпош, Стевчо Јакимовски и претседател на партијата ГРОМ денеска одржа прес-конференција пред седиштето на ВМРО-ДПМНЕ, на која побара од лидерот Христијан Мицкоски да објасни како го стекнал својот имот во изминативе години, осврнувајќи се на изградбата на малите хидроцентрали.
„Мицкоски да одговори на колку години ја направи својата прва хидроцентрала. Дали тоа беше кога тој е советник во владата на Груевски, дали тоа беше пред да стане директор на ЕСМ, или првата хидроцентрала ја направи откако стана директор на ЕСМ“, праша Јакимовски, додавајќи дека легитимно е прашањето на колку години Мицкоски го стекнал милионскиот имот.
Градоначалникот на Карпош вели дека ако ВМРО-ДПМНЕ го прашува Дрин Ахмети за неговиот имот, тогаш и лидерот на ВМРО-ДПМНЕ треба да каже за својот капитал.
Јакимовски вели дека треба да видиме не само за Дрин Ахмети за тоа како толку млад стекнал толкав капитал, туку и Христијан Мицкоски како го стекнал својот капитал и на колку години ја направил првата хидроцентрала.
Од ВМРО-ДПМНЕ денеска реагираа на изјавата на Стевчо Јакимовски од пред нивното партиско седиште. Му порачуваат на Јакимовски наредниот пат наместо во прашална форма, да зборува во потврдна форма за да може вистината да се докаже пред судовите.
Од партијата преку соопштение реагираат дека Стевчо Јакимовски има задача, која била мотивирана од концесиите кон ДУИ, таткото и синот на Ковачевски, односно дека има мисија да шири невистини, измислици и лаги кон лидерот на ВМРО-ДПМНЕ.
„Тоа што го збори Стевчо Јакимовски е тоа што му наредил тандемот Ковачевски. Тоа е и причината зошто Јакимовски после 6 години власт на СДС и ДУИ и украдени милијарди збори за ВМРО-ДПМНЕ, а не за она што е изворот на проблемите во државата“, стои во соопштението од ВМРО-ДПМНЕ.
