Замрзнатиот проблем во врска со името во изминатиот период беше катастрофа за Македонија, но и лош развој на настаните за Грција, рече министерката за одбрана, Радмила Шекеринска, во емисијата „Топ тема на ваша страна“ на телевизијата „Телма“ вечерва.
Иако нагласи дека Грција, всушност, во моментот ништо не губи поради со децении нерешениот спор за името, Шекеринска рече дека земјата во последниве десет години поради него, пропуштила шанса да стане еден од најјаките играчи во Македонија.
Министерката рече и дека пратеници од коалицијата на ВМРО-ДПМНЕ ќе дадат поддршка за некои од реформските приоритети на владата.
Истовремено, го повтори веќе кажаното, дека во СДСМ не се размислува за предвремени парламентарни избори.
Во поглед на референдумско изјаснување за промена на името, Шекеринска рече дека за решенијата за името да бидат стабилни, односно да не бидат основа за нови поделби, треба да одат на референдум.
